जिं सिउ.....व असम्भव

नर्मदेश्वर प्रधान

खँयाखँय्
छन्हु। अमृता प्रितमया काय मांयाथाय् वइ। अमृतायाके न्यनी, "मम्मी, जितः सकस्यां साहिर लुधयानवीया ख्वाः वः धकाः हायेकीगु... छाय् थें।" अमृता प्रितमं लिसः बी, "अहो पुता ! धात्थें छंगु ख्वालय् साहिर ख्वाः लूसा गुलि जिउ ।"

जिपिं उबलय् नाप लाइ। ख्याःखँत जुयाच्वनी। हावादारी खँ ल्हाये। खःगु मखुगु खँत जुइ। धाइ नापं ख्याःखँ। त्यःमत्यः। जिउ मजिउ। अन दइ मखु। न्ह्याथेंजाःगु सां। खँ ल्हायेवं गाइ। न्ह्याइपुके। मजाक याये। ल्याय्म्ह ई। बैंस अनुसार ख्याः जुइ। धाइ ख्याः निथी दइ। भेज-ख्याः। अर्थात् शाकाहारी ख्याः। शाकाहारी ख्याः सात्विक जुइ। भद्र। साधु सन्ततसें याइगु पालं थें। नइगु भोजन थें। मेगु ख्याः मांसाहारी। नन्भे-ज ख्याः। छ्वय्ला कचिलां जाःगु भोजन थें। चिल्ल दइ। पालु पालु धाइ थुज्वःगु ख्याः। राजसी भोजन थें। ल्याय्म्हबलय् न्यालु पालु खाना यइ मखु। ख्याः नं तिख्खरगु यइ। जिपिं उबलय् नापलाइ। पालु पालु धाःगु। मसला दइगु ख्याः ल्हाये। थुज्वःगु ख्याः स्वादिष्ट जुइ। मन चकंके ।

ख्याः धइगु ख्याः हे। यथार्थय् व फय्गं खः। न्ह्यागु खँ धाःसां ख्यालय् दम दइ मखु। पिनें झःझः धाइ। दुने व फुस्लु जुइ। ल्हायेबलय् न्ह्याइपुइ। लिपा फय् जुयाः तनावनी। ख्याःयात ख्याः कथं हे थुइकेमाः। गुम्हं गुम्हं ख्याः मफाःपिं नं दइ। ख्याःयात नी तायेकी। तं म्वयेकी। ख्याःभाय्यात थुइका मबिल कि ल्वापु जुइ यः। मखु थें दुर्घटना जुइ यः। ख्याः याइम्हेसिके ख्याः यायेगु कला दयेमाः। ख्याः याये मसल कि लिच्वः बांमलायेफु। ख्याः नं ई ब्यः थाय् स्वयाः यायेमाः। मखुथाय् मखु मखु थें ख्याः याये लात कि ख्याःया परिणाम अःखः जुया बी। ख्याः यानाः न्ह्याइपुके धाःतले लिच्वः म्हाइपुइयः। गुम्ह मनू ख्याः स्वभावयापिं जुइ। इमिसं ख्याः याइबलय् ख्याःया रस पिज्वइ। ख्याः याये म्हाःपिंत ख्याःया प्रभाव निरस जुइ। जिमिसं उबलय् ख्याः याये। थःथः पासापिं दथुइ। न्ह्याम्हंलिसे ख्याः याना मजुया। धात्थें जिपिं पुचः नं मछाः स्वभावयापिं। मिसात खन कि जिपिं सन्त साधु थें जुइ। छेडछाड यानाः सुयातं ख्याः यायेगु जिमिगु बानी मदु। तर थःथः निम्ह प्यम्ह पासापिं दथुइ धाःसा जिपिं सिंह थें। राजकुमारत थें। उगुंथुगुं जुइगु मजुइगु ख्याःखँ ल्हाना जुइ। लङ्गा मारे याना जुइ। मनया लड्डु घ्यलय् थुनाः पकापक नइगु अनुभव याये। मजा काये। न्ह्याइपुके। ख्याः यायां रमय् याये। खुब न्हिले। मस्ती याये ।

प्रसिद्ध मनोवैज्ञानिक सिग्मण्ड फ्रायडं धाइ। ख्याःखँ धइगु दइ मखु। पिनं खँ ख्याः जुयाच्वनी दुने उकी नी सुलाच्वनी। ख्याःखँ दइमखु। हावादारी। थथे धाये फइ मखु फ्रायडं धाइ। पूमवंके मफुगु इच्छात अतृप्त बास्ना नुगलय् अचेतन मनोस्तरय् सुलाच्वनी। ख्यालं मचाय्क सुलाच्वंगु अतृप्त इच्छायात निकास बी। खोल ख्याः जुइ। तर दुने सुलाच्वंगु इच्छाया वं संकेत याइ। ख्याःयात विश्लेषण यायेमाः। अन सक्कलगु खँ लुइके फइ। फ्रायडं ख्याः दुने नी दइ। ख्याः अर्थहीन जुइ मखु धाइ ।

