'निम्हं उम्मेदवारं नां लित का'
राजनीतियात मेगु मोडय् यंकेगु हानं न्हूगु खेल?
येँ (सन्ध्या टाइम्स)/प्रधानमन्त्री ल्यये मफयाः अन्यौलग्रस्त जुयाच्वंगु देय्या राजनीतियात आः हानं मेगु हे मोडय् यंकेगु खेल शुरु जूगु आभास थन पिहां वःगु दु। थ्व झ्वलय् प्रधानमन्त्रीया मैदानय् दुगु पार्टीत बाहेक मेगु फुक्क हे पार्टीतय्सं आः उम्मेदवार जुयाच्वंपिं निम्हं नेतातय्सं थःपिनि उम्मेदवारी लित कयाः न्हूगु हे कथंया पहल यायेमाल धकाः इनाप याना हःगु दु ।
एमालेया अध्यक्ष झलनाथ खनालं कांग्रेस व माओवादीयात थःपिनि उम्मेदवारी लित कयाः राष्ट्रिय सहमतिया लागिं न्हूकथं पहल यायेमाल धकाः इनाप यानादीगु दु। तर कांग्रेस उम्मेदवार पौडेल व माओवादी उम्मेदवार प्रचण्ड निम्हेस्यां हे वय्कःया इनापयात अस्वीकार याःगु दु। वय्कःपिंसं उम्मेदवार जुयाः नं राष्ट्रिय सहमतिया वातावरण दयेके फइगु तर्क न्ह्यःने तयादीगु दु ।
निम्हं उम्मेदवारतय्सं १७ गते जुइगु चुनावय् अझ नं थःपिं त्याये फइगु सम्भावना दनि धकाः नं दावी यानाच्वंगु दनि। माओवादीं मधेशवादी दलतय्त थःपिनि लिखित अवधारणा पेश यायेधुंकूगु दुसा उकियात मधेशवादीतय्सं सकारात्मक रुपं काःगु दावी माओवादीया दु ।
उखे एमाले दुने धाःसा १७ गते जुइगु मतदानय् नं थःपिं तटस्थ हे च्वनेगु धकाः नेतातय् दथुइ सहमति जूगु खँ सीदुगु दु। १७ गते न्ह्यः एमालेया बैठक च्वनेगु लाकि मच्वनेगु धकाः विवाद वयाच्वंगु खःसां आः बैठक मच्वनेगु धकाः हे खँ जुइधुंकूगु जानकारी केन्द्रीय दुजः कृष्णगोपाल श्रेष्ठं बियादीगु दु ।
निम्हं उम्मेदवारतय्त नां लित कायेकाः वयां लिपा हानं सहमतीय सरकार दयेकेगु पहल शुरु यायेगु कथं थ्व सुझाव वःगु खँ सूत्रं धाःगु दु। तर अज्याःगु पहलय् फयांफछि माओवादीयात अलग्ग लाकेगु हे ज्या जुइमाः धकाः भारत सक्रिय जूगु दावी नं सूत्रं याःगु दु ।
थ्वहे झ्वलय् कांग्रेस नेतृ एवं एमआरपी भारतय् हे छापे यायेमाः धकाः अडान कयादीम्ह उपप्रम नापं परराष्ट्र मन्त्री सुजाता कोइरालां आःया अवस्थाय् सहमतिया सरकारगठन यायेगु खःसा कांग्रेस थः उम्मेदवार रामचन्द्र पौडेलया नां लित कायेत तयार दु धयादीगु दु। प्रेस युनियन मोरङं विराटनगरय् थौं सुथय् याःगु पत्रकार सम्मेलनय् न्ववासें वय्कलं धयादिल, 'राष्ट्रिय सहमति कायम यायेत कांग्रेसं थः उम्मेदवारी लित काइ।' सूत्रं बिउगु जानकारी कथं एमाले दुने केपी ओली पुचः नं आः निम्हं उम्मेदवारं लित काःसां जिउ धइगु पक्षय् दु ।
