सहमतिया निंतिं एमालें न्ह्याकूगु पहल

न्यागू चरण तक चुनाव यानाः नं प्रधानमन्त्री ल्यये मफुसेंलि एमालें आः राष्ट्रिय सहमतिया सरकार गठन याये फयेमा धकाः न्हूगु कथं पहल शुरु याःगु दु। थःपिंसं धयाच्वनागु सहमतिया सरकार गज्याःगु जुइमाः धइगु बारे लिखित रुपं आधारपत्र हे तयार यानाः थीथी पार्टीतय्त लःल्हाना बिसें एमालें थ्व पहल शुरु याःगु खः। थुकियात सार्थक यायेगु लागिं एमालें म्हिगःनिसें राजनीतिक पार्टीतलिसे सहलह नं शुरु याःगु दु ।

देशय् राष्ट्रिय सहमतिया सरकार गठन याये मफइगु खःसा प्रधानमन्त्री ल्ययेगु ज्याय् थःपिं सहभागी जुइ मखु धकाः एमाले तटस्थ च्वनेगु यानाच्वंगु दु। एमालेया तटस्थताया कारणं यानाः हे प्रधानमन्त्री ल्यये मफयाच्वंगु खँयात नं थन नकारे याये मछिं। तर एमालें सुयातं समर्थन यानाः सरकार गठन हे यात धाःसां नं उगु सरकार संविधान निर्माण यायेत धाःसा ताःलाइगु सम्भावना मदु धइगु तर्क तसें एमाले तटस्थ च्वंगु खः। तर चुनावय् उम्मेदवारी बियाच्वंगु पार्टीतय्सं एमालेया तटस्थताया वावजूद नं प्रधानमन्त्री ल्यये धकाः न्याक्वः तक याःगु कुतः विफल जुइवं आः छु यायेगु धकाः हानं न्हूगु बिचाः यायेत बाध्य जूगु दु। थ्व बाध्यताया दथुइ एमालें राष्ट्रिय सहमतिया सरकार दयेकेत थ्व पहल शुरु याःगु दु। थुकियात लसकुस यायेमाः। राष्ट्रिय सहमतिया लागिं सुनां कि सुनां पहल ला याये हे माः। एमालें थ्व भाला काःगु दु, उकिं मेमेगु पार्टीतय्सं नं एमालेया पहलय् साथ बियाः राष्ट्रिय सहमति कायम यायेत बः बीमाःगु आवश्यकता दु। थ्व समस्यायात ताःहाकः याना तयेगु आः छुं नं कथं पाय्छि मखयेधुंकूगु खँयात दलतय्सं वाःचायेकेमाः ।

More Stories Like this