वार्ता जक मखु निकास बिउ

कृष्ण प्रजापति

थीथी वार्ता, बैठक व परामर्श यानाः राजनीतिक दलतय्त निरास यायेगु क्रम जारी हे जुयाच्वंगु दु। अथे थीथी कथंया परामर्श वार्ताय् जक लांलां लिकुनाच्वंगुलिं यानाः नं थौं देशय् कामचलाऊ सरकार कायम जुयाच्वंगु दु। धाइ, नँयात क्वाःगु इलय् हे दायाः आकार बीमाः। तर थौं विषयवस्तु धाःसा न्हूगु सरकार गठनया लागिं न्हूम्ह प्रधानमन्त्री ल्ययेगु धयाच्वंगु दु, ज्या धाःसा इकिधिकि हे मसँसें गन देश थानाच्वंगु खः, अन हे ठपक्क जुयाच्वंगु दु। थज्याःगु तालं गथे यानाः देश न्हूगु नेपाल कथं स्थापित जुइ फइ? उकिं आः वार्ता�वार्ता जक हालाच्वनेगु सिबें नं न्हूगु सरकार गठनया लागिं न्ह्यागु हे त्याग तपस्या व बलिदान यायेमाःसां यायेमाःगु ई वयाच्वंगु दु। राष्ट्र संघीय मिसन अनमिन, भारतीय राजदूतावास लगायत थीथी विदेशी कुटनीतिक नियोगतय्सं तसकं चिउताः तयाहये धुंकल। थज्याःगु इलय् देश बरबाद जुइगु आपालं सम्भावना खने दयाच्वंगु दु। देशयात बरवाद जुइगुपाखें बचे यायेगु वा गथे जुल अथे देशयात ध्वगिक्क हे स्यंसां वास्ता मयायेगु थ्व खँ राजनीतिक दलतय्गु ल्हातय् थानाच्वंगु दु ।

छगू इलय् देशय् निगू सरकार कायम जुइगु भय दुगुलिं वा निगू सत्ता कायम जुइगु ग्याःचिकु खने दया वःगुलिं धकाः पदं राजीनामा याःम्ह प्रचण्डं आः पद त्याग यानाः जूसां थःपिं प्रतिपक्षय च्वनाः सरकारयात ग्वाहालि याये धाये फयाच्वंगु मदु। झिंस्वला तकया थःपिनि आन्दोलन सत्ता केन्द्रित जुया आः थःपिं सरकारय् च्वनाः न्हूगु संविधान दयेके दुसा पाय्छि, यदि थःपिं हे सत्ताय् च्वनाः सरकार चले यानाः न्हूगु संविधान दयेकेगु अवसर चूमलात धाःसा विरोध जक यानाः नं सरकार व राज्ययात हे असफल यायेगु कुतः जुयाच्वंगु दु। थ्व गुलित पाय्छि तर्क खः व ला इलं क्यनी हे तिनि। थौं स्वयाः कन्हय् झन झन जटिल जुया वनेफुगु जुयाः मनूतय् ध्यान दुगु इलय् हे न्हूगु सरकार गठनया कुतः यायेमाः। खालि संविधानय् हिलेमाली वा कार्यसुची मिले याये माली धइगु ल्याखं बारम्बार मतदान लिछ्यानाः बारम्बार हरुवा उम्मेदवार जुयाः राजनीतिक दलया नेतातय्त बेइज्जत यायेगु परिपाटी गुलित पाय्छि खः, थ्व खँय् नं ध्यान तयेमाःगु ई वःगु दु ।

बहुमत जनताया हीत जुइगु तायेकाः हे थौं सामन्तवादया थासय् बहुदलीय प्रजातन्त्र वा गणतान्त्रिक शासन व्यवस्था वःगु खः। आः देशयात हाकनं लित यंकेगु वा प्रतिक्रान्ति वा प्रतिगमन शुरु यायेगु ह्वःताः चूलाकेगु वातावरण राजनीतिक पार्टीतय्सं सुयातं बी हे मजिउ। थन ला अथे न्हूगु कथं हे राजनीतिक वातावरण चूलाइगु स्थिति खने दयावःगु दु। पुलांपिं जुजु लानिपिं धर्मया नामय् थीथी थासय् चाःहिलाः जनताया राय सल्लाह कायेगु व वर्तमान राजनेतात प्रति गुलि बितृष्णा ब्वलना वयाच्वंगु दु धकाः सीकेगु ह्वःताः चूलाकाच्वंगु दु। अथेहे म्हिगःया राजभक्त हनुमानत नं थःपिं मदयेक देश हे चले मजुइगु तायेकाः आः पाः थःपिनिगु हे जकं खःला धइगु भ्रम ब्वलंकाः खःगुं मखुगुं खँ प्रचार यानाः राजनीतिक दबुली न्ह्यःने खने दयेकेत स्वयाच्वंगु दु। वास्तवय् थ्व फुक्कं व्यर्थ कुतः जक खः। नेपाली जनतां थःपिनि हे करामतं देशय् संघीय लोकतान्त्रिक गणतन्त्र नेपाल दयेकेगु शपथ नयेधुंकूगुलिं आः राजनीतिक दलतय्गु थीथी कथंया दाउपेच व भय खनाः ग्याइगु व लिचिलिगु नं स्थिति मदये धुंकल। तर जिम्मेवार राजनीतिक दलत हे अथे यायेमाःगु ज्याय् न्ह्यचिलेगु स्वयां गन छु याःसा जी अथे यानाः लिलिचिला वनेगु यानाच्वंगुलिं नं झीगु देशय् न्हूगु संविधान दयेकाः न्हूगु नेपालयात आकार प्रकार बीगु ज्या आः तक नं अन लाः थन लाः मदयाच्वंगु खः। थ्व खँय् सकसियां ध्यान वनेमाःगु ई जुइधुंकूगु दु ।

