विद्यार्थीं पुले हे मफइगु त्रिविया शुल्क

अथें नं थीथी कारणं यानाः दुर्लभ जुयाच्वंगु शिक्षायात अझ हे दुर्लभ यायेगु ल्याखं सरकारं थकाःगु शुल्कया विरोधय् जुयाच्वंगु आन्दोलनं न्हूगु मोड काःगु दु। त्रिविविपाखें थकाःगु शुल्क विद्यार्थीतय्सं पुले फइ मखु धासें स्वनिगःया थीथी झिगू क्याम्पसया प्रमुखतय्सं म्हिगः मंकाः राजीनामा बीवं थ्व समस्यां न्हूगु मोड काःगु खः। दकलय् न्हापां ला थ्व थकाःगु शुल्क विद्यार्थीतय् लागिं पाय्छि मखु धइगु हे सम्बद्ध क्याम्पस प्रमुखतय् ठहर दु। उकिसनं थ्वहे खँयात कयाः विद्यार्थी संगठनतय्सं यानाच्वंगु बन्द व हडतालं यानाः क्याम्पसय् ब्वनेगु व ब्वंकेगु वातावरण धमाधम मदया वनाच्वंगु कारणं नं दिक्क जुयाः प्रमुखतय्सं थ्व राजीनामा बिउगु खनेदु। विद्यार्थीतय्सं न्हिंन्हिं यानाच्वंगु हडतालं शैक्षिक वातावरण झन् झन् हे स्यना वनाच्वंगु दु ।

खतुं त्रिविविपाखें थौंकन्हय् गुगु शुल्क कयाः विद्यार्थीत ब्वंकेगु यानाच्वंगु खः व तसकं हे न्यून खः। उकियात थमकासें हे मगाःगु स्थिति दु। त्रिविविया थ्व न्यून शुल्कया लबः हानं हानं कक्षा भर्ना जुयाः विद्यार्थी राजनीति याना जुइपिं मनूतय्सं कयाच्वंगु दु। लिसें थुकिं यानाः त्रिवि शिक्षाया गुणस्तर नं थकाये मफयाच्वंगु दु। तर गुणस्तर थकायेत शिक्षाय् लगानी यायेगु खःसा व ज्या राज्यं यायेमाःगु खः। थौं राज्यया अर्बौं तका दां सुरक्षा व ल्वाभलय् खर्च जुयाच्वंगु दु। उकियात क्वपालाः शिक्षाय् लगानी याये फःसा उकिया लबः मेगु हे जुइ। त्रिवि थः हे सवल जुइगु खःसां वं बुलुहुँ शुल्क थकायेमाःगु खः, ढंग मिले मजुल कि विरोध जुइगु स्वाभाविक खः। अथे नं गरीब जनतां पुले हे मफइ कथं शुल्क थकायेगु छुं नं कथं न्यायोचित मखु ।

More Stories Like this