शिक्षाय् खारेज जूगु प्रमाणपत्र तह

देय्या शिक्षा प्रणालीइ छगू न्हूगु मोड हयेगु ल्याखं सरकारं प्रविणता प्रमाणपत्र तह चीकेगु निर्णय याःगु दु। थुगु हे दँनिसें सरकारं प्रविणता प्रमाणपत्र तहलय् भर्ना कायेगु ज्या दिकूगु दु। थ्व ज्यायात विरोध यानाच्वंगु विद्यार्थी संगठनत मध्ये नं तःधंगु स्वंगू दलया भातृ निकायतय्सं आः थुकी सहमति क्यनेधुंकूगु दुसा आः चीधंगु पार्टीया छुं विद्यार्थी संगठनं जक विरोध यानाच्वंगु दनि। सम्भवतः थ्व विरोध ज्याझ्वःयात सरकारं खास हे चिउताः तइ मखु जुइ ।

तर थ्व चीधंगु विद्यार्थी संगठनतय्सं थुकिया बारे न्ववानाच्वंगु खँय् धाःसा सरकारया ध्यान वने हे माः। छाय्धाःसां प्रविणता प्रमाणपत्र तह खारेज जुइसातकि विद्यार्थीत स्वतः निजी क्षेत्रं सञ्चालन यानातःगु प्लस टु कक्षाय् भर्ना जू वने माली। प्लस टु शिक्षाय् निजी क्षेत्रं थः यत्थे भाः तयाः छगू कथं लुट हे यानाच्वंगु दु। थुकी सरकारया गनं हे नियन्त्रण मदु। थज्याःगु अवस्थाय् गरीब विद्यार्थीत एसएलसी धुंकाः गन वनेगु? थुकिया व्यवस्था सरकारं याना बीमाः ।

अथे हे निजी क्षेत्रं सञ्चालित उच्च मावितय्सं भाषा विषयया पढाइयात नं खास हे ध्यान बियाच्वंगु मदु। थुकिं यानाः नेपालभाषा, मैथिली थेंज्याःगु भाषा ब्वनीपिं विद्यार्थीत अझ म्हो जू वनीगु खतरा दु। थुखेपाखे नं ध्यान बीमाःगु आवश्यकता दु ।

यदि उच्चशिक्षा अध्ययनया जिम्मा आः थें निजी क्षेत्रयात जक बिया तयेगु खःसा देय्या शिक्षा अझ थिके जुइगु निश्चित दु। थुकिं गरीब विद्यार्थीयात अझ मर्काय् लाकीगु जूगुलिं प्रविणता प्रमाणपत्र तह मदयेधुंकाःया अवस्थाया लागिं राज्यं स्पष्ट नीति हयेमाः ।

More Stories Like this