चाँगुनारायण देगः न्हूगु दयेकेगु शुरु

लिच्छवी जुजु मानदेवं दयेकूगु धयातःगु ऐतिहासिक चाँगुनारायण देगःया जीर्णोद्धार ज्या न्ह्यानाच्वंगु दु। वंगु जेठ १४ गतेनिसें उगु देगःया जीर्णोद्धार शुरु याःगु खः। आः उगु देगःया दक्षिण ब्वया पौ ल्ह्वनेगु ज्या न्ह्यानाच्वंगु दु। थ्वहे गतिं देगः दयेकेगु ज्या न्ह्यानाच्वन धाःसा आः वइगु निला स्वलां हे जीर्णोद्धार क्वचाइगु सम्भावना खने दु ।

चाँगुनारायण द्यःया मूल पूजारी चक्रधरानन्द राजोपाध्यायं नीछगू लाख दामं थुगु जीर्णोद्धार ज्या न्ह्यानाच्वंगु जानकारी बियादिल। उगु जीर्णोद्धार ज्याया निंतिं नीस्वंगु चाँगुनारायण मन्दिर जीर्णोद्धार उपभोक्ता समितिया नायः नापं जुयाच्वनादीम्ह मूल पूजारी चक्रधरानन्द राजोपाध्यायं १९ लाख तका स्मारक हेरचाह अड्डापाखें वःगु व १० प्रतिशत निगू लाख दां उपभोक्ता समिति स्वयमं हे पुलेमाःगु यानाः ब्यवस्था यानातःगुलिं झन जटिल समस्या ब्वलना वयाच्वंगु खँ कनादिल।
निदँ न्ह्यः भाद्रं उगु देगः जीर्णोद्धार याःगु इलय् सिँ प्रति क्यूबिक झिंखुतकां लाःगु खः। आः स्वीतका प्रति क्यूविक पुलेमाःगु स्थिति वयाच्वंगु दु। अथे जुयाः नं इष्टिमेट हे फेल नयाः वा थप दां ब्यहोरे याये मालाः समस्या ब्वलनाच्वंगु दु ।

सरकारी इष्टिमेट कथं ज्या याये थाकुगुलिं आः लागत अप्वः जुया वनाच्वंगु खँ उपभोक्ता समितिं धाःगु दु। सरकारी आँकडाय् ज्या याइपिं ज्यामितय्त न्हिं निसःत्याया ल्याखं ज्याला तयाः इष्टिमेट यानातःगु खः। आः निदँ लिपा उगु देगः स्यंल्ह्वं यायेमाःगु इलय् न्हिं प्यसः बियां नं मनू माले थाकु। २०६६ भाद्रं इष्टिमेट यानाः वंगु जेठंनिसें जक ज्या न्ह्याःगुलिं नं थुलिमछि समस्या वयाच्वंगु उपभोक्ता समितिया धापू दु ।

२ लाख थप उपभोक्ता समितिं तयेमाःगु व यदि ठेक्कां बीगु यात धाःसा ठेकेदारयात १५ प्रतिशत ला नाफा हे दइगु व भ्याट नं त्वःतीगु खः ।

थ्वयां न्ह्यः २०६० सालय् हे तिनि थुगु देगः ल्ह्वनेज्या जूगु खः। तर उगु इलय् देगःया पौ चीगु ज्या याःगु इलय् भचा स्लूप म्हो यानाः दथु अंगलय् पौ दिनाच्वंगु थाय् कुछि क्वकयाः दयेका बिल। प्रविधिया ल्याखं मिले मजुइवं अंगलय् सीदुगु ब्व त्वपुइ कथं तुयूगु रंग पाना बिउगु खः। आः स्यंल्ह्वं यायेमाःगु अवस्थाय् उकियात न्हापाया हे रुपय् च्वय् हे लाकाः तयार याना बिउगु दु। अथे जुयाः नं थप दां फ्यायेमाःगु स्थिति वयाच्वंगु दु। चाँगुनारायण देगःया थ्व पुलांगु रुप मस्यंकेत थःपिं लगे हे जुयाच्वनागु खँ कंसें उपभोक्ता समितिया नायः चक्रधरानन्द
राजोपाध्यायं २०५८ सालं क्वय्या पौ ल्ह्वनेज्या जूगु इलय् उकथं त्रुटि खने दुगु कनादिल ।

आः थुगुसी देगः ल्ह्वनेगु झ्वलय् च्वय्या सिजः पाता लुं सीगु नं यायेत्यंगु दु। छगू फुट बेस टाइट यायेमाःगुलिं थप दां वनीगु खने दयाच्वंगु दुसा झन सिजः पातायात लुं सीमाःगु जुयाः नं उपभोक्ता समिति थप मारय् लानाच्वंगु दु। अझ दथु अंगः हे धेचुलाच्वंगुलिं यानाः नं थप दां खर्च यानाः ज्या यायेमाःगु स्थिति दु। दुने वनेत जा ला छु च्या तकं मत्वँसे शुद्ध वसः पुनाः म्वः ल्हुयाः छुं मनसे ज्या याये मालीगु जुयाः थ्व समस्या ब्वलनाच्वंगु खः ।

More Stories Like this