कन्हय् नं बहुमत मवःसा २१ गते
येँ (सन्ध्या टाइम्स)/न्हूम्ह प्रधानमन्त्री ल्ययेगु निंतिं कन्हय् जुइगु चुनावय् नं यदि सुनां हे बहुमत मकाल धाःसा वइगु २१ गते हाकनं मेगु चरणया मतदान जुइ ।
छखे एमाले तटस्थ च्वनाच्वंगु व मेखे मधेशी मोर्चां थौं सुथय् तक नं सुयात मत बीगु निर्णय मयाःनिगु कारणं कन्हय्या मतदान नं अस्पष्ट जूवंगु खः। यदि कन्हय् नं सुयातं बहुमत मवल धाःसा साउन २१ गते मेगु चरणया मतदान यायेगु विषयय् संसदं स्वंगुलिं तःधंगु दललिसे सहलह ब्याकेधुंकूगु दु ।
मधेशवादी दलतय्गु मंकाः मोर्चां तःगु सर्तया सवालय् माओवादीं म्हिगः थःपिनि प्रतिबद्धता प्वंके धुंकूगु दुसा नेपाली कांग्रेसं अझ नं अज्याःगु प्रतिबद्धता बिउगु मदुनि। उकिं मधेशवादी दलतय्सं कांग्रेसया धारणा मवःनि धइगु कारण क्यनाः कन्हय् नं तटस्थ च्वनेगु धकाः निर्णय यायेफु। तर कांग्रेसं थौं हे थःगु प्रतिवद्धता प्वंकेफुगु खँ धाःगु दु ।
मधेशी मोर्चां थौं हे माओवादीया प्रतिद्धतायात कयाः सहलह ब्याकाः आधिकारिक धारणा पित बीगु खँ दु। मोर्चां आःया अवस्थाय् माओवादीयात नं समर्थन याये फइ मखु धकाः थौं बहनी तकया दुने हे थःपिनि धारणा पित बी फइगु खँ विज्ञ सूत्रं धाःगु दु ।
