अग्नी एअरया दुःखद् विमान दुर्घटना

देय्या राजनीतिइ वयाच्वंगु गन्जागोलया दथुइ म्हिगः छगू दुःखद् घटना जुल, अग्नी एअरया विमान दुर्घटना। खतुं राजनीतिलिसे छुं स्वापू दुगु विषय थ्व मखु, तर थ्व दुर्घटनाया समाचारं नेपाःमितय्त अझ दुःखित धाःसा अवश्य याना बिउगु दु। उकी लानाः स्वम्ह चालक दल नापं झिंछम्ह यात्रु यानाः मुक्कं झिंप्यम्हेसिया ज्यान वंगु दु। जहाज येँनं वंगु खःसां दुर्घटना धाःसा मकवानपुरया शिखरापुर धाःगु थासय् जूवन ।

दुर्घटनाया वास्तविक कारण छु खः, उकिया तथ्य खँ ला लिपा वइ हे तिनि जुइ, तर म्हिगः सुथय् मदिक्क वा वयाच्वंगु इलय् लुक्ला थेंज्याःगु हिमाली लागाय् उगु विमान छाय् ब्वयेकल थुकी धाःसा वहस जुयाच्वंगु खनेदु। चालक दलया लापर्वाही, यात्रुतय् दवाव, सही सुचंया अभाव वा अस्वस्थ प्रतिस्पर्धाया लिच्वः? सामान्यतया अथे वा वयाच्वंगु इलय् मेमेगु हवाई उडान तकं प्रभावित जुयाच्वंगु खबर वयाच्वंगु दु। तर लुक्ला थेंज्याःगु थासय् विमान ब्वयेकूगु व अन थ्यंकाः विमान दिके मछिं धायेवं लिहां वःगु खँ स्वयेबलय् उगु उडान अस्वाभाविक रुपं जूगु संकेत खनेदु। यदि उडान थुकथं हे जूगु खःसा नेपाःया निजी क्षेत्रया हवाई सेवा व उमि दथुइ जुयाच्वंगु प्रतिस्पर्धायात पुनर्मूंल्यांकन यानाः स्वयेमाःगु जुया बी ।

नेपाः छगू आपालं हिमाल व पहाडं जाःगु देय् जूगु कारणं हवाई सेवा थनया छगू महत्वपूर्ण विषय जुयाच्वंगु खँय् विवाद मदु। उकियात ध्यानय् तयाः थन आपालं निजी हवाई सेवात नं खुले जुयाच्वंगु दु गुकियात लसकुस हे यायेमाः। तर अप्वः सेवा खुले जू थें सुरक्षा नं अप्वः बीमाः धइगु खँ थज्याःगु दुर्घटनातय्सं पुष्टि यानाच्वंगु दु ।

More Stories Like this