चीन व रुसलिसे प्रमया सल्लाह

सरकारया विरोध याइगु दलतय्त मुँज्याय् मसःतू

येँ (सन्ध्या टाइम्स)/नेपाःया शान्ति प्रक्रिया ताःलाकेत भूमिका म्हिता वयाच्वंगु संयुक्त राष्ट्र संघीय मिसन अनमिनया म्याद थपे यायेगु वा मयायेगु धइगु बारे सहलह यायेत प्रधानमन्त्री माधव नेपालं थौं राष्ट्र संघ सुरक्षा परिषद्या स्थायी दुजः देय्त चीन व रूसया राजदूतलिसे सल्लाह ब्याकादीगु दु। प्रम नेपालं थौं सुथय् वय्कःपिंलिसे बिचाः कालबिल यानादीगु खः ।

प्रधानमन्त्री नेपालं थःगु हे ज्याकुथी राजदूतपिंत सःताः थुकिया बारे सल्लाह ब्याकादीगु खः। थौं हापां चीनया राजदूतलिसे सहलह ब्याकादीगु खःसा अनं लिपा रूसया राजदूतयात सःताः सहलह ब्याकादीगु खः। नेपालय् सक्रिय अनमिनयात नेपालं पितिना छ्वयेमाः धकाः जःलाखःला देय् भारतं दवाव बियाच्वंगु दुसां चीन व रूसया बिचाः थुकी पायेफुगु अनुमान दु। सूत्रया कथं चीन नं अनमिन नेपालय् ताः ई च्वने मजिउ धइगु पक्षय् दु।
अनमिनया म्याद थ्वहे वइगु भाद्र ३० गते फुइत्यंगु दु। थ्वयां लिपा आः अनमिनया म्याद थपे मयायेगु ग्वसाः सरकार व सरकार समर्थित पार्टीतय्सं यानाच्वंगु दु। म्याद थपे मयायेगु हे पक्षय् दुम्ह प्रधानमन्त्री नेपालं म्हिगः संविधानसभाय् दुथ्याःगु छुं दलतय्त सःताः नं सहलह ब्याकादीगु खः ।

म्हिगः संविधानसभाय् दुथ्याःगु फुक्कं दलयात सःताः सहलह ब्याकागु धकाः बय्बय् याःसां वास्तवय् वय्कलं थःगु सरकारयात समर्थन याइगु दलतय्त जक सःतूगु खः। सरकारयात समर्थन मयाइगु व माओवादीया नेतृत्वय् सरकार दयेकेमाः धयाच्वंगु दलया नेतातय्त उगु मुँज्याय् मसःतूगु खँ सीदुगु दु। बैठकय् मसःतूगु खँ आपत्ति प्वंकुसें नेपाः राष्ट्रिय पार्टीया अध्यक्ष डा. केशवमान शाक्यं प्रधानमन्त्री नेपालं षडयन्त्रपूर्वक हे थःपिंत म्हिगः मुँज्याय् मसःतूगु द्वपं बियादिल ।

अनमिन बारे थःपिनि खँ लागू यायेगु ग्वसाःयात ज्या मछिनी धकाः हे नेपाः राष्ट्रिय पार्टीयात मसःतूगु आशंका वय्कलं प्वंकादीगु दु ।

अथे हे नेकपा (एकीकृत)या महासचिव रामसिंह श्रीषं नं म्हिगःया मुँज्या संविधानसभाय् दुथ्याःगु २७ दलयागु खः धाःसां उकी थःपिंत नं मसःतूगु खँ धयादीगु दु।
उखे नेमकिपां धाःसा मुँज्याय् सःतूगु खःसां संसदय् यायेमाःगु सहलह क्वथाय् यायेगुया अर्थ मदु धासें बैठक बहिष्कार याःगु खः ।