जिं मसिउ

नर्मदेश्वर प्रधान

"ग्व ग्वाय्? सुनां काल? गन तया?" जितः हायेकीपिं नं दइ। जिं नं लिसः बिया। गबलें धाये, "ग्वाय् छेँय् तया वया।" गबलें धाये, "कलाःयात स्वथंका थका।" "बरः तइतयागु। फ्याना हये। ग्वाय् थौंकन्हय् भूमिगत।" गुलिसित जिं हे हायेके ।

खँयाखँय्
उकुन्हु। भ्वय् वने। थौंकन्हय् भ्वय् वनेत जिं ग्वाय् चाये। भ्वय् वने म्वाःबलय् ग्वाय् दइ। जि ग्वाय् दुम्ह जुइ। भ्वय्बलय् चाये। ग्वाय् मदु जुया बी। गुलि मनूत अजू चाइ। भ्वजय् जितः ग्वाय् मदुम्ह खनी। गुलिस्यां हायेकेत स्वइ। जिचा भाजु। भिन्चाया भाजु। वय्कलं हायेकी। "पाजुया ग्वाय् गन वन थें? म्हीग तक ला गुलि बांलाःगु ग्वाय् ! थौं खालि। झिझांमिझां दं थें।" फुक्क न्हिली। "खः। खः। ग्वाय् मदु ख्वाः। चिं मदुगु थें।" जितः नागःतुगः यानाहइ। हायेकीगु तच्वइ। खँ न्यने। न्हापां ला जि नं न्हिलाच्वने। लिपा लिसः बी बाध्य जुइ। अले छ्वास्स लिसः त्वःते, "जिगु ग्वाय्। थां चान्हय् चोरी जुल। द्यनाबलय् दुगु ग्वाय्। दनाबलय् सुचुयाच्वन। छु याये? देशया परिस्थिति। थ्व हे खः। असुरक्षित। ग्वाय् तकं बाँकी मतयेधुंकल। खुँतसें। अनमोल धनसम्पत्तिया ला छु खँ ल्हाये ।"

"सुनां खुल जुइ छिगु ग्वाय्? छाय् खुल जुइ? सुयात ज्या लगे जुइछिगु ग्वाय्?" त्वाक्क छम्हेस्यां हायेका हइ। भिन्चा जिचाभाजुं तनी, "मलें ला मकाः ला छिगु ग्वाय्?"
"मलें छाय् काइ? मलेया हे सम्पत्ति ला खः नि व? मसीक कायेमाःगु छाय्? थ्व सुं मेपिनिगु हे ज्या जुइमाः," जिगु लिसः जुइ ।

