गथे चूलाइ शान्ति व स्थिरता?

कृष्ण प्रजापति

देशय् न्हूम्ह प्रधानमन्त्री ल्ययेगु छगू ज्या पूवंकेत हे सदनय् न्याक्वः न्याक्वः तक मतदान जुल तर नं प्रधानमन्त्री धाःसा आः तकं हयेफुगु मदुनि। शान्ति, स्थिरता व अमन कायम यायेगु सरकारया जिम्मेवारी जुइ धाःसां थज्याःगु न्हापांगु चरणया ज्या हे पूवंके मफुगुलिं आः तक नं देशय् अस्थिरता जारी जुयाच्वंगु दु। थ्व झ्वलय् राजनीतिक पार्टीतय्सं क्यनाच्वंगु नौटंकी देशय् सापारु वये न्ह्यःया सायाः साबित जुयाच्वंगु दु। सदनय् थःगु हे बहुमत दयेक दयेकं नं थीथी दवावं प्रधानमन्त्रीं राजीनामा बीगु प्रशंग, प्रधानमन्त्रीया लागिं उम्मेदवारी बीधुंकाः नां लित कायेधुंकूम्ह मनुखं हानं मेकथं थः हे प्रधानमन्त्री जुइत म्हिताच्वंगु तिकडम व तःधंगु पार्टीया नामय् थम्हं धाःथे जूसा जक ठीक मेपिंसं धाःथे जूसा गलत धाइपिं दलतय् फूर्तिं थौं देशय् थ्व सायाःया सिर्जना जुयाच्वंगु खः ।

सरकार गठन जुसांनिसें तच्वःगु विरोधया सामना यानाच्वंम्ह एमाले नेता माधव नेपाल प्रधानमन्त्री पदं राजीनामा लिपा जिम्मेवारीं तापानाच्वंगु दु। सदन चले यायेमाःम्ह संविधानसभा अध्यक्ष सुवास नेम्वाङं बारम्बार राष्ट्रपति व प्रधानमन्त्रीयात नापलानाः कुतः याःसां निकास लुइके मफयाच्वंगुलिं वय्कः नं असफल हे धाःसां पाइ मखु। अले देशया अभिभावक कथं स्थापित संवैधानिक अंगया प्रमुख राष्ट्रपति डा. रामबरण यादवं नं समस्या ताः ई तक अथें लानाः नं छुं निकास बी मफयाच्वंगु ल्याखं राष्ट्रपति नं थ्व मामलाय् असफल जूगु धायेमाः। उकिं थ्व इलय् आः राष्ट्रपतिं थःगु हे शासन लागू यानाः समस्या समाधान यायेमाः धाइपिं नं खने दया वःगु दु। अन्यौलता मदयेमा धकाः हे राष्ट्रपति, उपराष्ट्रपति थेंज्याःगु संवैधानिक अंगया व्यवस्था यानातःगु खः। उकिं थ्व इलय् देशय् न्हूगु सरकारया जिम्मेवारी आः राष्ट्रपतियात बीमाःगु खँ वयाच्वंगु दु। थीथी राजनीतिक पार्टीत खँ मिले मयासे आलताल आलताल यानाच्वनीगु स्थितिइ देशया अस्तित्व ल्यंका तयेत व थीथी समस्या समाधान यायेगु निंतिं सरकार गठनया जिम्मा राष्ट्रपतियात मबिसें मगाःगु अवस्था मवइ नं धाये मफु।
न्हूगु ससदीय चुनाव यायेगु खँ नं संविधानं मबीगु व वर्तमान सदनं नं निकास मबीगु अवस्था जूगुलिं आः राष्ट्रपति सक्रिय जुयाः न्हूगु सरकार दयेकेगु जिम्मेवारी नं थुगु हे सरकारयात बीमाःगु अवस्था वयाच्वंगु खः। थःपिं असक्षम सिद्ध जुइधुंकूगुलिं आः फुक्कं राजनीतिक पार्टीत जानाः राष्ट्रपतियात जिमिसं सरकार गठन याये मफुत अथे जुयाः राष्ट्रपतिं हे स्वयाः सरकार गठन याना बियादिसँ लिखित पौ छ्वयेमाः। देश ताः ई तक सरकारविहीन याना तये मजिउगुलिं दलतय्सं न्हूगु सरकार गठनया लागिं राष्ट्रपतियात हे ग्वाहालि कायेगु उचित जुइफु। मखुसा थन अझ नं अस्थिरता, अशान्ति व आपराधिक घटनात जुया हे च्वनी। अज्याःगु सरकारं बरु सदनय् स्वलाया दुने थःपिनि बहुमत दु धकाः क्यनेगु वातावरण दयेमाः। अथे मयासे खालि मस्त म्हिते थें याना चुनाव यायेगु, भत्ता नयेगु, सदन न्ह्याकेगु भत्ता नयेगु व मतदान यायेगु, भत्ता नयेगु हे ज्या जक जुयाच्वन धाःसा सदनया अस्तित्वय् नं खतरा वयेफु ।

