हानं जुजु लित हयेगु असम्भव राजनीति

नेपाःया राजनीति आः अग्रगमन सिबें पश्चगमनपाखे वनाच्वंगु आभास वःगु दु। राजनीतियात न्ह्यःने न्ह्याकेमाःपिं नेतातय्सं आः थुकियात लिउने यंकाः समाप्त जुइधुंकूगु राजतन्त्रयात नं हानं म्वाका हयेगु अभ्यास यानाच्वंगु संकेतत पिहां वःगु दु। आः नकतिनि हे नेपाः वःम्ह भारतया पुलांम्ह राजदूत केभी राजनं पुलांम्ह जुजु ज्ञानेन्द्रयात गोप्य रुपं नापलाःगु थुकिया हे छगू अंश खः धायेमाः। देशय् 'सांस्कृतिक राजतन्त्र'या चर्चा वयाच्वंगु इलय् लाक्क भारतया सुं मनू वयाः पुलांम्ह जुजुयात नापलायेगु ज्या यात धाःसा उकिं छु संकेत याइ धइगु अथें नं सीदु। उकुन्हु तिनि माओवादीया अध्यक्ष प्रचण्डं जुजुवादी पार्टी राप्रपा नेपालया नेतातय्त नापलाःगु इलय् नं जुजुयात हानं गय् यानाः लित हयेगु धइगु खँय् चर्चा जूगु खँ नं पिहां वःगु दु। उगु खँल्हाबल्हाय् यदि आवश्यक जुल धाःसा जुजुयात 'सांस्कृतिक राजतन्त्र' या रुपय् लित हयेफइ धकाः बिचाः ब्याकूगु नं चर्चा दु। देशय् न्हूगु संविधान दयेके मफयाच्वंगु, प्रधानमन्त्री छम्ह तकं ल्यये मफयाच्वंगु, शान्ति प्रक्रिया थातं लाये मफयाच्वंगु नं गनं थज्याःगु हे ज्याखँत क्वःछी मफयाः जकं खः ला धकाः शंका मजूगु नं मखु। थ्वहे इलय् नेपाःया राजनीतिइ न्हापांनिसें चलखेल याना वयाच्वंम्ह छम्ह भारतीय कुटनीतिक मनुखं नेपाःया भ्रमण यानाः पुलांम्ह जुजुयात समेत नापलाःगु घटनां थज्याःगु फुक्कं शंकायात पुष्टि यायेत आधार बीगु स्वाभाविक खः। तर नेपाःया लागिं थ्व बांलाःगु खँ धाःसा मखु। गुगु लक्ष्य ज्वनाः देय् न्ह्यःने वनेधुंकूगु खः उकियात हानं लित हयेगु ज्या जुल धाःसा उकिं देय्यात तःधंगु दुर्घटनापाखे यंकीगु निश्चित दु ।

More Stories Like this