राष्ट्रपति शासनया तयारी

बाधक जूगुलिं अनमिन लित छ्वयेगु ग्वसाः /सेनायात प्रमं हे सक्रिय यानातःगु?

येँ (सन्ध्या टाइम्स)/नेपालय् शान्ति प्रक्रिया ताःलाकेत वयाच्वंगु अनमिनयात लित छ्वयेगु लागिं नेपाली सेना थः हे सक्रिय जुयाच्वंगु व उकियात प्रधानमन्त्रीं समेत साथ बियाच्वंगुया मू कारण अनमिन लिहां वनेखतं हे देशय् राष्ट्रपति शासन लागू यायेत खः धकाः छगू विज्ञ सूत्रं धाःगु दु ।

सूत्रया कथं थौंकन्हय् अनमिन लित छ्वयेत जुयाच्वंगु थ्व कुतः फुक्क हे राष्ट्रपतियात सक्रिय यानाः शासन लःल्हायेत खः। देशय् राष्ट्रपति शासन लागू यायेगु खःसा भारतया ग्वाहालि मदयेकं मगाः। थौंकन्हय् माओवादी सेना नं गथे खः अथे हे दनिगु कारणं राष्ट्रपति शासन लागू यायेत भारतया नैतिक समर्थन जक दयां मगाः, सैन्य समर्थन नं आवश्यक जुइफु। तर नेपालय् अनमिन च्वनाच्वंत्तले भारतं थःगु सेना न्ह्यःने तयाः नेपाःयात ख्याच्वः बीगु मिले मजू। उमिं थ्व ज्याया लागिं दकलय् न्हापां अनमिन निं लिहां वनेमाः धइगु बिचाः भारत व सेनाया दु। थ्वहे ग्रायण्ड डिजायन कथं आः अनमिनया म्याद थपे मयायेगु रणनीति दयेकाच्वंगु खँ सूत्रं धाःगु दु ।

अनमिनया म्याद थ्वहे भाद्रया अन्तिमय् क्वचायेत्यंगु दु।आः थुकिया म्याद थपे मयाःसां जिउ धकाः छुं न्हि न्ह्यवंनिसें नेपाली सेनाया प्रधान सेनापति थः हे लगे जुयाच्वंगु खः। प्रधानसेनापति थःहे सक्रिय जुयाः यानाच्वंगु उगु ज्यायात प्रधानमन्त्री माधव नेपालया नं समर्थन दु धइगु खँ आः वयाः पुष्टि जूगु दु। अनमिनया म्याद बारे सहलह यायेत प्रधानमन्त्री नेपालं थौं थीथी दलया नेतातय्त सःतादीगु दु। तर सूत्रया कथं थौंया बैठकय् वय्कलं उपिं हे जक नेतातय्त सःतादीगु गुमित प्रधानसेनापति गुरुङं उकन्हु थः हे वनाः नापलाये धुंकूगु खः। उकिं अनमिन लित छ्वयाः न्हूगु कासा म्हितेगु ज्याय् लिउने च्वनाः प्रधानमन्त्री माधव नेपाल थः हे सक्रिय जुयाच्वंगु खँ थुकिं प्रस्ट हे सीदुगु दावी सूत्रं याःगु दु ।

न्हूम्ह प्रधानमन्त्री ल्ययेगु लागिं न्याक्वःगु चुनाव नं विफल जुसेंलि असोजं खुक्वःगु चुनाव यायेत्यंगु दु। तर थ्व खुगूगु चरणं नं प्रधानमन्त्री धाःसा ल्यये फइ मखु। वयां लिपा थ्व असफलतायात हे राष्ट्रपति शासन लागू यायेमाःगुया कारण कथं न्ह्यःने हइगु दावी नं सूत्रं याःगु दु ।