जुजु दुहां वइ धकाः लुखा चीजाः

जगमाया शाही, १०० दँ

जिमि बाज्यां मुलय् तयाः कनातःगु बाखं
न्ह्यब्वःम्ह: सुनिता मानन्धर

जिगु छेँ येँया नाय्पाच्व त्वालय् खः। बाया खुम्ह मस्त मध्ये जि दकलय् तःधिकःम्ह खः। तःभुखाय् ब्वःबलय् जि प्वाथय् दु। उबलय् वटुइ वनाः कः कयाः छेँय् थ्यनाः भचा जायेवं भुखाय् ब्वल। तलय् च्वंपिं मस्त छम्हेसित बुयाः छम्हेसित लुकुंछिनाः अजिं क्वत हल। जिं नं कुहां वया। ककाया म्ह्याय्पिंत छेँनं कुतुं वःगु अप्पां लानाः कपाः तज्यात। नापसं छेँय् जा नयाच्वंपिं निम्ह दाजुकिजा छें ल्हानाः सित। बँ चिरिचिरि बाःगु स्वये हे ग्यानापुसे च्वं। पिनेसं गुन्द्रु मियाः न्हाय्पं कुलाच्वंम्ह छम्ह जमिनय् दुहां वनाः अन हे सित। छेँ ला यक्व हे दुन तर जिमि छेँ भ्वरि जक खात। सरकारं छेँ दुपिंत ध्यबा नं बिल। भुखाय् ब्वःबलय् छेँ हे चाःचाःहिउ थें च्वं। भुखाय् ब्वयेधुंकाः सकलें लुखा क्वय् धलिं तयाः छ्यंगू तयाः च्वन। तर अन नं ग्यानापुसे च्वंगुलिं सकलें क्यबय् च्वं वन। थःगु ज्यानया तकं माया मारे यायेधुंकूपिं क्यब थुवाःतसें क्यबया तरकारी दक्व त्वःता बिल। तरकारी माःपिंत माःकथं कयाः नं नल। भुखाय् ब्वयाः निन्हु स्वन्हु तकं खसु वःगु छुं हे यचुक खने मदु। छचालं कपाय् थें फुरर हाया वःगु बँय् पलाः छी हे ख्वाउँसे च्वं। उबलय् हे सर्गः छगुलिं तपुइक क्वःबुँइचा नं ब्वया वल। सिमा सिमा पतिकं जूवन। सिमाय् जायक क्वःबुँइचा च्वंगुलिं इमित जाः तयाः लाना काल। लिपा व हे क्वःबुँइचित मी हल। सकसिनं न्यानाः नल ।

जि मचांनिसें थीथी कथंया कासा ला म्हिते मनं। जिमि छेँय् दुरु म्येय् प्यम्ह लहिनातःगु दु। प्यम्ह मध्ये निम्ह दुरु म्येय् सदां जिं पचली ख्यलय् जः वनेगु। अन छचालं ख्यःया ख्यः। म्येय् त्वःताः सीम्ह थुनेगु चिहानय् छ्यं दिकाः द्यनाच्वनेगु। मखुसा अन हे ख्यलय् तुं च्वं वनेगु। म्येय्यात घाँय् नकेत घाँय् नं लया हयेमाः। न्हापा बागमती पारी वनेगु ताँ मदु। सानेपा छगुलिं ख्यः व डाँडा जक। छखा निखा जक छेँ दु। जिपिं पासापिं सकलें जानाः खुसि पारी (सानेपापाखे) वनाः थःपिंसं ज्वने फक्व घाँय् ज्वना वयेगु। सकसिनं पर्सि सिनाः घाँय् ब्यकुं च्यानाः ज्वना वये नं तसकं थाकु। अय्सां थम्हं ज्वने फक्व घाँय् ज्वनाः पासापिनि ल्हाः छपाः छपाः मत्वःतुसे खुसि छिना वयेगु। गनं गनं ला तुना नं वनेयः। अय्सां लः यचुसे च्वं। क्वथ्यंक खनेदुगु ल्वहं स्वस्वं पलाः छिना वयेगु। बाम्ह बाम्ह तक दुंसां छतिं ग्याः धाःसा मजू ।

न्हापा सितापाइलां दुरु म्येय् हइगु। अबलय् म्येय् छम्हेसिया न्यय्तका। सितापाइलाय् च्वंपिं बर्मूतसें म्येय् मी हइ। गबलें गबलें ख्वपं नं म्येय् हः। म्येय्या दुरु न्ह्यायेगु ज्या नं जिगु हे। दुरु न्ह्याना कथं क्वाःक्वाः बामना तक दुरु नं त्वनेफु। दुरु न्ह्यानाः उखेंथुखें दुरु बिउ वनेगु। बामना दुरुया खुगः ध्यबा धाःसां काः मदु। दुरु काइपिंसं डिग्री तयाः दुरुइ लः दु कि मदु धकाः स्वइ। गुलिसिनं पतिं दुछ्वया स्वइ। दुरु बिउ वनेबलय् हलुवाइ पसलय् जूसा गुँदपाक व पोस्तिकं बिया हइ। इमिसं बिउगु जक नयेवं जा हे नयेम्वाः ।

