निकास मलूगु खँय् राष्ट्रपतिया चिउताः

न्हूगु सरकार गठन जुइ मफयाः देशय् कायम जुयाच्वंगु राजनीतिक अन्यौलयात कयाः राष्ट्रपति डा. रामवरण यादवं नं चिउताः प्वंकादीगु खँ पिहां वःगु दु। खास यानाः थःत नापलाः वःम्ह प्रधानमन्त्री माधव नेपाल, सभामुख सुभाष नेम्बाङ आदिपिंलिसे जूगु सहलहया झ्वलय् राष्ट्रपति यादवं थज्याःगु सरोकार क्यनादीगु खः। देशय् थपाय्धंगु गम्भीर राजनीतिक संकट वयाच्वंगु इलय् राष्ट्रपतिं थःगु सरोकार क्यनीगु स्वाभाविक नं खः। तर राष्ट्रपतिं थ्व प्रकरणय् थःगु सरोकार क्यनेगु हे छता बाहेक मेगु छुं यायेगु थाय् मदु धइगु खँयात नं ल्वःमंके धाःसा मजिउ। छाय्धाःसां राजनीतिक पार्टीतय्सं निकास माले मफयाच्वंगु थ्व अन्यौलया घडीइ राष्ट्रपतियात हे कार्यकारी अधिकार बियाः देय् न्ह्याकेगु खः लाकि धइगु बिचाः तइपिं सक्रिय जूगु आभाष नं थन याना हःगु दु। अथे जुयाः आः स्वंगूगु चरणया मतदान नं विफल जुल धाःसा राष्ट्रपतियात पौ च्वयाः मेगु निकास मालेत इनाप याइ धइगु हुइनाभुइना नं न्यने दयावःगु दु। तर सभामुख सुभाष नेम्बाङं धयादी थें थ्व संकट ज्यंकेगु ज्याय् राष्ट्रपतिया छुं हे भूमिका मदु। राष्ट्रप्रमुखया ल्याखं राष्ट्रय वःगु संकट समाधानया लागिं वय्कलं अभिभावकीय भूमिका म्हितेगु छगू थाय् ला दयेफु। तर वय्कःया विगतया ज्याखँत विवादास्पद जूगु कारणं वय्कलं म्हितीगु अज्याःगु भूमिका हे नं शंकारहित जुइगु अवस्था धाःसा मदु। अथे खःसां वय्कःया चिउतालं राजनीतिक पार्टीतय्त याकनं थःपिंसं हे निकास मालेत दवाव सिर्जना याइगु धाःसा निश्चित दु। राष्ट्रपतिया चिउताः थुलि हे सीमा दुने सीमित जूसा दलतय्त सखे ग्वाहालि हे जुइ ।

More Stories Like this