माग संवोधन मजुयाः आन्दोलित जनजाति

आदिवासी जनजातितय्सं थःपिनि मागयात राज्यं संवोधन मयाःगु खँयात कयाः आन्दोलन न्ह्याकाच्वंगु दु। थ्व झ्वलय् म्हिगः तिनि नेपाल आदिवासी जनजाति महासंघया ग्वसालय् देय्न्यंकं चक्काजाम ज्याझ्वः जुल। चक्का जामं जनजातिया आन्दोलनयात कयाः सकस्यां ध्यानाकर्षण याःगु दयेमाः। तर जनजातिया मुद्दा राज्यया ध्यानय् हे मवंगु विषय धाःसा मखु। राज्यं थुकियात ध्यानय् तयाः नं वास्ता जक याना मच्वंगु खः। नेपालय् थौं गुगु राज्य पुनर्संरचनाया खँ वयाच्वंगु खः, व वास्तवय् जनजातिया मुद्दायात संवोधन यायेगु लागिं हे जुयाच्वंगु खः। यदि आः देशय् राज्य पुनर्संरचनाया खँ छखे लात धाःसा जनजातिया मुद्दा नं छखे लाइ। अय् जुयाः जनजातितय्सं थ्व मुद्दायात न्ह्याथे यानाः नं न्ह्यःने तयाः सकस्यां मिखाय् लाका तयेमाःगु दु। अले जनजातिया थ्व माग पूमवनीगु धइगु जनजातिया लागिं जक हानीया विषय मखु। थुकिं यानाः असन्तुष्ट जुइपिं जनजातितय्सं पिकाइगु विद्रोहं मुक्कं देय्यात हे हानं मेगु कथंया द्वन्द्वया चक्रय् लाका बीगु खँयात झीसं ल्वःमंके मजिउ। तर थौं देय्या राजनीति गुगु गतिं न्ह्यःने न्ह्याः वनाच्वंगु खः, उकियात स्वयाः धायेगु खःसा आः जनजातिया मुद्दायात फयांफछिं मेखे हे लाकेत कुतः जुयाच्वंगु खः ला धइगु हे आभास जुयाच्वंगु दु। राजनीतिक पार्टीत थवंथवय् सत्ता समीकरणय् तक्यनाच्वंगु कारणं यानाः जनजातिया मुद्दायात सुनां हे संवोधन यानाच्वंगु मदु। थुकिं यानाः अन्ततः राजनीतिक पार्टीतय् ख्वाः स्वयाच्वनां जक जनजातिया अधिकार प्राप्त जुइगु मखुत धइथेंज्याःगु आभास जुयावःगु दु गुकिया विकल्प धइगु हानं नं आन्दोलन बाहेक मेगु मखु ।

More Stories Like this