सांस्कृतिक जुजु बारे स्पष्टीकरण ग्व?

प्रधानमन्त्री माधव नेपालं देशय् थौंकन्हय् चर्चाय् वयाच्वंगु 'सांस्कृतिक राजतन्त्र' या खँलिसे माओवादी नं स्वानाच्वंगु कारणं माओवादीं थुकिया बारे स्पष्ट यायेमाःगु बिचाः प्वंकादीगु दु। माओवादीपाखें खास यानाः प्रधानमन्त्री चुनावय् मत फ्वनेगु झ्वलय् जुजुवादी पार्टी राप्रपा नेपालया नेतातलिसे खँ ल्हासें देशय् सांस्कृतिक राजतन्त्रया सम्भावना दु धाःगु खँ चर्चाय् वःगु खः । उकियात कयाः थीथी संचार माध्यमय् समाचार व विश्लेषण वलं नं माओवादीं उकियात खण्डन मयाःगुलिं थुकी माओवादीया समर्थन हे दुगु जकं खः लाकि धइगु आशंका जुयाच्वंगु खः। गुगु स्वाभाविक नं खः। लिसें उकियात हे ल्वयेक प्रधानमन्त्री चुनावय् माओवादीया उम्मेदवारयात त्याकेमाः धकाः पुलांम्ह जुजु ज्ञानेन्द्र शाहया जिलाजं भाजु राज बहादुर सिंह सक्रिय जूगुलिं पुलांगु जुजु खलःलिसे माओवादीया छुं स्वापू जकं कायम जूगु खः लाकि धइगु आशंका नं पिहां वःगु दु। लिसें माओवादीया अज्याःगु अभिव्यक्तिया नापनापं पुलांगु जुजु खलःया दुजःपिं नं थीथी कथं सक्रिय जुया वःगुलिं देशय् सांस्कृतिक राजतन्त्रया माहौल हे जकं सिर्जना जुइधुंकूगु खः ला धइगु आशंका नं उतिकं प्रवल जुया वःगु दु। थ्व फुक्क माओवादीया अभिव्यक्ति लिपा वःगु जूगुलिं माओवादीं थःगु अवधारणा स्पष्ट यायेमाःगु ला द हे दु तर पुलांगु जुजु खलकं याइगु छुं नं ज्याझ्वःयात प्रहरी व सेनाया समेत पूर्ण सुरक्षा बीगु ज्या गुगु जुयाच्वन उकियात कयाः धकाः स्वय्म प्रधानमन्त्री माधव नेपालं नं स्पष्ट यायेमाःगु आवश्यकता धाःसा दु। थन सुं नं राजनीतिक दलयात पत्याः याये फुगु अवस्था आः मदयेधुंकल ।

More Stories Like this