उदाय् समाजया च्याक्वःगु दँमुँज्या

उत्तमराज शिलाकार

उदाय् समाजया च्याक्वःगु दँमुँज्या वंगु गुंलागा चौथी (भाद्र १२ गते) येँया कसाः ख्यः डल्लुइ जुल। ज्याझ्वलय् समाजया मू छयांञ्जे रत्नकाजी तुलाधरं वार्षिक प्रतिवेदन न्ह्यब्वयादिलसा दांभरि सर्वज्ञरत्न तुलाधरं आर्थिक प्रतिवेदन न्ह्यब्वयादिल। अथेहे विधान सुधार उपसमितिया कजि अमृतमान ताम्राकारं प्रतिनिधि सभाय् अनुमोदन याकेत न्ह्यब्वयादीगु विधान संशोधनया प्रस्ताव पास जुल। उदाय् समाजया ख्वाःपौ 'उदाय् समाः' ल्याः १७ व उदाय् समाजया विधि व्यवहार सुधारया झ्वलय् मय्जु लोचनतारा तुलाधरं यानादीगु म्यानुयल "उदाय जातिया मृत्यु संस्कार" सफू नं इनेज्या जूगु खः ।

निगूगु ज्याझ्वः उदाय् समाजया नायः डा.रुपज्योति कसाःया सभापतित्वय् न्ह्यात। प्रा. प्रेमशान्ति तुलाधर मू पाहां कथं झाःगु उगु सभाय् डा. प्रेमरत्न स्थापितं लसकुस न्वचु बियादीगु खः।
ज्याझ्वलय् बुद्धिरत्न�हिराशोभा तुलाधर सिरपाः बीबीए तगिमय् उत्कृष्ट ल्याः हःम्ह मय्जु सोहनी तुलाधरयात २५,०००/- तका व हनापौ दाता विद्यारत्न तुलाधरं लःल्हानादिल ।

अथेहे चैत्य-हिरा ताम्राकार सिरपाः एसएलसी परिक्षाय् उत्कृष्ट ल्याः हःपिं एलेजा ताम्राकार, प्रतिभा बनिया व उरुषा तुलाधरयात दाता रमेश ताम्राकार व रुपशोभां दां व हनापौ लःल्हानादिल ।

