कांग्रेस दुने ब्वलना वःगु स्वंगूगु धार

ऐतिहासिक महाधिवेशनया न्ह्यःने वनाच्वंगु नेपाली कांग्रेसया नेतृत्व कायेगु लागिं स्वंगूगु धारया उदय जूगु दु। दशकौं तक परम्परागत बिचाः व कार्यशैली ज्वनाः न्ह्यानाच्वंगु नेपाली कांग्रेसयात आः पूर्ण रुपं हे नवीकरण याना यंकेगु ताः तयाः थ्व स्वंगूगु धारया उदय जूगु खः। कांग्रेस दुने थ्व धारया गुलि बांलाःगु पकड दु व ला आः थथें धायेफुगु अवस्था मदुनि। अथे खःसां कांग्रेस दुने सदां नं नवीनतम बिचाः न्ह्यःने हयाः पार्टी नेतृत्वयात ईयात ल्वःगु लँपुइ न्ह्याकेगु ज्याय् थ्व धारं विगतय् नं तःधंगु योगदान याःगु खँ थ्व इलय् लुंमेकेगु पाय्छि जुइ। वर्तमान ई कांग्रेसं न्हापांनिसें गुगु सोच ज्वना वःगु खः व स्वयां पूर्ण रुपं फरक ई खः। थज्याःगु ऐतिहासिक घडीयात पुलांगु हे परम्परागत बिचाःया नेतातय्सं नेतृत्व बी फइ मखु। यदि बीगु कुतः यात हे धाःसां उकिं इतिहासयात मखुगु दिशाय् मोडे यायेगु दुस्साहस जूवनेफु। उकिं थ्व न्हूगु युगयात ल्वःगु निकास बीगु खःसा न्हूगु हे सोचयात नेतृत्व बीगु सान्दर्भिक जुइ। न्हूगु नेपाः गणतन्त्र, संघीयता व धर्म निरपेक्षताया एजेण्डा ज्वनाः खडा जुइत्यंगु दु। नेपाली कांग्रेस दुने थुगु एजेण्डाप्रति शुरुंनिसें हे स्पष्ट बिचाः तया वयाच्वंगु पुचः धइगु थ्वहे वर्तमानया 'स्वंगूगु धार' खः। थ्व उपलब्धीत चूलायेधुंकाः उकियात संस्थागत यायेगु जिम्मा नं थ्वहे धारयात बीगु अतिकं आवश्यक नं जू। लिसें स्वयम् कांग्रेसयात नं क्वपुलांगु इतिहासं पित हयाः थौंया नीछगूगु शताव्दीयात ल्वःगु पार्टी दयेकेगु खःसा अन दुने उदय जुया वःगु स्वंगूगु धारयात भावी नेतृत्वया जिम्मा बीगु सकलें कार्यकर्ता व नेतातय् बुद्धिमानी हे जुइ ।

More Stories Like this