आः अति जुल, भारतीय दूतावासया पहः

नेपाली सञ्चार माध्यमयात विज्ञापन रोके यायेग, अनं लिपा भ्वं रोके यायेगु थेंज्याःगु घृणित ज्याखँत यायेधुंकाः आः नेपाःया निंतिं भारतीय राजदूतावासं थःगु देशय् उत्पादन जुइगु थीथी वस्तुतय्सं विज्ञापन मबिउ धइगु झोंकय् अज्याःगु वस्तुया विरोधय् समाचार च्वया हल धकाः मेगु घुर्की क्यना हःगु दु। दूतावासया थ्व घुर्कीं यानाः भारतीय राजदूत थ्व इलय् नेपाःया सञ्चार माध्यमय् हानं छक्वः आलोचनाया पात्र जूगु दु ।

भारतीय दूतावासं जारी याःगु थ्व वक्तव्यं मेगु मखुसां भारतया विरोध याःगु हे कारणं भारतीय उत्पादनया विज्ञापन छुं छुं सञ्चार माध्यमयात दूतावासं हे बन्द याकूगु खः धइगु खँ पुष्टि जूगु दु। सञ्चार माध्यमय् निर्वाध रुपं वयाच्वंगु विज्ञापन पत्रिकाय् पिहां वइगु समाचारयात त्वहः दयेकाः बन्द यायेगु नं छगू कथं सञ्चार माध्यमय् याःगु हस्तक्षेप हे खः। भारतीय दूतावासया लिपांगु वक्तव्यं थ्व हस्तक्षेपयात चाःहीकाः स्वीकार याःगु दु। छुं नं उत्पादनया बारे पिहां वःगु समाचारयात खण्डन यायेगु शैली थ्व मखु। अज्याःगु उत्पादनतय्सं थःपिनि गुणस्तर थकयाः उकिया लिसः बीमाःथाय् दूतावासयात न्ह्यःने तये हःगुलिं भारतीय दूतावास राजदूत खः लाकि वाणिज्य दूत खः छुटे याये याये मफुगु स्थिति जूगु दु। थ्व स्वयां न्ह्यः भारतीय दूतावासं एमआरपी छपाईयात कयाः नेपाः सरकारयात दवाव बिउगु खँ पिहां हे वयेधुंकूगु दु। थ्व सम्पूर्ण प्रकरण भारतं नेपाःयात यानाच्वंगु दुर्व्यवहारया चरम रुप खः। नेपाःयात भारतं छगू सार्वभौम मुलुकया दर्जा तकं मबिउगुया चिं खः। थज्याःगु खँय् नं देय्या राजनीतिक पार्टी मौन च्वनाच्वंगु धाःसा न्हूगु दासताया प्रदर्शन खः ।

More Stories Like this