जिं मचाबलय् तपाः लं पुनेगु। उबलय् सुं बाह्राः तल कि त्वालय् च्वंपिं नापं घानाः बाह्राः तयेगु चलन। जि नापं त्वाःया केहेँ छम्ह नं बाह्राः तःगु। बाह्राः च्वने धाल कि तसकं न्ह्यइपुसे च्वं। न्हियान्हिथं छुस्यामुस्या नकः वइगु। पासापिं ग्वाःग्वाः म्हितः वइगु। प्याखं हुलीपिं नं उतिकं दु। उबलय् बाह्राः क्वथाय् वःपिं निम्ह पासापिं म्हितुम्हितुं सँ पुपुं ल्वाःगु जितः थौतलें लुमं। जि ब्याहा जुइवं पर्सि सिना। दकलय् न्हापां पर्सि सिनां पिहां वइगु इलय् जितः लँय् खिचां न्यात। व खिचां न्हापा नं छम्हेसित न्यानाः सीगु जुयाच्वन। खिचां न्यायेवं जितः खिचापुखुली वासः तयेके यंकल। खिचाया वाया बांसि खुप्वाः दुथाय् हाकुगु चिचीग्वःगु खुगः ल्वहंचा तिका हल। विष दतलें ल्वहंचा लिहां मवः। लिपा अथें कुतुंवल। उबलय् वासः याकेत ध्यबा म्वाः। सितिकं वासः याका बी ।

जिमि छेँय् न्हापांनिसें रंग दयेकाः रंग तयेगु ज्या। दरवारय् रंग तये माःसां जिपिं हे वनेगु। न्हापा सिंगदरवार दुने कारखाना छगू नं बियातःगु। न्हिछि ज्या यात कि च्यान्छःदां ज्याला बी। रंग दयेकेत तसकं कुतः यायेमाः। धौ भ्यगतय् रंग फीत चछि हे पिया च्वनेमाः। माय् थें सलांचुं नीमाः। जुजुया राज्याभिषेकया इलय् तकं मोटरय् रंग तया ।

न्हापा सिंगदरवारया न्ह्यःने छचालं धान गोदाम धाइ। अन वा पिउ वनी। वा पिउपिंत जुजुं (श्री ३ सरकार) ध्यबा इनाः का धकाः छप्वःचा ध्यबा बिया थकी। उकियात सकसिनं भागं थछि इना काइ। जिं नं बरोबर ध्यबा काये नं। न्हापा जुजुपिं खनाः तसकं याः। सल गयाः बग्गीइ च्वनाः चाःहिउ जुइ। जुजुपिं क्वछुइ मजिउ धाइ। लुखा तजाः जुलकि जुजुपिं दुहां वइ धकाः लुखा नं चिजाः यानाः दयेकी। बांलाःपिं मिस्त खन कि इमिसं यंकेयः। न्हूघलय् आलुवः छुनाच्वंम्ह छम्ह मिसायात जुजुं यंकाः लिपा पित हे मबिउ। वयात त्वाःयापिं सकसिनं आलुवः महारानी धायेगु यात। उबलय् जुजुपिं लय्ताल कि बक्सिस बीगु चलन। इमिसं म्हुतुं न्ववात कि गाःगु। जिमि ककापिंसं रंग तःगु बांलाः धकाः उगु इलय् प्वरत्वाः पाखा छगुलिं छिमिगु जुल धकाः बिउगु खःसां ककापिंसं अन मयः धकाः मकाः। जिमित नं टेकुया रोडया जग्गा का धाःगु, उगु इलय् टेकु सुनसान ग्यानापुसे च्वं। उकिं मकाः। उबलय् शुक्रराज झुण्डे याःगुलिं अन सिखः छन्छन् संकाः सीम्ह वयेयः धाइ। जिमि त्वाःया छम्हेसित शुक्रराजं लिना हःगु धकाः विरामी जुयाः सित। सुनानं द्वंकल धाःसा वया लिउलिउ मनूत म्वःम्वः हायेकाः वयात भचाखुसि यंकाः प्वःतसें पालाः स्याइ। भोटेबहालय् न्हापा पंब्व जक दु। अन नं छम्हेसित दोषी धकाः यखाःगु खः। वं गुलि मखु धालं नं पत्या मयाः। यखानाः स्यायेधुंकाः मखुम्ह मनू स्यात धकाः बय्बय् जुल। उबलय् जिं नं स्वः वनागु ।

न्हापा थन मलः नं यक्व हे जू। पाजुभतपिंथाय् मलः जुयाः म्येय् छम्ह सित। छक्वः मलः जुयाः छेँ हे चिरबाः।
न्हापा ला न्याये मी याइपिं ब्यापारीत नं उलि मदु। ला छकः न्यायेत भिंद्यःयाथाय् वयेमाः। लप्तेय् ला प्वःचिनाः बी। ल्हातय् लप्ते खन कि ला हःगु धकाः सीकाः इमां दाया यंकेयः। उबलय् मत नं म्वाः। तिमिलाया जलं हे गाः। गुलिसिनं तुकि मत च्याकी। जिमि दाःमत च्याकेगु।
म्हिगःया ई लुकंकेबलय् थौं म्हगसय् म्हं थें च्वं। तर न्ह्याथे हे जूसां थौंतले जि याउँक हे च्वंच्वना, जीवन न्ह्यइपुसे हे च्वं ।

More Stories Like this