जेष्ठ १८ गते नेपालमण्डल बन्द

नेवाः स्वायत्त राज्य मंकाः संघर्ष समितिया आह्वानय् थ्वहे वइगु जेष्ठ १८गते सोमवाः हाकूगु न्हि खुन्हु नेपालमण्डल बन्द यायेगु घोषणा याःगु दु ।

सोमवाः जूगु मंकाः सघर्ष समितिया मुज्याय् न्हूगु संविधानय् नेवाः बाहुल्य दुगु लागा निर्धारण याना नेवाः स्वयत्त राज्य दुथ्याकेमाःगु नापं नेवाःत नापं दक्वं जनजातितय्त थःगु आदिभूमिइ अग्राधिकार बीमाःगु माग यासें नेपाल मण्डल बन्द यायेत्यंगु खः ।

मंकाः संर्घष समितिं लिच्छविकालय् येँय्या स्वंगू जिल्लयात केन्द्र देयेकाः काभ्रेपलान्चोक, मकवानपुर, नुवाकोट, सिन्त्रुपाल्चोक, दोलखा, धादिङ, रामेछाप, सिन्धुली, रसुवा व सोलुखुम्बु यानाः झिंस्वंगू जिल्लायात नेपालमण्डल लागा धकाः समितिया अवधारण पौलय् न्ह्यथंनातःगु दु ।

लुमंकेबहजू, सर्वोच्च अदालतपाखें २०५६ जेष्ठ १८ गते नेपालभाषा व मैथली भाय् स्थानीय तहलय् छ्यलाबुला यायेमदु धकाः निषेधात्मक आदेश ब्यूगु खः । अनंनिसें नेवाः लगायत जनजातितय्सं थ्व न्हियात हाकूगु न्हि कथं हनावयाच्वंगु दु ।

अथेहे मुज्यां समितिया नायःया पाःब्व ह्यूगु दु । समितिया नायः पदय् नेवाः मुक्ति मोर्चाया नायः हितमान शाक्य च्वनादीगु दु । वयेकःयात निर्वतमान नायः दिलबहादुर श्रेष्ठं पाः ब्वः लःल्हानादीगु खः । समितिया अवधारणा कथं स्वलाःया छकः दुजः संगठनतय्सं पालंपाः नेतृत्व याइगु प्रावधान दु ।

मुज्यां नेपाल मण्डल बन्द सफल यायेत छगू टास्क फोस्र नं निर्माण याःगु दु । नापं वैशाष ११ गते विषेशज्ञत नाप सहलह यायेगु व वैशाष १९ गते थीथी राजनीतिक दलत नाप सहलह याइगु ज्याझ्वः क्वःछीगु दु ।

More Stories Like this