निर्णय याये मफयाः कायल एमाले

प्रधानमन्त्री चुनावय् तटस्थ च्वनेगु धकाः निर्णय यानातःगु एमालेयात आः थ्व तटस्थताया निर्णय हे घाघः जुया वःगु दु। यद्यपि सकलें राजनीतिक पार्टीत छथाय् च्वनाः राष्ट्रिय सरकार गठन मयायेगु खःसा बहुमतया सरकार दयेकेगु ज्याय् थःपिं सहभागी जुइ मखु धकाः एमालें कयाच्वंगु अडान अझ नं सान्दर्भिक धाःसा जूनि। एमालेया आन्तरिक समस्यायात थुइकेगु खःसा थ्व पार्टीयात आः तक बचे यानातःगु धाःसा हानं थ्वहे तटस्थताया निर्णयं खः। एमाले दुने कांग्रेसलिसे सरकार दयेकेमाः व माओवादीलिसे सरकार दयेकेमाः धइगु निगू स्पष्ट खेमा दु। थ्व विभेदं पार्टीयात विभाजन तक थ्यंका बीगु खतरा दु। निखरें मवँसे तटस्थ च्वना बिउगु कारणं पार्टी दुने अज्याःगु खतरा मवल ।

तर तटस्थतां एमालेया आन्तरिक समस्या समाधान जूसां राष्ट्रिय समस्यायात धाःसा अझ तच्वयेका बिउगु दु। एमाले व मधेशवादी मोर्चाया तटस्थताया कारणं वंगु लछि न्ह्यवंनिसें देशय् न्हूम्ह प्रधानमन्त्री ल्ययेत जुयाच्वंगु कुतः विफल जुयाच्वंगु दु। लिसें तटस्थताया निर्णयं एमालेयात निर्णय बीगु क्षमता मदुगु पार्टी कथं बदनाम नं यानाच्वंगु दु। अज्याःगु अवस्थाय् एमालें छगू न छगू ठोस निर्णय यानाः न्ह्याः वनेमाःगु अतिकं आवश्यक जुइ। तटस्थ च्वनेगु निर्णययात हीकाः मतदान यायेगुपाखे वनेमाः धकाः केन्द्रीय कमिटीया बैठकं नं निर्णय याये मफयेवं एमालें आः थ्वयात पार्टीया पोलिटब्युरोय् यंकूगु दु। तर पोलिटब्युरो नं निर्णय यायेत ताःलानाच्वंगु धाःसा मदु। एमाले थ्व निर्णयहिनतां याकनं पिहां वःसा हे बांलाः। थुकिं एमाले जक मखु मुलुकया नं हित जुइ ।

More Stories Like this