"द्यनाच्वंथाय् वयाः ग्वाय् खुइफुम्ह सु जुइ व? जगेडा मलेया ला ज्या मखु ला थ्व? मेपिनि सुया आँट दइ?"
"खै खै" जिं धया। वैकल्पिक मले सुटुक्क न्ह्यलय् वयाः खुयायंकल जुइ। जिगु ग्वाय्। तर व सु जिं मसिउ।"
"अहो ! जिमि मलेयात लिथु ह्वंकेगु खँ हल नि। थुकी जिमिसं आपत्ति प्वंके।" जिजा भाजुं चेतावनी बी। जिं हानं लिसः बी, "भाजुपिं, चिन्ता कायेम्वाः। म्हगसय् वइम्ह वैकल्पिक मलेया खँ ल्हायेवं छाय् ग्यायेमाःगु? छिकपिनि मलेया सँ छपु नं उखेथुखे याये फइ मखु वं.." खँ गनं गन थ्यनी। ग्वाय् चानागुलिं यक्वस्यां जितः ख्याः याइ। "ग्व ग्वाय्?" गुलिस्यां न्यनी। गुलिस्यां धाइ, "अतिकं बांलात का। तुयुसेच्वंगु ग्वाय्। स्वये हे मजिउ। बुराम्ह थें। ग्वाय् मदुगु हे बांलाः।" ग्वाय् मदुबलय् दयेकातःम्ह मनू थें। कृत्रिम खनेदइ। थीथी विचाः। प्रतिक्रिया वागाइ।
"ग्व ग्वाय्? गन वन?" यक्वस्यां न्यनी। हायेके थें। ख्याः याये थें। "जि शिख खः ला ख्वालय् ग्वाय् दारी खालि मजुइत?" जिं लिसः बी। लुमनी। शिखतय् संस्कृतिइ ख्वालय् ग्वाय् दारी अनिवार्य। चाये मजिउ। लहिना तयेमाः। ग्वाय्, दारीया खँय् छपु शिख जोक (ख्याः) दु� "छम्ह शिखया काय बुल। बौम्हं मचाया ख्वाः खनी। बौम्ह चिल्लाय् दनी। कलाःयात धाइ, 'थ्व जि काय् मखु। थ्वइत जिं काय स्वीकार याये फइ मखु।' कलाः अजू चाइ। कलातं सिउ व वया हे काय खः। भाःतम्ह छाय् अथे सन्के जूगु? वं छाय् शंका याःगु? थुइके मफुत। सरदारनीं थः भाःतयात न्यनी, "सरदारजी ! थ्व छिम्ह हे काय खः। छाय् शंका?' 'मखु, थ्व जिम्ह काय मखु। जिगु काय जूसा थ्वया दारी, ग्वाय् दयेमाःगु, ग्व थ्वया दारी ग्वाय्? ग्वाय् दारी दुम्हेसिया पुसां ग्वाय् दारी मदुम्ह मचा गय् बुइ? थ्व ला सन्त्रासि माय् खाइसि सः थें जुल। थन छुं धाँधली जूगु दु।' शंकाग्रस्त सरदारजी एकसूरय् हाली। सरदारजीया कलाःया छु याये छु धाये जुइ। भाःतयात गय् पत्याः बी? गय् सफाइ कायेगु? तं नं वइ। हीमी चाये मास्ते वइ। भाःतयात धाइ, 'सरदारजी, छं धाःगु ठीक। छं काय् बूबलय् ग्वाय् दारी दुगु खः। छं थे हे। तर पिहां वःबलय् वःगु दारी ग्वाय् गन थात खः मसिउ छु याये।' कलाःया खँ न्यनाः सरदारजीं छुं धाये फइ मखु। '... थाःगु। छु याये? थुकी जिमि कलाःया दोष मदु।' कलाःया खँय् व विश्वस्त जुइ। काययात स्वीकार याइ ।"

