नेवानिइ गम्भीर चलखेल

विमान खरिद प्रकरणय् सुभाष नेम्बाङ नं !

येँ (सन्ध्या टाइम्स)/नेपाल वायुसेवा निगमं न्यायेगु धकाः तयारी यानाच्वंगु एअरबस खरिद सम्बन्धी प्रकरणय् आः भद्र छबी दुम्ह सभामुख सुभाष नेम्बाङ समेत खने दयेकः वःगु खँ सीदुगु दु। थ्व प्रकरण आः तःधं जुजुं वनाः एअरबस न्यायेगु धकाः अर्डर बियाछ्वःम्ह निगमया कार्यकारी अध्यक्ष सुगतरत्न कंसाकारयात फुसा ज्वनाः कुना हे बीगु तकया चलखेल शुरु जूगु खँ सूत्रं धाःगु दु।
कार्यकारी अध्यक्ष कंसाकार न्ह्याथे यानाः नं थ्व विमान हयेगु पक्षय् दुसा वय्कःया हे सेकेण्डम्यान जुयाच्वंम्ह महाप्रवन्धक क्याप्टेन केबी लिम्बु धाःसा हयेके मबीगु पक्षय् दु। उकिं थ्व प्रकरणयात कयाः थौंकन्हय् अख्तियारय् तःधंगु वहस न्ह्यानाच्वंगु दु। अख्तियारं थ्व प्रकरणय् याकनं याकनं ज्या याना बिउ धकाः अख्तियार प्रमुखयात थौंकन्हय् सभामुख सुभाष नेम्बाङं न्हिंन्हिं धइथें फोन यानाः दवाव बियाच्वंगु खँ सीदुगु दु ।

सूत्रया कथं कंसाकारया विरोध यानाच्वंम्ह क्याप्टेन लिम्बु सभामुख नेम्बाङया थःथिति लानाच्वन। उकिं थ्व प्रकरणय् सभामुख नेम्बाङ नं सहभागी जूवःगु खः।
दवावया हे कारणं अख्तियारं थौंकन्हय् न्हिंन्हिं धइथें निगमय् वयाः विमान खरिद सम्बन्धी छुं कि छुं भ्वं यंकेगु यानाच्वंगु दु। अख्तियारं आः तक करिब च्यागः बाकस भ्वं यंकेधुंकूगु खँ निगम सूत्रं धाःगु दु। आः तक निगमया कार्यकारी अध्यक्ष कंसाकारं अख्तियारय् वनाः झिंखुक्वः बयान बीधुंकूगु दु। तर नं थुकी ज्वने माःगु छुं हे खँ लुइके मफयाः अख्तियार अलमल जुयाच्वंगु खँ सूत्रं धाःगु दु।
उखे चीनया गुगु कम्पनीयाके नेपालं थ्व विमान न्यायेगु धकाः बैना कथं ५ करोड दां बियातःगु खः, उगु कम्पनीं वहे विमान आः नकतिनि हंगकंगयात ६० करोड तका अप्वः कयाः मिउगु दु। नेपालं न्हापा हे ५ करोड बैना बियातःगु जुयाः जक नेपाःयात पुलांगु हे भावं विमान बीत्यंगु खः। छुं जुयाः नेपालं थ्व ५ करोड बैना बियातःगु दां लित कयाः हानं न्हूगु प्रक्रियापाखें विमान न्यायेमाल धाःसा आःया बजाःभाः कथं म्होतिं नं ६० करोड तका अप्वः पुले मालीगु खँ सूत्रं धाःगु दु। थ्वहे कारणं यानाः सरकारं विमान न्यायेगु मखुत धकाः तप्यंक निर्णय नं याये मफयाच्वंगु खः। सरकारं खालि विमान न्यायेत वर्तमान व्यवस्थापनं याःगु अर्डर जक रद्द याकेत स्वयाच्वंगु खः। तर ५ करोडया कारणं अर्डर रद्द यायेसातकि न्हूगु विमान न्यायेबलय् मेगु ६० करोड घाटा जुइगु जूगुलिं उकिया जिम्मेवारी सुनां कायेगु धइगु न्ह्यसःया लिसः लुइके मफयाः थ्व प्रकरण अझ नं थाति लानाच्वंगु दावी नं सूत्रं याःगु दु ।