बाजुराय् कांग्रेस ज्याकुथी मि तल
येँ जिल्लाया सभापतिया निंतिं निक्वःगु मतदान न्ह्यात
येँ(सन्ध्या टाइम्स)/नेपाली कांग्रेसया महाधिवेशन तयारीया झ्वलय् थीथी जिल्लाय् अधिवेशन नाप नापं ल्वापु जूगु दुसा बाजुराया जिल्ला पार्टी ज्याकुथी धाःसा मि हे तया बिउगु दु ।
वंगु चान्हय् म्हमसिउपिं मनूत वयाः अथे पार्टीया जिल्ला ज्याकुथी मि तयावंगु खः। थौं सिबें प्यन्हु न्ह्यः नं उगु ज्याकुथिइ पार्टीया हे कार्यकर्तातय्सं तोडफोड याःगु खः।
अबले तोडफोड याःपिं धकाः कांग्रेसया हे स्वम्ह कार्यकर्तातय्त प्रहरीं ज्वंगु खःसा कांग्रेसया हे नेतातय्गु इनापं ज्वंपिं कार्यकर्तातय् त्वःते धुंकूगु दु। कार्यकर्तात त्वःतूगु स्वन्हु लिपा हे वंगु चान्हय् हाकनं ज्याकुथी अथे मि तयेगु ज्या याःगु खः ।
वंगु चान्हय् पार्टीया ज्याकुथी मि तया बिउपिं सु धकाः म्हसीके फुगु मदुनि। प्रहरीं अनुसन्धान यानाच्वंगु दु। न्यान्हु न्ह्यः जक नेपाली कांग्रेसया बाजुरा जिल्लाया अधिवेशन जूगु इलय् सभापति पदया सुं नं उम्मेदवारं ५१ प्रतिशत मत हये मफुगुलिं म्हिगः नं चुनाव याःगु खःसा म्हिगः नं सुनानं बहुमत हये मफुगुलिं थौं हाकनं चुनाव यायेगु धकाः घोषणा यानातःगु खः। सभापति पदया निंतिं जूगु चुनावय् मानबहादुर रावलं ८३ मत, पद्म शाहीं ९६ मत अले कविराज पण्डितं ४४ मत हःगु खःसा सुना नं स्पष्ट बहुमत हये मफुगुलिं अन विवाद तच्वयावःगु खः ।
थ्वहे दथुइ कांग्रेसया येँ जिल्लाया सभापति पदया नितिं थौं सुथंनिसें भोट कुर्केगु ज्या न्ह्याःगु दु। भिमसेनदास प्रधान व राजन केसी मध्य सुनां बहुमत हल वहे थुगुसी येँ जिल्लाया सभापति जुइ। वय्कःपिनिगु दथुइ जूगु थ्व निक्वःगु चुनाव खः ।