"ग्वाय् गन वन?" धकाः न्यनीपिंत जिं नं नाना लिसः बी। ग्वाय् धइगु चाये जिउ। ग्वाय् लही, लमही जिगु खुसी। अय्नं दये हे माःगु थें जिके न्यनी। गन सुचुकी? "ग्व ग्वाय्? सुनां काल? गन तया?" जितः हायेकीपिं नं दइ। जिं नं लिसः बिया। गबलें धाये, "ग्वाय् छेँय् तया वया।" गबलें धाये, "कलाःयात स्वथंका थका।" "बरः तइतयागु। फ्याना हये। ग्वाय् थौंकन्हय् भूमिगत।" गुलिसित जिं हे हायेके।
ग्वाय् जितः मचाबलय्निसें मयः। मचाल्याय्म्ह जुयावःलिसे ख्वालय् ग्वाय् सी दइ। ग्वाय् बुइ। दारी वइ। जिगु ख्वाः जङ्गल थं जुइ। स्यनी। जितः पीर जुइ। जिं क्यातुगु दारी खूब पुइ नं। स्याइ। सह याये। दारी मदइगु बांलाइ। उबलय्या जिगु मान्यता। तःधिकः जुयावइ। दारी ग्वाय् ह्वासाह्वासा बुइ। दारी खाये। ग्वाय् चाये। दारी ग्वाय् दुपिंत मिसातसें गय् खंकीजिं मसिउ। तर जिगु अनुमानमिसातय् मिखां दारी ग्वाय् दुपिंत बांलाः खंकी मखु। ययेकी मखु। दारी ग्वाय् मिजंया चिं खः। पुरुषार्थया प्रतीक नं धाइ। थौं दारी ग्वाय्यात पुरुषार्थलिसे मस्वाः। दारी ग्वाय् मदुपिंके नं पुरुषार्थ दइ। दारी ग्वाय् मिजंतय् शारीरिक लक्षण जक खः। मिजं जुयाया प्रमाणपत्र।
जितः ग्वाय् दारी मयः। ग्वाय् दारी मदुसा गुलि जिउ। खाना च्वनेमाः। गुलि झन्झट। लिमलाः फमलाः दारी�ग्वाय् खाये। छगू गजबगु घटना जुइ। उबलय् तिनि जिं दारी ग्वाय्या मतलब थुइ। थ्वया भूमिका गुलि महत्वपूर्ण। सी। अनायास। छन्हु जिके गजबगु भय, शंका लुइ। जि मिसा जूसा छु याये? कलाः दु। म्ह्याय् दु। अचानक मिसा जूवंसा? इमिलिसे जिगु गुज्वःगु स्वापू जुइ? गुज्वःगु हल्ला प्यखेरं जुइ? गय् यानाः सकसितं ख्वाः क्यने? शंका जुइ। धुन जुइ। म्येँ हालाः स्वया। मिसा सः थें जुइ। तिख्खर। घोंसः वयेकेत स्वये। वइ मखु। न्यतालय् थिया स्वये। ग्वाय् दारीया खँ हे मदु। बाझः बुँ थें। जि झसंग जुइ। का धात्थें जि मिसा हे जुइन। न्यताः पिच्चुसे च्वं। दारी ग्वाय् मबुइधुंकल। यकिन जुइ। न्हापा न्हापा दारी ग्वाय् खनाः उसि चाइम्ह, जि। थौं न्यतालय् दारी ग्वाय् झ्याम्म वःसा जिउ। आतुर जुइ। दारी ग्वाय्या महिमा थुइ। न्हापा न्हापा पुयाः वांछ्वयेगु दारी। आः सालाः सालाः तहाः यायेमाः थें च्वनी। कलाःनाप च्वने। जि मछाः थें जुइ। पक्क। जि मिजं मखइ वन। जि छटपटय् जुइ। छन्हु निन्हुं शंका त्वःतल। सिंहया सिंह जुइ। अले तिनि दारीया महत्व थुइ। जिं ग्वाय् लहिना। आः सुचुक्क, पाचुक्क ग्वाय् चाये मखु। दृढ जुइ। ग्वाय्या महत्व सीकेमाः। विचाः लुइ ।

ग्वाय् लही। रङ्ग हिला वइ। हाकुगु ग्वाय् तुयुया वइ। गुलिस्यां न्यनी, "सँ तुयू मजूनि, ग्वाय् जक गय् तुयूगु?" प्रकृतिया खेल। जिं गय् लिसः बी फइ? अय्नं जिं फुगु लिसः बी। "नियमं च्वंनिसे तुयुया वयेमाःगु खः। क्वंनिसें तुयुया वल का। छु याये ।"

"छु ग्वाय् लहिना तइगु? अजाःगु बांलाःगु ख्वाः। स्वये हे मजीक ग्वाय् लहिनातइगु। तुयुसे च्वंगु ग्वाय्। बुरा थें।" थकालिपिंसं न्वाइ। जि ल्याय्म्ह खंकाच्वने यःपिंसं धाइ। भ्वय्�भी जुइ। ग्वाय् चाये। छखलकं च्वछाइ। "बांलात। उलि बांलाःगु ख्वालय् छाय् फी फी ग्वाय्? गुलि ल्याय्म्ह खनेदु।" मेखलकं हायेकी, "ग्वाय् गन वन? गन तन? ग्वाय् तंगु हे मचाःम्ह। होश मदुम्ह। धात्थें बुरा जुल का। होशहवास हे मदुम्ह। ध्वादः ।"

ग्वाय् चाये। धात्थें जि ल्याय्म्ह जुल ला कि बुरा जुल। जिं मसिउ ।

More Stories Like this