एमाले छगू दलया सत्तालोलुप प्रवृत्तिं हे थौं देशय् ताः ई तक सरकार नीस्वने मफयाः अन्यौलया स्थिति कायम जुयाच्वंगु खः। यदि एमालें कांग्रेसता हे जूसां मतदान यायेगु उत्साह क्यंगु खत धाःसा थःपिं प्रखर प्रतिपक्षीइ च्वनाः नं सरकारयात नियन्त्रण याये फइगु स्थिति दु। वा सरकार गठनया लागिं कांग्रेसयात समर्थन बिउगुया ल्याखं थन न्हूगु सरकारय् थःपिनि भाग नं सुरक्षित यायेगु ह्वःताः चूलायेफु। तर थन ला निश्चित अडानय् च्वनाच्वंगु राज नीतिक पार्टीतय्त तकं मछिंक थःपिनि बिचाः अस्थिर यायेगु ज्याय् एमालें थीथी कथं भूमिका म्हिताच्वंगु दु। तप्यंक हे प्रचण्डयात मत बिउगु ल्याखं नेमकिपा हाकनं छक्वः चर्चाय् वःगु दु। वयागु मत ला एमालेया कारणं सितिं वंगु हे जुल। तर प्रचण्डयात मत बिउगु ल्याखं न्हापा राष्ट्रपति चुनावय् गथे सुटकेसया खँ वःगु खः, आः नं माओवादीपाखें स्वंगू करोड छ्वयाहःगु हुइनाभुइना जुयाच्वंगु दु। थ्व खँयात नेमकिपां खण्डन नं याःगु मदुनि।
प्रचण्ड व रामचन्द्र तःक्वःमछि हे मतदानय् बुइधुंकूगुलिं थः दुइतिहाई मवःगु ल्याखं जक उम्मेदवारी लित कयागु दावी यानाच्वंम्ह झलनाथ खनालं आः थः हे दकलय् प्रधानमन्त्री जुइत योग्यम्ह ब्यक्ति कथं हाकनं छक्वः सुरसार यानाहःगु दु। लोभीत लोभय् न्ह्याब्लें तक्यना हे च्वनी धाये थें थौं थःपिनि पार्टीया आचारसंहिता, सिद्धान्त व धारणा अःखः वनेमाःसां नं प्रधानमन्त्री चूलाकेत देश हे बर्‍हः तयेत नं नेतात तयार दु। बरु थुकिया थासय् देशय् शान्ति सुरक्षा व अमनचयन गथे यानाः कायम यायेगु धइगु खँय् थीथी राजनीतिक शक्तिनाप सहलह यायेगुली राजनीतिक पार्टीतय्सं ई बीमाःगु खनेदु। थन पार्टी सिद्धान्त स्वयां पद तःधंगु तायेकीपिं जुयाः हे बारम्बार पार्टी हे कसचा दलीगु, पार्टीया ह्वीप उल्लंघन जुइगु व अनुपस्थितिया नाटक म्हितीगु ज्या जुयाच्वंगु दु। थ्व नं छगू ल्याखं सापारु वये न्ह्यः वा लिउ न्ह्याइगु
राजनीतिक सायाः खः धाःसां पाइ मखु ।

मुलुकयात सकारात्मक परिवर्तनपाखे न्ह्यज्याकेत हरेक राजनीतिक कार्यकर्ता व नेतात सचेत व संगठित जुयाः उचित निकास मालेमाःगु अवस्था दु। तर राजनेतात हे थौं आलताल आलताल यानाः लांलां ई छ्यायेगु ज्या यानाच्वंगु दु। अझ प्यक्वः न्याक्वः तक सदनय् जूगु चुनाव तकं असफल जुइ धुंकाः ला गुलिं चिचीधंगु राजनीतिक पाटीं तक आः पाः थःपिनिगु जकं खः ला धकाः प्रधानमन्त्री जुइगु म्हगस खंका हयाच्वंगु दु। तर थ्व प्रजातान्त्रिक संस्कार अःखः खँ खः। चीधंगु दलया नेता प्रधानमन्त्री जुइगु परिपाटी विकास जुया वन धाःसा कन्हय् पंचायती संस्कार वा गाउँफर्क अभियान हे निरन्तरता बी थें थः यःम्ह मनूयात प्रधानपंच, जिविस सभापति, प्रधानमन्त्री दयेकेगु गलत परम्परा शुरु जुइफु। अथे जुयाः नं अज्याःगु गलत संस्कार त्वःतेगु निंतिं जूसां झीसं इलय् हे राष्ट्रपतियात जिम्मा बियाः राजनीतिक दलतय्सं थःगु कमजोरीयात चीकेमाःगु खनेदु। कमजोरी दयेक दयेकं फूर्ति याना जुइगु खःसा कन्हय् विदेशीया ल्हाः अझ ताःहाकः जुया वनेफु। थुखेपाखे छक्वः सकसिनं बिचाः याये ।

More Stories Like this