अथेहे "मणिहर्ष ज्योति छात्रवृत्ति" उदाय् समाजया नायः डा. रुपज्योति कसाःपाखें प्यंगू, वय्कःया मां केशरीलक्ष्मीया नामं निगू व दाताद्वय डा. सुमनकमल तुलाधर व सिद्धार्थमान तुलाधरपाखें निगू यानाः मुक्कं च्यागू छात्रवृत्ति दछिया खुद्वः�खुद्वः तका लःल्हाःगु खः। सभाय् कसाः तःधं गुथिया नायः शरद कसां उदाय् समाजया न्हू ज्यासना पुचःयात हनेज्या यानादिल। ज्याझ्वलय् उदाय् समाजया विधान, छात्रवृत्ति, आर्थिक उत्थान व समाजया भावी ज्याझ्वःया बारे न्ववासें समाजया पुलांम्ह नायः पञ्चवीर सिंह तुलाधरं उदाय् समाजया छेँ दनेत माःगु लागतया १० प्रतिशत दां थम्हं बीगु बचं बियादिल। समाजया पुलांम्ह सल्लाहकार लाभरत्न तुलाधरं उदाय् समाजं सरकारय् दर्ता याःगु उदाय् समाजया विधान ०६६/६७ स उदाय् समाजया १५ दँ पुलांपिं संस्थापक सदस्यपिनि नां दुमथ्याःगु खँय् दुःख प्वंकाबिल। सुगतरत्न सिन्दुराकारं उदाय् समाजया गुंगू थरया झिगू पुचःया गतिविधि व सुझावयात समाजया ज्याखँय् दुथ्याकाः सहलह ब्याकेमाः धयादिल। लक्ष्मण स्थापितं संस्थाया आर्थिक अवस्था क्वातुकेत उदाय्त जानाः छगू सहकारी संस्था चायेकेमाःगु सुझाव बियादिल।
उदाय् समाजया म्हगस जुयाच्वंगु समाजया थःगु हे छेँ दयेकेगु झ्वलय् थुगु हे कार्यकालया थुगु हे सभाय् पदमज्योति कसाः, रुपज्योति कसाः व दानरत्न तुलाधरया स्वामित्वय् लानाच्वंगु असं त्वाःया छेँ (पसः कवः बाहेक) उदाय् समाजयात प्राप्त जूगु खँय् लसता प्वंकुसें थःगु मन्तव्य बीगु झ्वलय् उदाय समाजया संरक्षक कुलवीरसिं तुलाधरं आः उदाय् समाजयात ज्याय् छ्यलेत थःगु हे छेँ प्राप्त जूगुलिं उदाय् समाज धिसिलाक्क न्ह्याः वनीगु विश्वास प्वंकादिल। वय्कलं विधिव्यवहार अप्वयेके मजिउगु, सुधार पक्षय् ध्यान बीमाःगु नापं थःपिंत माःमाःगु नियम याकनं दयेकाः न्ह्यायेमाःगु बिचाः प्वंकादिल। चिकःशोभा ताम्राकारं दान वःगु छेँ उदाय् समाजया हे नामय् पास जुइमाः धासें ज्या छ्यलेत जक बिल धाःसा लिपा कचवं वयेफु धयादिल। विद्यासागर तुलाधरं उदाय्तय्गु दीप सुधारया ज्या न्ह्याकेमाः धयादिलसा मोतिरत्न तुलाधरं उदाय् समाजया छेँखां छम्ह छम्ह दुजः दइकथं विधानय् संशोधन यायेमाःगु खँ कुलादिल। भगवानरत्न तुलाधरं उदाय्तय्गु लागा तसकं ख्वातुगु व छथासं कय्कुनाच्वंगुलिं भुखाय्या दृष्टिकोणं तसकं जोखिम अवस्थाय् लानाच्वंगु कारणं अजाःगु विपत्तिं बचे जुइगु उपाय नालेत उदाय् समाज न्ह्यचिलेमाः धयादिल। मू पाहां प्रा. प्रेमशान्ति तुलाधरं उदाय् समाजं मिसापुचः स्वनाः उकी माःगु व्यवस्था याःगु खँय् लसता प्वंकुसें आः अन्तर्राष्ट्रिय क्षेत्रय् जक मखु नेपाःया मुलुकी ऐनय् तकं मान्यता प्राप्त जुइधुंकूगु अन्तरजातीय विवाहया मान्यतायात उदाय् समाजं नं स्वीकार याना वनेमाःगु खँय् बः बियादिल। मिसा पुचःया नकिं मीरा ज्योति कसां सरकारं मिसापिंत ३३ प्रतिशत कोटा बियातः थें उदाय् समाजं नं उदाय् मिसापिंत उकथं हे सहभागिता बिया यंकेमाःगु बिचाः प्वंकादिल।
छ्यांज्ये रमेश तुलाधरं समाजयात व्यवस्थित रुपं न्ह्याकेत आर्थिक ग्वाहालिया अपिल यानादिल सा थुकियात कदर यासें अन हे ज्याकू संचालन यायेत प्रा. प्रेमशान्ति तुलाधरं झिद्वः तका, उत्तमधर तुलाधरं निद्वः तका दां समाजया नायःयात लःल्हानादिल। अथे हे समाजया छेँ दनेत जीवरत्न स्थापितं झिद्वः तका दां नं अन हे लःल्हानादिल ।

अन्तय् सभाया नायः डा. रुपज्योति कसां उदाय् समाजय् थः नायः जुया वयेधुंकाः आः तक विधान दर्ता, विधि व्यवहारय् सुधार, मिसा पुचः स्वनेज्या, समाजया ख्वाःपौ पिकायेगु ज्या नापं उदाय् समाजया थीथी थरया फुक्कं कवः नायःपिंत समाजया सल्लाहकार कथं दुथ्याकागु खँ कनादिल ।

More Stories Like this