मधेशी क्यनाः एमालेयात ख्याच्वः
एमाले नेतातय् छेँय् छेँय् रामचन्द्र पौडेलया फोन
येँ (सन्ध्या टाइम्स)/प्रधानमन्त्रीया चुनावय् ल्वानाच्वंम्ह नेपाली कांग्रेस संसदीय दलया नेता रामचन्द्र पौडेलं मधेशवादी मोर्चाया हौवा क्यनाः एमालेयात ख्यायेत स्वयाच्वंगु खँ सीदुगु दु ताकि एमालें थःत समर्थन यायेमा।
मधेशी मोर्चां न्ह्यःने हयाच्वंगु सर्त माओवादीं पूवंकीगु सम्भावना खनेदु धासें यदि उकियात माओवादीं पूवंकल धाःसा थःपिंत ज्या छिनी मखु धकाः पौडेलं एमाले नेतातय्त ख्यानाच्वंगु खँ सूत्रं धाःगु दु ।
एमालेया केन्द्रीय नेतातय्त पौडेलं तप्यंक हे फोन यानाः पार्टीया केन्द्रीय कमिटीया मुँज्या च्वनाः थःत समर्थन यायेगु धकाः निर्णय यायेत इनाप यासें यदि अथे मजुल धाःसा मधेशवादी व माओवादीं सरकार दयेकेफु धकाः सतर्क यानाच्वंगु दु ।
पौडेलं एमालेया वरिष्ठ नेता केपी ओली पक्षधर केन्द्रीय नेतातय्त अथे तप्यंक फोन यानादीगु खँ सूत्रं धाःगु दु। पौडेलया फोनं यानाः आः एमाले दुने १७ गते न्ह्यः हे केन्द्रीय कमिटीया बैठक सःतेत संस्थापन पक्षयात दबाब अप्वया वःगु दु ।
पार्टीं राष्ट्रिय सहमतिया सरकार दयेके मफइगु अवस्थाय् तटस्थ च्वनेगु धकाः निर्णय याना तयेधुंकूगु खँ न्ह्यथँसें संस्थापन पक्षया छम्ह नेतां आःया अवस्थाय् १७ गते न्ह्यः केन्द्रीय बैठक च्वनीगु सम्भावना मदुगु व छुं जुयाः बैठक च्वन हे धाःसां नं पौडेलया पक्षय् भोट कुर्केगु खँ क्वःछी मफइगु खँ धाःगु दु ।
