धुँ दिवस व धुँ संरक्षण ज्याय् नेपाःया भूमिका

नेपाः सरकारं नेपालय् नं थुगुसी न्हापांखुसी 'धुँ दिवस' न्यायेकल। विश्वं हे लोप जुइगु चरणपाखे वनाच्वंगु प्रकृतिया सुन्दर प्राणी धुँयात लोप जुइगुपाखें बचे यानाः थुकिया ल्याः अप्वयेका यंकेगु अभियानयात तिबः बीगु ल्याखं विश्वय् धुँ दुगु थीथी देतय्सं थुगु धुँ दिवस न्यायेकेगु शुरु याःगु खः। थुकिं धुँ संरक्षणया ज्याय् छुं भचा जूसां तिबः बीगु निश्चित दु ।

विश्वं तना वनेत्यंपिं धुँ (बंगाल टाइगर) छुं भचा दनिगु छुं छुं जक देय्त मध्ये छगू नेपाः नं खः। उकिं धुँ संरक्षण यायेगु विश्वव्यापी अभियानय् नेपाः नं दुथ्यानाच्वंगु दु। नेपालय् धुँ संरक्षण यायेगु लागिं सरकारं थीथी तहया सुरक्षा नीतित नालाः व्यवस्थापन यानातःगु दु। तर नं सुलाः सुलाः धुँ स्याइपिं तस्करतय्त पने धाःसा फयाच्वंगु मदु। धुँया अंगप्रत्यंग तस्करी याइगु नेटवर्कया स्वापू अन्तर्राष्ट्रिय रुपं हे न्यना वनाच्वंगु कारणं नेपाः थेंज्याःगु कमजोर कानून व फ्यासुगु कार्यान्वयन जुइगु देशं उकियात त्वाःथले थाकुइगु स्वाभाविक खः। वन्यजन्तु अंगप्रत्यंगु तस्करी याइपिं तस्करतय्गु संजाल नेपाःया कर्मचारीतन्त्र जक मखु अनं नं पिहां वनाः सेना व न्याय क्षेत्रय् तकं विस्तार जुयाच्वंगु खँ थीथी घटनातय्सं पुष्टि यानाच्वंगु दु। उकिसनं नेपाःया जःलाखःला देय् चीन धुँयागु अंगप्रत्यंगया दकलय् तःधंगु बजाः जुयाच्वंगु कारणं नेपाःया धुँ बचे जुइत थाकुगु यथार्थ नं सकस्यां न्ह्यःने दु। थज्याःगु अनेक समस्याया वावजूद नं थीथी अन्तर्राष्ट्रिय निकायया ग्वाहालिं धुँ संरक्षणया ज्याय् नेपालं न्ह्यथनेबहःगु सफलता हासिल यानाच्वंगु दु। आःया इलय् सफलताया थ्व क्रमयात मदिक न्ह्याका तयेगु हे नं छगू उपलब्धी जुइगु खँय् शंका मदु ।

More Stories Like this