एमालेयात ह्ययेकः वल
खनालया छेँय् अमेरिकी राजदूत / १७ गते न्ह्यः बैठक च्वनी मखु
येँ (सन्ध्या टाइम्स)/प्रधानमन्त्री चुनावय् मतदान मयायेगु धकाः अडान कयाच्वंगु एमालेयात मतदान यानाः निकास पिकायेत प्यखेरं दवाव वयेगु शुरु जूगु दु। थ्वहे झ्वलय् थौं एमाले अध्यक्ष झलनाथ खनालयात नेपाःया निंतिं अमेरिकी राजदूत स्कट एच. डेलिसीं नं नापलानाः सहलह ब्याकल ।
राजदूत डेलिसी थौं सुथय् एमाले अध्यक्ष खनालया छेँय् वनाः सरकार गठनया ज्याय् जुयाच्वंगु ढिलाईयात कयाः चिउताः प्वंकादीगु खः। वय्कलं अध्यक्ष खनालयात याकनं सहमति यानाः सकसितं मान्य जुइगु सरकार गठन यायेत इनाप यानादीगु खः ।
राजनीतिक गतिरोध थथे हे ताःहाकः जुया वनाच्वन धाःसा देशय् न्हूगु संविधान दयेकेगु ज्या नापं प्रभावित जुइगु बिचाः राजदूत डेलिसीं प्वंकादीगु खः। लिसें वय्कलं याकनं छगू सहमति यानाः मुलुकयात निकास बीगु ज्याय् नेपाःया नेतात सफल जुइ धकाः थः आशावादी जुयाच्वनागु खँ नं अन कनादीगु खः ।
उखे थौं नेपाली कांग्रेसपाखें प्रधानमन्त्रीया उम्मेदवार जुयादीम्ह रामचन्द्र पौडेलं नं डल्लुस्थित खनालया छेँय् वनाः वय्कःयात नाप पासें थःत भोट बीत इनाप यानादीगु दु। एमालेया भोट मवइगु खःसा कांग्रेसयात प्रधानमन्त्री जुइत मत मगाः। एमालेया तटस्थ च्वनेगु नीतिं देय्यात अनिर्णयया स्थितिइ लाका तःगु कारणं थ्व अवस्था याकनं त्वाःथलाः थःत मत बी माल धकाः नं पौडेलं इनाप यानादीगु खः। सूत्रं धाः कथं प्रधानमन्त्री चुनावं झलनाथ खनालं नां लित कायेधुंकाः पौडेल व खनाल छक्वः हे नापलाःगु मदुनि। थ्वहे वय्कःपिनि न्हापांगु मुँज्या खः ।
थ्वहे झ्वलय् आः वइगु साउन १७ गते प्रधानमन्त्री ल्ययेगु स्वंगूगु चरणया मतदान जुइबलय् नेपाली कांग्रेसयात समर्थन यानाः थःगु तटस्थता त्वाःथले माल धकाः पार्टी अध्यक्ष खनालयात पार्टी दुनें हे नं दवाव शुरु जूगु दु। सूत्रया कथं १७ गते मतदान जुइ न्ह्यः एमालेया केन्द्रीय बैठक तयाः छगू निर्णय याये माल धकाः माधव नेपाल, खड्ग ओली पुचलं अध्यक्ष खनालयात इनाप यानाच्वंसां अध्यक्ष खनालं थ्व बारे आः छलफल यायेगु तकं आवश्यकता मदु धकाः बैठक तकं सःतूगु मदुनि। खनाललिसे सतीगु सूत्रं धाः कथं १७ गते तक न्ह्यागु हे परिस्थिति वःसां खनालं बैठक सःतीगु स्थिति मदु। १७ गते लिपा छु जुइ धाये मफुसां वयां न्ह्यः धाःसा खनाल अडिग जुइगु खँ नं धाःगु दु ।