देशयात सन्तुलित विकास यायेगु निंतिं छु गथे याःसा जी धइगु चिन्तन मनन् यायेमाःगु थ्व इलय् खाली छम्ह प्रधानमन्त्री ल्ययेगु वा न्हूगु सरकार गठन यायेगु ज्याय् हे देशया महत्वपूर्ण सदन संविधानसभाया निला स्वलाया ई सितिं वंका च्वनेगु खःसा देश बरवादपाखे न्ह्यचिलेफु धइगु खँया संकेत बिउगु हे खः धाःसां छुं पाइ मखु। शत्रु वा पिनेया महिताःतय्सं थ्व देशय् बिकास जुल धाःसा थःपिसं धाः थें च्वनी मखु, थःपिनिगु आदेश पालना जुइ मखु धइगु तःधंगु चिउताः यानाच्वंगु जुइफु। तर झी अज्याःपिं हे महिताःतय्गु दाउपेच व षडयन्त्रया दथुइ हे थःपिंत चाःचाःहीकेगु ज्या जकं यानाः ई फ्यानाच्वंगु दु। राष्ट्रपति स्वयमं थीथी राजनीतिक पार्टीया शीर्ष नेतातय्त नापलानाः थीथी कथं परामर्श यानाच्वंसां वास्तवय् उकिया लागिं छुं कथं नं सकारात्मक संकेत खने दयाच्वंगु मदुनि। छुं छगू राजनीतिक पार्टीयाके त्यागया भावना मदुगु व शासक हे जुयाः जक छुं यायेफइ धइगु मतिइ लुयाच्वंगुलिं थज्याःगु स्थिति वयाच्वंगु खः। अथे जुयाः नं आः त्यागया भावना दुपिं नेतागिरी जक यानाः देशयात बरावाद यायेत मस्वइपिं स्वच्छ छबि दुपिं न्हूगु हे समीकरण तयार यायेमाःगु स्थिति वयाच्वंगु दु। अथे जुयाः नं सभासद् वा संधिधानसभाया सदस्यतय्त मन्त्री यायेगु प्रावधान हे चीकेमाःगु खँ छगू इलय् नेपाल मजदुर किसान पार्टी न्ह्यब्वये हःगु खः ।

ताः ई तक सरकार नीस्वने मफुगुलिं यानाः थौं देशया अर्थतन्त्र व विकास डांवाडोल जुइगु स्थिति वयाच्वंगु दु। पूर्ण बजेट आः तक नं प्रस्तुत याये फयाच्वंगु मदुनि। कामचलाउ सरकारया लागिं कामचलाउ वा पेश्की बजेटं ज्या कयाच्वंगु दु। कन्हय् बजेट मवःगुलिं धयाः सरकारीस्तरया कर्मचारीत हे तलब तकं नये मखनीगु स्थिति वयेफु। अथे धइगु छगू ल्याखं आर्थिक संकट जक मखु देशय् राजनीतिक संकटया हे संकेत खः। थज्याःगु ई वयेधुंकाः अथे याये थथे याये मदयेक च्वनेगु स्वयां इलय् हे गतिरोध अन्त्य यायेगुपाखे राजनीतिक दलतय्सं ध्यान तयेमाः। राजनीतिक दल हे राजनीतिक केन्द्रविन्दु जूगुलिं उमिसं ब्वलंकूगु थ्व थीथी कथंया समस्यायात उपिं हे जानाः समाधान मयायेकं छुं जुइगु स्थिति मदु। शान्ति सुरक्षा कायम यायेगु धकाः नारा बियाः नीस्वंगु सरकारं राजीनामा बीधुंकाः सचेत जुइमाःपिं ला दलत हे खः ।

More Stories Like this