सिलुया मेला

लव कर्माचार्य

दछिया छकः थ्यंकः वइगु गथांमुगः चखः धुनेवं दिल्लागा आमैया सातिकुन्हु गुंलाथ्व पारुंनिसें न्ह्याना च्वनीगु छगू तसकं थाकुगु मेला खः सिलु तीर्थ मेला। आः ला सिलु वने थाकु मजू। मोटरं न्ह्याथाय् नं थ्यं ।

आः थें न्हापा मोटर, बस, मोटरसाइकल गन यंके जिउ धकाः? साइकल नापं गयाः वने मजिउगु, न्यासि वने नापं ज्यान पानाः वनेमाःगु उगु ई। याकः बाकः वने मजिउ, पुचः, फौज, समूह मुनाः वनेमाःगु अझ ला द्यनेगु लासा फांगा व न्ययेत गा, नयेत नसा तकं ज्वना वनेमाःगु थाय् जक मखु, छखा हे छेँया निम्हतिपू नापं वने मजिउ, वन धाःसा कलाः भाःत बाये माली धइगु अन्धविश्वास दुगु अबलय्या ई। अबलय् स्वयां आः सिलु वनेगु धइगु तसकं अःपुइधुंकल ।

परापूर्व कालय् ख्वप नगर बाय् यल नगर बाय् येँ नगर मध्ये गुगु खः मसिउ छखा छेँया किसान परिवारय् मिजंम्ह किसानया सिलु वनेत पासा माः जुयाच्वंगु। अझ ज्योतिष क्यनाः वनेगु तातुना च्वंबलय् मिसाम्ह किसानी पासा म्वायेक थःहे निम्हतिपू वंसा पासा द हे दत नि धाल। निम्हतिपू वने जिउ मजिउ ज्योतिष क्यंबलय् वने मजिउ। भाःत छखे वँवं कलाः छुटे जुयाच्वने माली धाल। तर ज्योतिषं धायेक धायेकं कलाः नापं लिउ लिउ वंबलय् लँय् हे तंगु पुलांगु बाखं दु ।

आः थ्व गुंला क्यन कि सिलु म्येया राग धुन नं गुंलाज्वःछि थ्वयाच्वनी। क्वय्छि क्वय्छि पाक्क बासं च्वनाः वनेमाःगु सिलु मेलाया बासत थथे दु - थः द्यनाः दनावनागु थासं धमाथुलि, न्यागःमणि, रानीपौवा, ओखरपौवा, जाइफ पौवा, नकवा थामि, धुंचे, लकडी विना, भिल पाक्व, धैबुतँ, चन्दनबारीं सिलु ।

नेपाःया मध्यमाञ्चल क्षेत्रया बागमती अञ्चल रसुवा जिल्लाया स्वनिगलं तप्यंक उत्तर दिशाय् लाःगु समुद्र सतहं २,००० फीट च्वय् लाःगु १०० कि.मी. दुगु ११ कोष तापाःगु च्वापुगुँया क्वय् लाःगु पवित्र कुण्ड हे सिलु कुण्ड खः। थ्वयात गोसाईंकुण्ड नं धाः। स्वन्ति नखतय् लःल्हाना कायेगु तःसि बांलूगु कुण्ड सिथं सिथं चिजायाः दथुइ थ्यंलिसें सलाःपाः थें वनाः तजाः जुयाच्वंगु थ्व सिलु पुखूया लखय् मेलाय् वःपिं मनूतय्सं अने अनेगु किपात व आकृति खनी धाइगु विश्वास दु। गुलिसितं अय्लाः कायेगु बाता, गुलिसितं त्रिशुल�दबदब, गुलिसितं फकीर आदि आकृति क्यनी धइगु धापू दु ।

थ्व पुखुली सः पिहां वयेक हाले मजिउ, ताउत च्वनाच्वने मजिउ, तुरुन्त खसुं त्वपुयाः याना बी यः धइगु नं धापू दु। निभाः त्वःसां भचा निभाः जः वइगु व तुरुन्त सुपाचं खिउँसे च्वना वइगु थनया मौसम खः ।

थ्व सिलु वनेगु धइगु तू मतू नं दु धाइ। तकुस्वांया बासं कपाः स्यानाः अन हे छेँय् लिमथ्यंक सीफु धइगु नं धापू दु। उकिं सिलु वनेगु धइगु सी वनेगु थें हे थाकुगु मेला खः धाइ। उकिसनं सिक्क चिकुगु थाय् जुयाः लँय् वँवं हे लेक लगे जुयाः स्वांस्वां वयाः मनू क्वःदलेफु। उकिसनं वा वःगु मौसम जुल धाःसा वनाच्वंगु लँ हे चलः वनाः बेपत्ता जुइफु। जा थूसा कचिकचि जुयाः बुइगु मखु । उकिं सतुचुं, चप्पाचुं नं नापं हे ज्वना वनेमाः ।

थ्वहे सिलुया लः स्वधाः हायाः न्ह्यानाच्वंगुलिं हे अनं पिहां वइगु खुसिया नां हे त्रिशुली धयातःगु खः। सिलु कुण्डया जःखः मेमेगु नं कुण्डत दु। उगु लागाय् सछि व च्यागू कुण्ड दु धाइ। अय्नं छुं छुं कुण्डत जक नां जाः। गथे कि गणेश कुण्ड, सरस्वती कुण्ड, सूर्य कुण्ड, ज्ञान कुण्ड, भैरव कुण्ड आदि। उकी मध्ये दकलय् ग्यानापुगु ज्ञान पुखू कुण्ड खः। थ्व कुण्डया न्ह्यःने वन कि मनूयात हे दुकायेयः धाइ। भैरव कुण्डया बारे नं अज्याःगु हे विश्वास दु ।

परापूर्व कालय् महाद्यवं समुद्र मन्थन यानाः पिहां वःगु कालकुट विष मल्ह्वसे व घुर्का नं मछ्वसे कथुइ थाकाः डाहा जुयाः अन वने थन वने मदयाच्वंगु इलय् थ्वहे सिलु कुण्डया ख्वाउँगु लखय् ग्वारातू वःगु धइगु पौराणिक बाखं दु। लिपा महाद्यः मामां वःपिं ब्रम्हा, विष्णु, इन्द्र द्यःपिंसं महाद्यः खने मदयेवं बल्ल बल्ल शिव लूगु थाय् धाःगुलिं चीहाकलं सिलु जूवंगु खः धाइपिं नं दु ।

थ्व सिलु मेला वंगु तछलाथ्वया दशहरा, निर्जला एकादशी, थ्व गुंलाथ्वया कन्हय् पुत्रदा एकादशी व गुंपुन्हि कुन्हु तक न्ह्यानाच्वनी ।

More Stories Like this