मस्तय् साहित्यकार गणेश अपार

सुनिता मानन्धर

गणेश अपार नेपालभाषाया साहित्य ख्यलय् अपरिचित नां मखु। वि.सं २०२२ सालय् रेडियो नेपालं नेपालभाषां समाचार बीगु ज्या दिकेवं थुकिया विरुद्धय् त्वाःत्वालय् जूगु साहित्य सम्मेलनय् वय्कलं नं ब्वति कयादीगु खः। खय्त ला वय्कलं दकलय् न्हापां खस भाषां थःगु साहित्यिक यात्रा न्ह्याकादीगु खः। वासु पासाया पेरणां साहित्य ख्यलय् दुहां झाःम्ह वय्कः जनकवि दुर्गालाल श्रेष्ठया सल्लाह कथं नेपालभाषां च्वयेगु यानादीगु खः ।

वि.सं २०१३ सालंनिसें २०२४ साल तक वय्कः मदिक्क साहित्य सिर्जनाय् लगे जुयादिल। अनंलि वय्कलं शिक्षण पेशा यानादिल। थ्यंमथ्यं स्वंगू दशक शिक्षक जुयाः ज्या यानादीगु खः। वय्कलं नेपालभाषाया माध्यमं ब्वंकीगु दकलय् न्हापांगु ब्वनेकुथि जगतसुन्दर ब्वनेकुथिया शिक्षकपिंत शिक्षण तालिम नं बियादीगु खः। वय्कः शिक्षक जुयादीवं मस्तय् पुचलय् हे लाः वन। थुकिं यानाः मचा कविता वय्कलं आपाः हे रचना यानादिल। वि.सं. २०४७ सालय् वय्कलं च्वयादीगु मचा चिनाखँ मुना 'कतांमरिचा' सफूया रुपय् पिकयादिल। अथे हे वि.सं. २०४८/४९ य् 'फुकसित' नांया मेगु कृति नं तयार यानादिल। थुकी स्वास्थ्य विषयनाप स्वापू दुगु ५५ पु चिनाखँ दुथ्याकातःगु दु। वि.सं २०४८ य् 'मचा पहः' नांया मचा कविता मुना नं पिकयादिल। कविता च्वयेत व साहित्यकारपिं नाप च्वनाः गफ यायेत वय्कलं छेँय् छकू अलग हे क्वथा नं दयेकादीगु दु। वय्कः उगु क्वथाय् दुहां झाल कि साहित्य सिर्जनाय् दुनादी। थौं नं वय्कलं रचना यानादीगु सलंसःपु कवितात उगु हे क्वथाय् दनि। वय्कःया अप्रकाशित कृतित नं यक्व हे दनि ।

अबु सानुबाबु वैद्य वैद्य पेशा यानादीगुलिं वय्कलं थः अबुपाखें वैद्य ज्या नं सयेकादीगु खः। वय्कःया छगू अजूचायापुगु बानी दुगु जुयाच्वन। वय्कः च्वनादीगु ग्वल देशय् च्वंपिं सुं निवासी वा थम्हं म्हसिउपिं सुं मंत धइगु खँ सिल कि वय्कलं उकियात थःगु धलःपती च्वयेगु यानादी। वय्कःया जीवनकालय् मदया वंपिं सम्पूर्ण ग्वलनिवासीतय् नां उगु धलः पती उल्लेख दु ।

वय्कः छम्ह बहुप्रतिभाशाली व्यक्तित्व खः। वय्कलं परोपकारया ज्या नापनापं कलाकारिता, साहित्य, संगीतया ख्यलय् नापं तालिम बीगु ज्या यानादीगु दु।
वय्कःया जीवनयात कयाः साहित्यकार कैलाश भण्डारीं 'गणेश अपार' नांया छगू ग्रन्थ हे च्वयादीगु दु ।

धर्तीइ जन्म कायेवं हरेक मनुखं कर्म यायेमाः धइगु बिचाः दुम्ह वय्कः निवाः न्ह्यः जलस्येँ, नुगः व स्वँया ल्वचं कयाः मंत। वय्कलं थुगु संसारं थःगु देह त्याग यानादीसां वय्कःया कृतिइ वय्कः सदां अमर जुयाच्वंगु दु ।

More Stories Like this