सेनां अनमिन बहिष्कार यात
थौंया जेएमसीसी बैठक स्थगित / अनमिन विरुद्ध सेना थःहे सक्रिय
येँ (सन्ध्या टाइम्स)/माओवादी सेनाया समायोजन यायेत राष्ट्र संघीय मिशन अनमिनया अध्यक्षताय् नेपाली सेना व माओवादी सेना दुथ्याकाः स्वनातःगु संयुक्त अनुगमन समन्वय समिति (जेएमसीसी) या थौं च्वनेमाःगु बैठक स्थगित जूगु दु। थौंया बैठकय् समितिया छगू पक्ष नेपाली सेनां ब्वति मकायेगु धाःगुलिं बैठक स्थगित यायेमाःगु खँ अनमिन ज्याकुथिं धाःगु दु ।
अनमिन प्रमुख लरेन लेनग्रेनया सूचना प्रवक्ता कसमस विश्वकर्मां समितिया छगू पक्ष वये मखु धइगु जानकारी प्राप्त जूगुलिं थौंया बैठक स्थगित यानागु जानकारी 'सन्ध्या टाइम्स' यात बियादिल ।
उखे नेपाली सेनां जेएमसीसीया बैठकय् ब्वति काये मखु धाःगु कारणं आः नेपाली सेना व अनमिन हे 'आमने सामने' जू वःगु टिप्पणी थन याना हःगु दु। अनमिनया छुं ज्या प्रति चित्त बुझे मजूगु खःसा उकिया जानकारी सरकार वा राजनीतिक पार्टीतय् माध्यमं अनमिनया थाय् सेना थः हे सक्रिय जुयाः न्ह्यःने वःगुलिं थुकिं शान्ति सम्झौताया गम्भीर उल्लंघन जूवंगु खँ नं धयाहःगु दु।
विज्ञ सूत्रं धाः कथं थौं वयाः माओवादी सेनाया अनुगमन यायेत जेएमसीसीया आवश्यकता मदु धायेगुया अर्थ सरकार व माओवादी दथुइ जूगु वृहत् शान्ति सम्झौता नं आवश्यक मदु धाःगु जुइ। 'अले उगु शान्ति सम्झौता आवश्यक मदु धाःगुया अर्थ ला माओवादीयात हानं जंगलय् हे लिहां हुँ धाःगु जुइ' सूत्रं धाल ।
नेपाली सेनापाखें छुं ई न्ह्यः सैनिक भर्ना कायेगु धकाः न्ह्याकूगु ज्यायात अनमिनं शान्ति सम्झौता विपरित खः धकाः टिप्पणी यायेवं नेपाली सेनां अनमिनं नं माओवादीया पँ लित धकाः आलोचना शुरु याना हःगु खः। थ्वयां लिपा सेनां थ्वहे भदौया अन्तिम वालय् क्वचायेत्यंगु अनमिनया म्याद हानं थपे याके मते धकाः थःपिं हे सक्रिय जुयाः थीथी पार्टी दुने लबिङ्ग शुरु याःगु खः। अनमिनया म्याद थपे यायेगु वा मयायेगु धइगु खँ राजनीतिक पार्टीतय् सहमतिया लिधंसाय् सरकारं जक निर्णय याये फइ। यदि राजनीतिक पार्टीतय्सं अनमिनया म्याद थपे यायेगु मखु धकाः निर्णय यात धाःसा अनमिन तुरुन्त हे लिहां वनीगु खँ सूत्रं धाःगु दु। सूत्रया कथं 'अनमिन वास्तवय् नेपाः त्वःताः लिहां वनेत हथाय् हे चायाच्वंगु दु ।'
मेखे छगू पुचलं धाःसा न्याक्वः तक चुनाव यानाः नं सरकार दयेके मफुसेंलि जनताया ध्यान मेथाय् छ्वयेत सेनायात अनमिन विरुद्ध क्वकया हःगु खनेदु धकाः नं विश्लेषण यानाहःगु दु ।
