चान्हय् छेँ दुनाः न्हय्म्ह सित

येँ (सन्ध्या टाइम्स)/कालीकोटया भर्ता गाविस वडा नं. १ साहुवाडा लागाय् वंगु चान्हय् छेँ दुनाः छखा हे छेँया स्वम्ह व पाहां वयाच्वंपिं प्यम्ह यानाः मुक्कं न्हय्म्ह मनूत सीगु दु ।

अनया स्थानीयवासी पर्व दमाईया छेँ दुनाः घटनास्थलय् हे थुपिं न्हय्म्ह मनू सीगु खः।
म्हिगः सुथंनिसें न्हिछि हे वा वयाच्वंगुलिं चान्हय् दमाईया छेँ दुना वंगु खः। कालीकोटया सदरमुकाम मान्मं २५ किलोमिटर तापाक च्वंगु साहुवाडा लागाय् उगु घटना जूगु खः ।

छेँ दुनाः ल्हाःपिं दमाईया स्वम्ह काय् म्ह्याय् व सुकाटिया ७ उदागांपाखें वयाच्वंम्ह ३७ दँया काशे दमाईया प्यम्ह छेँजःपिं सीगु खँ जिल्ला प्रहरी कार्यालय प्रमुख मोहन प्रसाद पोखरेलं धयादीगु दु ।

वय्कःया धापू कथं पर्व दमाईया झिदँ दुम्ह काय् रज बहादुर दमाई, न्हय्दँ दुम्ह कायर अलि दमाई व स्वदँ दुम्ह म्ह्याय् काली दमाई सीगु खःसा सुकाटियां वयाच्वंम्ह पाहां म्ह्याय् जिलाजं ३७ दँया काशे दमाई, वय्कःया जहान २५ दँया नानी दमाई, न्हय्दँया काली दमाई व न्यादँ दुम्ह धर्म दमाई सीगु खः ।

छेँथुवाः ४० दँया पर्व दमाई, वय्कःया जहान ३२ दँ दुम्ह हरिशोभा दमाई व पाहां काशे दमाईया १३ दँ दुम्ह म्ह्याय् नम दमाई धाःसा घाःपाः जूगु दु। घाःपाः जूपिंत स्थानीय उपस्वास्थ्य चौकीइ वासः याकातःगु दु ।

स्वतँजाःगु उगु छेँ दुना वयाः थ्व दुर्घटना जूगु खः। छेँ दुनावःगु सुचं वयेवं हे सुकाटिया प्रहरीपाखें सहायक प्रहरी निरीक्षक हर्कबहादुर रोकायया नेतृत्वय् प्रहरीया छगू पुचः उखे वंगु खःसा उमिसं हे घाःपाः जूपिन्त उद्धार याःगु खः।
देय्या थीथी थासय् थुगुसी चलखं ल्हानाः दर्जनौं मनूत परिवार छगुलिं सीधुंकूगु दुसा आपालं घाःपाः जुइधुंकूगु दु ।