अग्नी एअरया विमान दुर्घटना खुम्ह विदेशी नापं १४ म्ह सित
मकवानपुरया शिखरापुरय् दुर्घटना / विमानय् दुपिं फुक्कं यात्रु सित / खराब मौसमं दुर्घटना जूगु अनुमान
येँ (सन्ध्या टाइम्स)/चालक दल नापं झिप्यम्ह यात्रु ज्वनावंगु अग्नी एअरया डोनियर क्राफ्ट विमान मकवानपुर जिल्लाया शिखरापुर गाविसय् थौं सुथय् दुर्घटना उकी च्वना वंपिं फुक्कं सीगु दु ।
स्थानीय मनूतय्सं दुर्घटनाय् लाःपिं झिंप्यम्हं हे सीगु खँ धाःगु दु। दुर्घटनास्थलय् ला कुचाकुचा जुयाच्वंगु अवस्था लानाच्वंगु खँ नं स्थानीय मनूतय्सं धाःगु दु ।
येँनं सोलुखुम्बुया लुक्लाया निंतिं ब्वःगु १९ सिटया उगु विमान मौसम खराबीया कारणं लुक्लाय् अवतरण याये मफयाः येँय् हे लिहां वयाच्वंगु इलय् दुर्घटना जूगु खः।
मकवानपुरया शिखरापुर गाविस वडा नं. २ या स्थानीय ठाकुर प्राथमिक विद्यालय लिकसं उगु विमान दुर्घटना जूगु खः। दुर्घटना जूगु विमानय् चालक दलया स्वम्ह नापं झिंछम्ह यात्रु दुगु खः। थौं सुथय् साढे ७ बजेपाखे विमान दुर्घटना जूगु खँ स्थानीय मनूतय्सं धाःगु दु। अग्नी एअर अपरेशन कक्षं धाः कथं थौं सुथय् ७.०५ मिनेट उगु विमान येँनं ब्वयावंगु खः ।
विमानया चालक दलया क्याप्टेन लक्की धाइम्ह लक्ष्मण विक्रम शाह खःसा सह चालक सोफिया सिंह व एअर होस्टेज सरहा शेर्पा खः ।
उद्धारया निंतिं मकवानपुरया प्रहरी ज्याकू, फापरबारी व हात्तिसुँढे प्रहरी परिचालन यायेधुंकूगु दुसां थौं न्हिनय् तक उपिं घटनास्थलय् थ्यंके मफुनि। उगु थाय् हेटौंडा नगरपालिकां ४२ किलोमिटर तापाः ।
उगु विमान दुर्घटनास्थलय् १४ बाई १५ फिट तजाःगु गाः हे दयेकाः न्हासं चू वनाच्वंगु खँ धाःगु दु। विमान न्हासं चुइवं विस्फोट जूगु खः। उगु लागाय् जँ स्वयां च्वय् नं दुगु निगू जक लाश खनेदुगु व बाँकी फुक्क हे कुचाकुचा जुयाच्वंगु खँ धाःगु दु ।
सीपिं यात्रुत
जाजरकोटया चालक लक्की धाइम्ह लक्ष्मण विक्रम शाह, सह चालक सोफिया सिंह, परिचारिका सहरा शेर्पा
यात्रुत:
आर. रिजाल,
पी. हुमागाइँ,
पी. भोट,
के. राई,
पी. शेर्पा,
विदेशीत जिरिमी, काडोसो, एसथिम्स, फोरोन व वाई. ह्यासी
बचे जूपिं
उगु विमान वास्तवय् १४ म्ह यात्रु ज्वनाः ब्वयेमाःगु खः। तर स्वम्ह यात्रुतय्सं टिकट कायेधुंकाः नं विमान धाःसा मगःगु कारणं उपिं बचे जुल। टिकट न्यायेधुंकाः नं विमान मगःपिं यात्रुत एन.एल. शेर्पा, के. राई व छम्ह विदेशी पी. उल्फ खः। थुपिं स्वम्ह धाःसा अन्तिम इलय् वयाः नं विमान मगःगुलिं बचे जुल ।
