टिस्टुङ, पालुङ, चित्लाङ लागाया नेवाःतय् मुँज्या

नेवाः देय् गुथि नेपालमण्डलया स्वकःगु टिस्टुङ, पालुङ, चित्लाङ लागा तःमुँज्या देय् गुथिया मू संस्थापक पूर्व मन्त्री भाजु राजेन्द्र श्रेष्ठजुं त्वाःदेवाय् मत च्याकाः उलेज्या यानादिल । उगु ज्याझ्वलय् मूपाहां श्रेष्ठजुं झीगु देय्या शासक वर्ग संघियताया तपुली पुनाः एकात्मकताया जनाइ चिइपिं जूगुलिं नेवाः स्वायत्त प्रदेश मवःतले संघर्ष जारी जुइमाःगु खँ कनादिल ।

उलेज्या न्ह्यः बाजं लाखे प्याखं सहित सांस्कृतिक जुलुस पिहां वःगु थुगु ज्याझ्वलय् देय् गुथिया न्वकूपिं डा. चुन्दा वज्राचार्य व मोहनबहादुर महर्जन मू दुजःपिं कृष्णभक्त मानन्धर व विनोद महर्जनपिन्सं नं थःगु नुगः खँ तयादिल । तःकेहेँ गुथियापाखें नेवाः मिसा गुथि नेपालमण्डलया मू दुजः मय्जु अञ्जली श्रेष्ठजुं ब्वति कयादिल । थ्व तःमुँज्यां भाजु रत्नबहादुर गोपालीया नायःसुइ १९ म्ह दुजः दुगु न्हूगु टिपाचि (टिस्टुङ, पालुङ, चित्लाङ ) लागा पुचः नीस्वंगु दु ।

More Stories Like this