कांग्रेसपाखें चक्र प्रणाली प्रस्ताव
सेना समायोजन तक कांग्रेस, संविधान घोषणा तक माओवादी अले चुनाव तक एमालें नेतृत्व यायेगु कांग्रेसया प्रस्ताव
येँ (सन्ध्या टाइम्स)/नेपाली कांग्रेसं नेकपा (एमाले) यात आः पालंपाः सरकारया नेतृत्व यायेगु कथं चक्रीय प्रणालीइ वनेगु प्रस्ताव तःगु दु। छुं न्हि न्ह्यः एमालेलिसे जूगु वार्ताय् कांग्रेसं थज्याःगु प्रस्ताव तःगु खः ।
कांग्रेसं हःगु चक्रीय प्रणाली कथं दकलय् न्हापां सेना समायोजन तकया निंतिं प्यला तक कांग्रेस नेता रामचन्द्र पौडेलयात सरकारया नेतृत्व याकेगु प्रस्ताव दु ।
कांग्रेस धुंकाः माओवादी अध्यक्ष प्रचण्डया नेतृत्वय् सरकार दयेके बीगु प्रस्ताव दु। प्रचण्डया प्यलाया कार्यकालय् न्हूगु संविधान दयेकाः घोषणा तकया ज्या सम्पन्न यायेगु खँ प्रस्तावय् धयातःगु दु ।
संविधान घोषणा लिपा एमाले अध्यक्ष झलनाथ खनालयात सरकारया नेतृत्वय् याकेगु व उगु सरकारपाखें न्हूगु आमचुनाव सम्पन्न यायेगु प्रस्ताव तःगु दु। कांग्रेसपाखें एमालेयात औपचारिक रुपं हे थ्व प्रस्ताव तयेधुंकूगु खँ एमाले सूत्रं धाःगु दु ।
तर कांग्रेसया उगु प्रस्तावयात माओवादीं धाःसा अस्वीकार याइगु सम्भावना दुगु खँ सूत्रं धाःगु दु। माओवादीपाखें थ्व प्रस्तावयात समर्थन मयाइगु सम्भावना दु धकाः एमालें कांग्रेसयात धाये नं धुंकूगु दु ।
थ्व हे दथुइ छुं दिं न्ह्यः माओवादीं नं एमालेयात थज्याःगु हे चक्रीय प्रणाली कथं सरकारया नेतृत्व यायेगु प्रस्ताव तःगु खँ सीदुगु दु। माओवादीं न्हूगु संविधान दयेकेगु व देय्यात निकास बीगु निंतिं माओवादी व एमालें पालंपाः सरकारया नेतृत्व यायेगु धकाः प्रस्ताव तःगु खः।
तर एमालें कांग्रेसयात पिने तयाः थःपिं जक वनेगु पाय्छि जुइ मखु धकाः माओवादीयात लिसः बियाछ्वःगु खः।
प्रधानमन्त्री चुनाव ६ गते न्हूम्ह प्रधानमन्त्री ल्ययेगु निंतिं थौं संसदय् न्याक्वःगु चुनाव यायेगु धयातःगु खःसां उकियात लिछ्यानाः ६ गते जक याइगु जूगु दु। एकीकृत माओवादीया सभासद् रामकुमारी यादव ग्याँस दुर्घटनाय् लानाः मदुगुलिं थौं च्वनीगु संसद बैठक मदुम्ह सभासद यादवप्रति शोक प्रस्ताव पारित यानाः क्वचायेकीगु ग्वसाः दु। म्हिगः हे सभामुख नापं माओवादी, एमाले व कांग्रेसया नेतात च्वनाः ६ गते चुनाव यायेगु सहमति तयार याःगु जूसां उकियात औपचारिक रुपं घोषणा यायेगु ज्या धाःसा थौं संसदया कार्यव्यवस्था समितिया बैठक च्वनाः जक याइगु खँ दु ।
