मधेशवादीत हिन्दू राष्ट्रपाखे

केभी राजन नं 'सांस्कृतिक राजतन्त्र'या पक्षय्?

येँ (सन्ध्या टाइम्स)/प्रधानमन्त्री ल्ययेगु चुनावय् तटस्थ च्वनाच्वंपिं मधेशवादी दलतय्त आः माओवादीयात समर्थन याये मजिउगुया मेगु छगू कारण नं न्ह्यःने तये हःगु दु। सूत्रं बिउगु जानकारी कथं नेपाःयात हिन्दू राष्ट्र हे दयेकेमाः, यदि माओवादीयात समर्थन यात धाःसा नेपाः धर्म निरपेक्ष राज्य जू वनी धकाः उमित माओवादीया समर्थनय् मवनेत ग्वाकेगु ज्या जुयाच्वंगु दु। थुकिया लागिं उमित थौंकन्हय् भारतं दकलय् अप्वः हःपाः बियाच्वंगु खँ नं धाःगु दु ।

मधेशवादी दलत संघीय व्यवस्थाया पक्षय् दुसां उपिं धर्म निरपेक्षताया पक्षय् धाःसा मदु। तर माओवादीत धर्म निरपेक्षताया लाइनय् दुगु कारणं यदि माओवादीयात सरकारय् तयाः संविधान दयेकल धाःसा धर्म निरपेक्षता वइगु निश्चित दु धासें मधेशवादीतय्त छथाय् तयेगु ज्या जूगु खँ धाःगु दु ।

आः मधेशवादीतय्त छथाय् तयेगु लागिं हिन्दू राष्ट्रया खँ वःगु कारणं हे म्हिगः भारतं वःम्ह पुलांम्ह राजदूत केभी राजनया रोहवरय् पुलांम्ह जुजु ज्ञानेन्द्रं मधेशवादी दलया नेतातय्त नापलाःगु खँ नं सूत्रं धाःगु दु। म्हिगः बहनी पुलांम्ह जुजु व मधेशवादी दलतय् दथुइ धर्म निरपेक्षताया खँ प्रमुख रुपं पिहां वःगु जानकारी सूत्रं बिउगु दु ।

छुं ई न्ह्यः तिनि सांस्कृतिक राजतन्त्रया खँ पिहां वःगु खः। सूत्रया कथं भारत उगु लाइनय् च्वनेत सहमत जूगु दु। उकिं भारतं फुसा हानं राजतन्त्र पुनर्स्थापना यायेगु व उकियात सांस्कृतिक ज्याय् जक सीमित याना बीगु खँ न्ह्यःने न्ह्यानाच्वंगु दावी सूत्रया दु। केभी राजन नेपाः वःगुया उद्देश्य उकिया बारे अझ ठोस खँ थुइकेत खः ।

राजन थज्याःगु प्रस्ताव बारे खँ ल्हायेत वःम्ह जुयाः हे म्हिगः जुजुया सरकारय् मन्त्री जूम्ह रमेशनाथ पाण्डेया कायं अन्नपूर्ण होटलय् छगू ज्याझ्वः यासें राजन व भाजु ज्ञानेन्द्र शाह नापलायेगु तारतम्य मिले याना बिउगु खः।
उगु इलय् वय्कःपिनि दथुइ जूगु खँया पूर्ण विवरण ला पिहां मवःनि, अथे खःसां राजनं पुलांम्ह जुजुयात न्ह्यःने तयाः मधेशवादी दलतय्त माओवादीया पक्षय् मवनेत सचेत याःगु खः। आः जुयाच्वंगु प्रधानमन्त्रीया चुनावयात विफल यानाः देशय् न्हूगु चुनाव याकेगु व जुजु सहितया संविधान दयेकेगु ग्वसाः जुयाच्वंगु खँ नं सूत्रं धाःगु दु ।