उबलय् जिमिसं यायेगु ख्याःत लुमंके। वइत थ्वइत कयाः, क्यंकाः यानागु ख्याःत। मजाकया लागि जिमिसं दयेकागु बाखंत।काल्पनिक महलत। लुमंके। चायेकं न्ह्याइपुकेत यानागु ख्याःत खः इपिं। फ्रायडया तर्क लुमनी। 'छिमि ख्याःत ख्याःत जक मखु। उकी नी नं दु। सुलाच्वंगु ख्याःया ख्वाःपाः पुयाः लुइ। ख्याःया ख्वाःपाः चीका बिउसा छिमिगु इच्छा, सक्कल लुइ।' फ्रायडया न्वाखँ न्यने। उबलय् यायेगु अनेक नन्�भेज ख्याःत लुमंके। जिमिसं ख्याः जक यानागु खः। फ्रायडं अथे मधया बी। जिमितं फ्रायडं खुँ लाः थें ताइ। थ्व हे प्रसङ्गय् उबलय्या छगू ख्याः लुमनी। छन्हु पासां धाइ। "वया काय् ला छंगु ख्वाः वः।" व शतप्रतिशत ख्याः खः। जिं सिउ। जुइ फइगु सम्भावना हे मदु। तर जिमि पुचलं ख्याः�बानी थें चले जुइ। जितः हायेकाच्वनी। जि नं उकी रमे जुया बी। मात्र ख्याः। व जिं सिउ। जितः हायेकी। सिउसां मसिउ थें याये। ख्यालय् मख्ख जुइ। मतिइ तायेके ख्यालय् मख्ख जुयां छु आपत्ति। 'मनोरञ्जन खनी। क्षणिकया ।'

खः। व पूर्ण ख्याः जक खः। वयाम्ह काय्। जिगु ख्वाः वः। थथे जुइगु चान्स हे मदु। चान्स हे मदु खँय् डान्सया अनुमान यायेगु खँ जुइ मखु। वयागु नां कयाः ख्याःखँ जुइ। वलिसे जिं गबलें खँ ल्हाये मनं। नाप लानागु मदु। खनागु जक दु। खनाया भरय्। वया काय्या ख्वाः गय् जिलिसे ज्वःलाइ। खनां जक गाःसा ला जिं गुलि मय्जुपिं खने। गुलिसिया मचातय् ख्वाः जिगु ख्वाः वइगु जुइ। थ्व असम्भव। सुयां मचाया ख्वाः थःगु थें बिना कारण वइ मखु। व मनचिन्ते खँ मखु। अथे जुइत निश्चित प्रक्रिया दइ। अय्नं। पासापिं दथुइ थुज्वःगु ख्याः जुइ। ख्याःखँय् जिउ मजिउया सीमायात चिउताः तइ मखु। खः, मखुया भेदयात वास्ता याइ मखु। ख्याः यायेत। गफ छाँटे यायेगु। मजाक यायेगु आज्जु जुइ। 'वया काय्या ख्वाः छंगु थें च्वं' ख्याः यानाः जितः पासापिंसं ब्वयेकी। जि नं इमिगु सुरय् च्वय् च्वय् आकाशय् ग्वःफसय् तने। व ख्याः जक खः। उबलय् जिमिसं जिउ। ख्याःया तःलेया सत्य जुया बी। व ख्याः जक खः। नी जुइ हे फइ मखु। थुज्वःगु ख्याः याये मजिउ। जिमिसं सिउ। तर थ्व ख्याः जक खः। जिमि दथुइ सीमित। थ्व ख्याः हे जक। सुयातं ध्वके। जिमि मनसाय मखु। थ्व ख्याः जक खः। सुयागुं मर्यादाय् थ्वं हानी याये मजिउ। जिमिसं नं सिउ ।

थन दः नांजाःम्ह पंजाबी लेखिका अमृता प्रितम लुमनी। अमृताया प्रीतम सिंहलिसे इहिपा जुइ। इमि काय नं दइ। लिपा इमि विवाह असफल जुइ। सम्बन्ध विच्छेद जुइ। अमृता प्रितमया भारतया नांजाःम्ह कवि, गीतकार साहिर लुधयानवीलिसे मतिना जुइ। अमृताया साहिरप्रतिया मतिना सी मखु। दुने दुने च्याना हे च्वनी ।

छन्हु। अमृता प्रितमया काय मांयाथाय् वइ। अमृतायाके न्यनी, "मम्मी, जितः सकस्यां साहिर लुधयानवीया ख्वाः वः धकाः हायेकीगु... छाय् थें।" अमृता प्रितमं लिसः बी, "अहो पुता ! धात्थें छंगु ख्वालय् साहिर ख्वाः लूसा गुलि जिउ।" मनूतसें अमृता प्रितमया काययात हायेकी थें उबलय् पासापिंसं जितः हायेकी। "वया काय्या ख्वाः छंगु थें च्वं।" लुमनी ।

ख्याः ख्यालय्। पासापिनिगु पुचलय् । अमृता प्रितमं काययात बिउगु लिसः लुमनी। व लिसः। जिं नं लिसा काये मास्ते वइ। "धात्थें अथे जूसा गुलि जिउ" तर... धात्थें। जिं सिउ... व असम्भव ।

More Stories Like this