प्राकृतिक विपत्ति व दलतय्गु ध्यान

देशय् थौंकन्हय् न्हिंन्हिं हे गनं चलः वनाःसा गनं खुसिबाः वयाः मनू सिनाच्वन धइगु कारुणिक समाचारत पिहां वयाच्वंगु दु। दैवी प्रकोपय् लानाः मनू सीगु खँ आः सामान्य थें जुइधुंकल। अझ उकुन्हु सर्पं न्यानाः तकं स्वम्ह मस्तय्सं अकालय् मृत्यु वरण यायेमाःगु नुगः खुल्ल मिनीगु समाचार नं वल। राज्यं थुकियात अझ नं छगू समाचारया रुपय् हे जक ब्वनाच्वंगु खःसा थ्व मेगु विडम्बनाया विषय जुइफु। थ्व ई हे वाफय्, खुसिबाः आदि वयाः धनजनया हन्ताः जुइगु ई खः। तर झीथाय् उद्धार यायेगु उपयुक्त प्रणाली धाःसा अझ नं मदुनि। न अज्याःगु दैवी प्रकोपयात न्यून यायेगु छुं पूर्व तयारी हे दु। थज्याःगु प्रकोपया इलय् सर्वसाधारणया ज्यान बचे यायेगु जिम्मा सेना वा प्रहरीया जक मखु मेपिं नं सकलें सवल मनूतय्गु जुइमाः। थनया राजनीतिक पार्टीतय्सं वाईसीएल, युथ फोर्स वा तरुण फोर्स धाःगु दयेकाः शहरय् थःगु 'मसल' क्यनाच्वंगु दु तर गामय् जुइगु थज्याःगु विपत्तिया इलय् धाःसा अज्याःगु फोर्सया छम्ह कार्यकर्ता नं खने दइ मखु। राजनीतिक पार्टीया थज्याःगु फोर्स छु थवंथवय् गोलीं कयेकाः ल्वायेत जक खः ला? जनताया सेवा यायेत मखु? राज्यपाखें याये मफुगु उद्धारया ज्या थुमिसं याना बिउसा हे जक थुमित जनताया सेवा याइगु फोर्स धाये फइगु खः ।

मेखे राज्यपाखें नं कम से कम थज्याःगु इलय् थःपिनि सुरक्षा व मेमेगु निकाययात चुस्त याना तये फुसा आपालं मनूतय्त अकालं सीगुपाखें बचे याये फइगु खः। थज्याःगु विपत्तिया इलय् नं दलत सरकार दयेकेगु ज्याय् हे तन, मन व 'धन' बियाः लगे जुयाच्वंगु धाथें नं दुःखया खँ खः ।

More Stories Like this