येँय् हनीगु जात्राया प्रतिवेदन लःल्हात

नेवाः स्वायत्त राज्य मंकाः संघर्ष समितिं मंगलवाः येँ हनीगु जात्रा व पर्वया धलःया प्रतिवेदन येँ महानगरपालिकायात लःल्हाःगु दु । संघर्ष समिति व महानगरपालिका दथुइ ११३० दिल्लाथ्वः १५ कुन्हु जूगु सम्झौता कथं संघर्ष समितिं छगू ज्यासना पुचः दयेकाः उगु प्रतिवेदन तयार याःगु खः । प्रतिवेदनय् येँय् हनीगु जात्रा व पर्वया धलः, हनीगु तिथि, हनीगु मू संस्था/गुथिया नां व हनेत माःगु बजेट (खर्चया विवरण) दुथ्याकातःगु दु । अथेहे प्रतिवेदनय् नेपालभाषाया महाकवि सिद्धिदास लगायतया बुन्हिया तिथि नं दुथ्याकातःगु दु ।

संघर्ष समितिं नेवाः देय् दबुया नायः नरेश ताम्राकार, नेवाः जागरण मञ्जया अध्यक्ष सुजिव बजाचार्य, नेवाः राष्ट्रिय मुक्ति मोर्चा येँया नायः उमेश स्थापित लगायत न्याम्ह दुजः दुगु ज्यासना पुचः गठन याःगु खः ।

लुमंकेबहजू, वंगु ११३० दिल्लाथ्वः १५ कुन्हु येँ महानगरपालिका व संघर्ष समिति दथुइ नेवाः जात्रा पर्व संस्कृति वापत कामपां दँय् दसं याइगु खर्चया सम्बन्धय् जात्रा पर्वया धलः तिथि मिति व जात्रा याइगु पुचः गुथि जाती व उकियात माःगु खर्चया विवरण व श्रोतवारे प्रतिवेदन दयेकेत छगू ज्यासना पुचः नीस्वनेगु अले उगु पुचलं छवाःयादुने प्रतिवेदन न्ह्यब्वयेगुया नापनापं उकि सहलह ब्याकाः माःगु खँ क्वःछीगु सहमति जूगु खः ।

More Stories Like this