'कांग्रेस विपक्षय् च्वनेत तयार'
मुलुकयात ठप्प यानाच्वंगु कारक तत्व म्हसीकेमाः
येँ (सन्ध्या टाइम्स)/नेपाली कांग्रेसया कार्यवाहक सभापति सुशिल कोइरालां प्रधानमन्त्री चुनावय् नेकपा (एमाले) यदि कांग्रेसयात मत बीत तयार मजूसा माओवादीयात बिउसां जिउ धयादीगु दु। उगु अवस्थाय् थःपिं विपक्षय् च्वनेत तयार दु धकाः नं वय्कलं धयादिल।
संविधान निर्माण प्रक्रिया व प्रधानमन्त्री चुनाव बारे ध्यानाकर्षण यायेत संसदीय मामिला पत्रकार समाजया प्रतिनिधितलिसे खँ ल्हासें कोइरालां थ्व खँ धयादीगु खः।
कोइराला निवास महाराजगंजय् पत्रकारतलिसे खँल्हासें वय्कलं कांग्रेसं आः तक याना वयाच्वंगु ग्वाहालिया कारणं एमालें नं थःपिंत ग्वहालि याइ धइगु विश्वास प्वंकुसें मुलुकयात अर्निणयया बन्दी दयेके मजिउ, एमालें थःपिंत ग्वाहालि मयाइगु खःसा माओवादीयात भोट बिउसां जिउ, थःपिं विपक्षय् च्वनेत तयार दु धयादिल ।
संविधान निर्माण व मेमेगु प्रक्रियाय् ब्वलनाच्वंगु पंगःया कारण कांग्रेस मखु धासें वय्कलं आः मुलुकयात ठप्प यानाच्वंगु कारक तत्वयात म्हसीकेमाः धयादिल।
माओवादीप्रति हे आक्रमक रुपं प्रस्तुत जुयादीमह कावा सभापति कोइरालां राजतन्त्रया अन्त्य व गणतन्त्र स्थापना थेंजाःगु महत्वपूर्णगु उपलब्धीयात जोगे याये मफया वनाच्वंगु चिन्ताया खँ खः धकाः नं धयादिल ।
वय्कलं एकिकृत माओवादीं विगतय् जूगु थीथी कथंया सहमति व सम्झौतायात कार्यान्वयन मायाःगुलिं हे देशय् थीथी कथंया समस्या वःगु खः धासें माओवादीया हे कारणं देय् अनिर्णयया बन्दी जूगु द्वपं नं बियादिल ।
माओवादीया कारणं हे तःक्वःमछि संसद अवरुद्ध जूगु नापं देशय् अशान्ति, हिंसा, हत्याया घटनात अप्वयावःगु खः धासें वय्कलं संविधानसभाया चुनावय् सहभागी जुयाः सरकार तकं संचालन यायेधुंकूगु पार्टीं हत्या, हिंसायात निरन्तरता बियाः शान्तिया नितिं ज्या मयाःगु द्वपं नं बियादिल ।
