रामचन्द्र पौडेल त्याकेत झलनाथयात मधेशवादीतय् दवाव
येँ (सन्ध्या टाइम्स)/प्रधानमन्त्रीया चुनावय् मधेश प्रदेशया मुद्दा ल्ह्वनाः तटस्थ च्वनाच्वंगु प्यंगू मधेशवादी दलत मध्ये निगू दलं आः नेपाली कांग्रेसया पक्षय् मतदान याना बिउ धकाः एमालेया अध्यक्ष झलनाथ खनालयात दबाव बियाच्वंगु खँ सीदुगु दु ।
लोकतान्त्रिक मधेशी मोर्चाय् दुथ्यानाच्वंगु मधेशी जनअधिकार फोरम लोकतान्त्रिकया अध्यक्ष विजयकुमार गच्छेदार व तराई मधेश लोकतान्त्रिक पार्टीया अध्यक्ष महन्त ठाकुरं एमाले अध्यक्ष झलनाथ खनालयात नापलानाः उकथं दबाव बियाच्वंगु खँ एमाले सूत्रं धाःगु दु।
मधेशवादी दलया थ्व निम्ह नेतातय्सं न्हियान्हिथं धइथें कांग्रेसयात समर्थन यायेमाः धयाच्वंम्ह एमालेया बरिष्ठ नेता केपी ओलीलिसे सहलह ब्याकाः एमालेया अध्यक्ष खनालयात तःक्वःमछि हे दबाव बीधुंकूगु दु ।
एमालें समर्थन मयायेकं थःपिंसं जक समर्थन यानाः कांग्रेसया उम्मेदवार त्याइगु सम्भावना मदुगुलिं गुगुं नं हालतय् एमालें नं समर्थन यायेमाल अले मंकाः कथं सरकार दयेका वने नु धकाः मधेशवादी दलतय्सं एमाले अध्यक्ष खनालयात मदिक्क हे दबाव बियाच्वंगु नं सूत्रं धाःगु दु ।
एमाले तटस्थ च्वनाच्वंगु कारणं मधेशवादी दलत नं तटस्थ च्वनाच्वंगु दु ।
