थथे जुल कि देश असफलतापाखे वनी

डी.आर. खड्गी

चाहे समाजय् जुइमा चाहे देशय् जुइमा, बांलाना वनीगु, स्यना वनीगुया कारण खः नेतृत्व याइपिं नेतात स्वार्थी, लोभी व नैतिकहिन जुल धाःसा। यदि नेतृत्व याइपिं भिंपिं जुल धाःसा व थाय् अति बांलाना वनी। इतिहासं क्यना वने धुंकूगु दु िलच्छबीकालीन ई स्वर्ण युग खः धकाः। व इलय् शासक व जनता मिले जुयाः विकास निर्माणया ज्या यानावन। व ईया नियम कानून बांलाःगु जक मखु कार्यान्वयन याइपिं व्यक्तित्वत नं नैतिकवान, चरित्रवान जूगुलिं समाजय् मभिंपिं मनूतय्त थाय् बी मखु। अझ ला खुंखार बदमास, अपराधीतय्त देशं पितिना छ्वयेगु नं यानाच्वंगु खः। जब नैतिकहीन, चरित्रहीन, लोभी, पापी समाजय् दइ मखु व समाज अवश्य नं बांलाना वनीगु स्वाभाविक खः। शास्त्रय् नं थ्व खँ धयातःगु दु सत्य युग अथें वइगु मखु थ्व ला देय्या नेतृत्ववर्गं हइगु खः। नेतृत्व याइपिं भिंपिं जूसा देशय् सत्य युग वइ। नेतृत्व मभिंपिं जुल धाःसा देशयात कलि युगय् थ्यंकी। द्वापर युगया शासक कंशया ईयात कलि युग धयातःगु दु। कंशं जनतायात डर, त्रास बियाः शासन यानाच्वंगु खः ।

जनतायात करया भारं क्यंकाः जनताया जँ त्वःथुलेगु ज्या यात। कर पुले मफुपिं जनताया हि कयाः तकं यंकेगु यात। जनमानसं आः नं धायेगु याः, सु शासकं अप्वः कर कयाः जनतायात दुःख बी व शासकयात कंश राज धाइ।
झीगु देशय् नं जनतायाके अति कर कयाः, बजाःभाः नं थकयाः जनतायात दुःख बियाच्वंगुलिं थ्व शासकतय्त राक्षस राज धाःसां छुं मपाः। कांग्रेस कम्युनिष्ट जुयाच्वंपिं खसब्रम्हू नेतातय्सं जनता साथ कयाः शाह जुजुयात ला वांछ्वया बिल। तर परिवर्तन लिपा खसब्रम्हू नेतात अझ नं बदमास जुयाः पिहांवल। उमिसं लोकतन्त्र व मानव अधिकार धाधां अःखतं कमजोर यायां देशयात जंगली राजया अवस्थाय् यंकाच्वंगु दु। अझ ला व्यक्ति व पार्टी स्वार्थया लागि देशया अस्तित्व तकं समाप्त यायेत विदेशी इशाराय् प्याखं हुलाच्वंगु दु। विदेशीया इशाराय् चले जुयाच्वंगुलिं देश असफल राज्यपाखे वनाच्वंगु दु। थथे जुल कि देय् असफल जुइ �(क) अस्थिर राजनीति (ख)अर्थतन्त्र तहस नहस (ग) कानुनी राज्यया अनुभूति मंत कि (घ) कमजोर सुरक्षा निकाय (ङ) विदेशी हस्तक्षेप अप्वया वन कि। झीगु देशय् नेतात बदमास जूगुलिं देशय् गुलि गुलि परिवर्तन जुयाच्वन उलि उलि हे देश बर्वाद जुया वनाच्वंगु दु। ०७ सालय् भारतनाप जूगु घातक सम्झौता याःगु स्वयां नं ०६२/६३ सालय् न्हय्गू पार्टी व माओवादीं दिल्लीइ यानावःगु सन्धि अझ हे खतरनाक जुयाः पिहां वयाच्वंगु दु। ०७ सालय् भारतनाप प्रत्यक्ष रुपं राष्ट्रघाती सन्धि याःगु खःसा ०६२/६३ सालय् अप्रत्यक्ष रुपं सन्धि
यानाः भारतं धाःथे याये धकाः कबुल याना वःगु खः ।

भारतनाप यानावःगु सहमति थथे खः - (क) भारतया मूलबासीयात नागरिकता बीगु (ख) भारतीय मूलया नागरिक यात उच्च पदय् नियुक बीगु (ग) तराई लागाय् सशस्त्र पुचलं न्ह्याक्व हे आतंक मचे याःसां नेपाःया सेना प्रयोग मयायेगु। थ्व स्वंगू बुँदा भारतया न्ह्यःने कबुल याना वःगुलिं भारतीय मूलया मनू शक्तिशाली जुयाः देश कमजोर व गरिब जुयाच्वंगु खः। देश कमजोर जुलकि विदेशी शक्तिं राजनीतिक चलखेल याइगु स्वाभाविक हे खः ।

असक्षम भ्रष्ट स्वार्थी नेतातय्सं जनतायात थें विदेशी नेतातय्त नं झंगः लायेगु कुतः मयाःगु मखु तर विदेशी नेतातय्सं धाःसा नेपाःया नेतातय्त नेताया रुपय् स्वयेगु त्वःताः चौकीदारया रुपय् स्वयेगु यानाच्वंगु दु। भारत व चीनंनेपाःयात आरोप बीगु याः, नेपाःया भूमि जिमिगु देश विरुद्ध प्रयोग जुल धकाः। अझ भारत ला भारतया फौज नेपाःया भूमिइ परेड म्हितका थः विरुद्ध न्ह्यानाच्वंगु गतिविधि नियन्त्रण यायेमाल धकाः दबाव बियाच्वंगु दु। चीनं धयाच्वंगु दु, 'मानवअधिकार व स्वतन्त्रताया नामं चीन विरुद्ध गतिविधि न्ह्याकाः टेन्सन बियाच्वंगु दु।' भारत व चीन निगुलिं देशं सुरक्षा खर्च धकाः विशेष बजेट फ्यानाः नेपाःया भूमिइ जुइगु गतिविधिइ कडा निगरानी तयाच्वंगु दु। भारत व चीनया राजनीतिक दृष्टिकोणयात विश्लेषण याना स्वल धाःसा भारतया नीति नकारात्मक खने दइ। भारतं नेपाःयात थःगु ल्हातय् तयेगु लागि राजनीतिक गतिविधि न्ह्याकाच्वनीसा चीन नेपाःयात न्ह्याबलें स्वतन्त्र व अखण्डता बचय् यानातयेमाः धइगु पक्षय् खने दु थें च्वं ।

देश स्यना वनाच्वंगु ला विदेशी शक्तियात राजनीतिक चलखेल यायेगु मौका थनया असक्षम व भ्रष्ट नेतातय्सं बियाच्वंगुलिं खः। भ्रष्ट व असक्षम नेतातय्सं थःगु देशया प्राकृतिक स्रोत वा साधनयात थःगु देशया हितया लागि उपयोग मयासे विदेशीयात बियाच्वंगुलिं खः ।

More Stories Like this