कांग्रेसपाखें मेगु विकल्प माग
प्रमया चुनावय् कांग्रेस लिमचिलीगु
येँ (सन्ध्या टाइम्स)/नेपाली कांग्रेसया थौं सुथय् च्वंगु केन्द्रीय पदाधिकारी व केन्द्रीय दुजःतय्गु मंकाः मुँज्यां एकीकृत माओवादीपाखें मेगु न्हूगु विकल्प महःतले प्रधानमन्त्रीया उम्मेदवारी लित मकायेगु निर्णय याःगु दु।
कांग्रेसं कन्हय्या चुनावय् थःपिनिपाखें प्रधानमन्त्रीया उम्मेदवार जुयाच्वंम्ह संसदीय दलया नेता रामचन्द्र पौडेलया नां लित मकायेगु क्वःछिउगु खः। कांग्रेसया कार्यवाहक सभापति सुशिल कोइरालाया छेँय् जूगु उगु मुँज्यां आःया अवस्थाय् चुनावं लिमचिलेगु नापं यथास्थितिइ हे माओवादी नेतृत्वयात अस्वीकार यायेगु निर्णय नं याःगु खः ।
कांग्रेसया महामन्त्री कुलबहादुर गुरुङं म्हिगः जक छगू समारोहय् सहमतिया निंतिं माओवादी व कांग्रेस निगुलिं पार्टीं उम्मेदवारी लित कायेमाः धयादीगु खः। उकियात वय्कःया ब्यक्तिगत बिचाः जक खः धकाः थौंया बैठकं ठहर याःगु दु। कांग्रेसं पुलांगु अडान कायम याइगु अले एमाले व मधेशवादी दलत नं तटस्थ हे च्वनीगु जुयाः कन्हय् जुइगु प्रधानमन्त्री चुनावं नं प्रधानमन्त्री ल्यये मफइगु निश्चित दुगु खँ धाःगु दु ।
उखे एमालेया पोलिटब्युरो बैठकं नं तटस्थ च्वनेगु पार्टीया निर्णय हीके मफुनि। एमालें अझ नं राष्ट्रिय सरकार गठन यानाः न्ह्याः वनेगु धकाः हे हाकनं सकलें दलतय्त इनाप याःगु दु ।
