लुँ झिके यायेगु खँय् हानं विवाद

लुँ झिके यायेगु खँयात कयाः राष्ट्र बैंक व लुँवहः व्यवसायीतय् दथुइ ब्वलंगु कचवं झन तच्वयावंगु दु। राष्ट्र बैंकपाखें न्हूगु मौद्रिक नीति सार्वजनिक याःगु इलय् गुगु व्यवस्था याःगु खः आः कार्यान्वयन याःबलय् उकिया अःखः जुल धासें लुँवहः व्यवसायीतय्सं न्हूगुया नीतिया विरोध याःगु दुसा उकियात हे कयाः म्हिगः व थौं थःपिनि पसः नं बन्द याःगु दु ।

मौद्रिक नीति सार्वजनिक याःगु इलय् नेपाल सुनचाँदी व्यवसायी संघया सिफारिस कथं निजी ब्यापारीतय्सं नं तप्यंक लुँ झिके याये दइ धकाः नीति दयेकूगु खः। तर आः वयाः 'क' वर्गया बैंक मार्फत व नं मेगु निगू संगठनया समेत सिफारिसपाखें लुँ न्याये दइ धइगु नीति हःगु कारणं लुँवहः व्यवसायीत मारय् लाइगु जूवंगु दु। थथे जुइबलय् स्वनिगःया स्थानीय लुँवहः व्यवसायीत दकलय् तःधंगु मारय् लाइगु खनेदु। छाय्धाःसां ज्या यायेगु लागिं उमिके लुँ धइगु हे दइ मखु। छगू ला लुँ न्यायेत बैंकय् वने माल, व नं सीमित मात्राय् जक न्याये दइ व लुँवहःया ज्या मयाइगु निकाययात तकं लुँ न्याये खनीगु कोटा तया बिउबलय् धाथें लुँवहःया हे जक ज्या याइपिं व्यवसायीत पीडित जुइगु स्वाभाविक खः। सरकारया थज्याःगु नीतिं यानाः समस्याया समाधान पिकायेगु सिबें नं व्यवसायीतय् दथुइ फुट हयेगु व समस्यायात झन तच्वयेकेगु जक ज्या याना बीगु खनेदु। कि मखुसा थज्याःगु नीति हये न्ह्यः हे सम्बन्धित सकलें पक्षया व्यवसायीत नापं तयाः छगू सहमति पिकायेमाःगु खः। अज्याःगु छुं हे मयासे थः यत्थे ज्या याःगु कारणं थुकिं देशय् हानं छक्वः लुँ तस्करीया ज्यायात च्वन्ह्याका बीगु खतरा पिहां वःगु दु ।

More Stories Like this