संजीप प्रधानया न्हूगु नेपालभाषा म्येचाः पिदनीगु

ताः ईलिपा नांजाःम्ह गायक संजीप प्रधान नेपालभाषाया न्हूगु म्येचाः ज्वना वइगु जूगु दु । थौंकन्हय् सं.रा. अमेरिकाय् च्वनादीम्ह वय्कलं न्हूगु म्येचाःया लागि सकतां ज्या अनं हे याना च्वनादीगु दु । नेवाः अर्गनाइजेसन अफ अमेरिकाया प्रश्तुति कथं वइगु मोहनि स्वन्ति जःखः पिदनेत्यंगु थुगु म्येचाः नेपाःया अन्नपूर्ण क्यासेट सेन्टरपाखें प्रोडक्शन जुइगु जूगु दु ।

न्हापान्हापाया म्येचाकय् थें थुकिइ नं रचना, संगीत व सः दक्वं वय्कया हे जुइ । तँसा कथं सरिश्मा अमात्यया छपु म्ये नं थुकिइ दुथ्याइ । थ्व सकतां म्यॆ एरेन्ज यायेगु ज्या राजु लामा व समीर मानन्धरपाखें जुयाच्वंगु दु ।

'थुगु म्येचाकय् झिपु म्ये दुथ्याइ । थुकिइ मतिनाया म्ये, ख्यालि पहःया म्ये, न्हूगु पहःया म्येलिसें छपु निपु पुलांगु परिवेशया म्ये नं दइ' - नेपालमण्डल डट कमलिसेया खँल्हाबल्हाय् वय्कलं धयादिल । न्यादँ खुदँया दिपाः लिपा पिदनेत्यंगु वय्कःया थुगु न्हूगु नेपालभाषा म्येचाः दुने थीथी कथंया सवाः दुथ्याइगुलिं श्रोतातय्सं थुकियात ययेकी धकाः वय्कः तसकं आशावादी जूगु खँ नं वय्कलं न्ह्यथनादिल ।

'अले म्येचाःया नां?', वय्कलं धयादिल - 'छगू देय्या लाय्कू' । थुगु लाय्कू गुगुं छगू निश्चित थाय्यात इंगित यानातःगु मखुसें काल्पनिक लाय्कू खः, गुकिया पृष्ठभूमिया म्ये नं म्येचाः दुने दुथ्याइ । थीथी परिवेशया म्येया लेखन विविधता नं श्रोतापिन्सं ययेकीगु वय्कलं भलसा कयादीगु दु ।

More Stories Like this