पुलांम्ह कुमारी प्रीति

शीला साय्मि

२०५४ साल भाद्र २१ गते बौ सुरन्द्र शाक्य व मां रीना शाक्यया कोखं इतुंबहालय् जन्म जूम्ह मय्जु प्रीति शाक्य थौंकन्हय् ह्वाइट फील्ड हायर सेकेन्डरी स्कूलय् खुगू तगिमय् ब्वना च्वनादीगु दु। ब्वनेकुथिइ थः हे ब्वनेदयाः वय्कः तसकं लय्ताः। यक्व पासापिंनाप न्ह्यइपुगु लकसय् आखः ब्वने वय्कःयात तसकं यः। स्कूलया वय्कः छम्ह विशिष्ट विद्यार्थी नं खः। छाय्धाःसां वय्कः येँ लाय्कूया निवर्तमान कुमारी नं खः। कुमारी जुयाच्वनादीबलय् कुमारी छेँय् हे शिक्षक वयाः आखः ब्वंकीगु, आः थःहे स्कूल वयाः आखः ब्वना च्वनादीगु दु ।

२०५८ साल असार २६ गते मंगलवाः कुन्हु वय्कः कुमारी जुयाः आसनय् च्वनाबिज्याःगु खः। द्यःया आसनय् च्वनाबलय् छगू न्हूगु कथंया अनुभव जूगु अले भक्तजनपिंसं द्यः धकाः अन्याः वःगु वय्कःयात आः तकं लुमंनि। नित्य पुजा ला न्हिंन्हिं हे जुयाच्वनी। ततःधंगु पुजा, विशेष पुजा जुइबलय् थःत बिस्कं कथंया अनुभव जुइगु खँ नं वय्कलं कनादी। विशेष न्हि कुन्हु राष्ट्राध्यक्ष व विशिष्ट मनूत दर्शन याः वइबलय् वय्कः झन् हे लय्ताइगु जुयाच्वन ।

विशेष पर्व बाहेक मेबलय् कुमारी छेँनं पिहां वने मदु। छेँय् दुने तताकेहेंपिं पासापिंनाप म्हिते दु। मांबौपिं नं बरोबर वयाच्वनीगुलिं म्हाइपु धइगु गबलें मजू। कुमारी छेँया चिताइदारापिंपाखें नं बांलाक बिचाः याःगु जुयाः पिहां वने मखं धइगु अनुभव मजू। कुमारी माजुया थःगु जन्मन्हि नं दँय्दसं हनेगु चलन दुगु जुयाच्वन। वय्कःयात थःगु जन्मन्हि हनीगु साप हे न्ह्यइपु। थ्व कुन्हु सिउपिं भक्तजनपिं पुजा नापं उपहार तकं ज्वनाः वइगु अले सकलें जानाः लसतां जन्मन्हि हनीगु जुयाः वय्कःया तसकं यः। कुमारी जुइबलय् वय्कःयात न्ह्यइपु ताइगु मेगु अवसर खः जात्राय् रथ सालीबलय्। स्वन्हुयंकं रथय् तयाः सालीगु जक मखु उगु इलय् सवःभकु, लाखे व पुलुकिसि प्याखं नं स्वये खनीगु जुयाः उगु झाः वय्कःयात तसकं यः।
ततःधंगु पुजा, ताःहाकः पुजा जुइबलय् धाःसा गबलें गबलें आखः ब्वनेगु लिबाःगु नं दु। अबलय् धाःसा भचा थाकुइगु वय्कःया अनुभव दु ।

२०६५ साल आश्विन २१ गते कुन्हु वय्कःयात कुमारीं क्वकयाः थः हे मांबौया छेँय् लित छ्वया हल। उबलय् धाःसा वय्कःयात तसकं मछिन। उलिमछि च्वनेधुंकूगु छेँ त्वःता वने सुया यइ? मांबौपिंसं बाजं ज्वनाः खतय् तयाः जात्राबलय् थें थःगु छेँय् यंकीगु खः वय्कःयात। अथेसां नं थःतः नुगः मछिंसे च्वना वःगु अले मेमेपिं ख्वयाहःबलय् थःतः नं नुगः मछिनाः ख्वयागु अनुभव वय्कःयाके दु। वय्कःयात चिताइदारपिं नं छेँय् थ्यंक नापं वःगु व भ्वय् नकाः छ्वःगु जुयाच्वन। न्हिंन्हिं भक्तजनपिं कुमारी छेँय् थें तुं पुजा वयाच्वनीपिं दुगुलिं म्हाइपु धाःसा छतिं मजू। अथे नं कुमारीछेँ धाःसा लुमना हे च्वनीगु ।

प्यन्हु दयेकाः कुमारी छेँपाखें चिताइदारपिं वयाः वसः त्वकेगु व सपः फ्यनेगु याइ। अले न्हूगु आधुनिक वसः पुंकी। उबलय् धाःसा वय्कः तसकं लय्तायादिल। उकिसनं वय्कःयात कुमारीछेँ यंकूबलय् ला लय्लय् तायाः वसन्तपुली झाःगु खः। तर अन थःगु थासय् मेम्ह कुमारी खंबलय् धाःसा वय्कःयात छझाः गर्खेसे च्वन। तर लिपा सामान्य जुल ।

वय्कः कुमारी त्वःतेधुंकाः नं न्ह्याबलें कुमारी छेँय् वने दुगुलिं कुमारी त्वःतेमाःगु खँय् छुं हे चिउताः मदु। मेपिं पुलांपिं कुमारी नं न्ह्याबलें वयाच्वनीगु अले छुं नं पर्व, भ्वय्, जात्रा जुल कि थःत नं सःतीगुलिं व छेँ वय्कःयात थःगु हे छेँ थें च्वं। थः आः तक नं कुमारीछेँय् वना हे च्वनागु खँ वय्कलं कनादिल। अथे नं कुमारी त्वःतेधुंकाः रथ जात्रा कुन्हु पुलांपिं कुमारीपिं दक्व सःतीगु अले सकलें नापलाइगु जुयाः थ्व न्हि वय्कःयात आः तकं तसकं यःनि।
राजकीय कुमारी येँया झिंच्यागू बाहाःयापिं शाक्य कन्या मस्त मध्यनं जक जुइ दइगु चलन आः तकं दनि। थौंकन्हय् न्ह्याथाय् वंसां पुलांम्ह कुमारी धकाः सम्मान याइगुलिं वय्कलं थः कुमारी जुइ खंगुली गौरव तायेकादीगु दु। गुलिखे थासय् वय्कःयात विशिष्ट पाहां कथं नं सःतेगु याः मेगु खँ, न्हापा कुमारी छेँय् पुजा वइपिं मनूत आः तक नं वय्कःयात मरिचरि पुजाज्वलं ज्वनाः छेँय् नापलाः वयेगु याःनि। अर्थात कुमारी मखयेधुंकाः नं वय्कःया सम्मान गथे खः अथे हे दनि ।

वय्कः कुमारी मखयेधुंकाः वय्कःया मांयात न्हापा कुमारी यानाबलय् प्यदँ जक दुम्ह थ्व मचा आः छेँय् लिहां वये धाइ ला मधाइ ला धइगु तसकं ग्याःचिकु जूगु जुयाच्वन। तर म्ह्याचं अथे छुं हे मधाःगु खनाः थः ढुक्क जुयागु खँ मांम्हं रीनां कनादिल ।

More Stories Like this