प्याःचायेवं विष त्वने मजिउ

कृष्ण प्रजापति

देशय् न्हूम्ह प्रधानमन्त्री ल्ययेगु ज्या संकटय् लानाच्वंगु दु। राजनीतिक पार्टीतय् जिद्दिं यानाः छगू धुंकाः मेगु मतदान असफल जुयाच्वंगु दु। प्रधानमन्त्रीया स्वम्ह उम्मेदवार मध्ये निम्हेसिया निंतिं जक निक्वः तक जूगु मतदानय् नं सुयां बहुमत मवः। थुकिं सदन व सभासद्तय् ई सितिं छ्वयाच्वंगु दु। थ्व ई फुतिफुति मुंकाः संविधान च्वयेत खर्च यायेमाःगु मूल्यवान ई खः। तर थन सभासद् व सदन छम्ह प्रधानमन्त्री ल्ययेगु ज्याय् हे व्यस्त जुयाः संविधानसभाया थपे जूगु ई बरबाद यानाच्वंगु दु। थीथी राजनीतिक पार्टीतय्सं प्रधानमन्त्रीया उम्मेदवार समक्ष थीथी कथंया सर्त न्ह्यब्वयाः मोलतोल यानाच्वंगु दु ।

ताः ई न्ह्यवंनिसें थीथी भाषाभाषी जात जातिइ विभाजित जुया वयाच्वंगु थ्व देशय् आः क्षेत्रीय व जातीय नारा तयाः तक नं प्रधानमन्त्री ल्ययेगु ज्याखँय् तःगु माग न्ह्यथनाच्वंगु दु। खास याना मधेशवादी दलतय्सं ताः ई न्ह्यवंनिसें थ्वयेका वयाच्वंगु 'छगू मधेश छगू प्रदेश'या नारायात थ्व इलय् मू माग कथं न्ह्यःने हयाच्वंगु दु। प्रधानमन्त्री जुइगु लोभय् न्ह्यागु यायेत नं तयार जुइपिं नेतातय् लागिं मधेशवादीतय् थ्व माग नं छुं मखु थें जुइगु उतिकं सम्भावना दु। तर प्याःचाल धायेवं विष त्वने मजिउ, थ्व खँ नेतातय्सं लुमंकेमाः। कट्टरपन्थी जातीय, क्षेत्रीय, लैंगिक विभेदकारी नारां देशयात च्वन्ह्याकी मखु। बरु न्ह्याब्लेंया लागिं कलह व द्वन्द्व ब्वलंका बी। अथे जुयाः नं सरकार गठन यायेगु नामय् छुं नं दलं मिखा तिसिनाः न्ह्यागुं शर्त स्वीकार यात धाःसा देश दुर्भाग्यपूर्ण गालय् क्वब्वाइ ।

प्रधानमन्त्री पद चूलाकेत थौं प्रधानमन्त्रीया उम्मेदवारतय्सं थःपिनि राजनीतिक पार्टीया सिद्धान्त, नीति व विचार अःखः छुं नं दलया नेतालिसे सम्झौता यात वा सर्त स्वीकार यात धाःसा उपिं कदापी सद्दे जुइ फइ मखु। थौं थःपिंसं तयागु छगू मधेश छगू प्रदेशया नारायात स्वीकार मयात धाःसा नेपाल राष्ट्र हे दइ मखु धकाः ख्याच्वः बियाच्वंम्ह मधेशवादी नेता महन्त ठाकुर थेंज्याःपिं मनूतनाप माओवादी व कांग्रेसया नेतात सहलहय् जुटे जुयाच्वंगु दु। तर प्रधानमन्त्री पद दइगु जुल धकाः थज्याःगु माग तकं स्वीकार यायेगु धाःसा कन्हय् वइम्ह प्रधानमन्त्रीया लागिं नं थाकुइगु ज्या खः। थ्व राजनीतिक पार्टीतय् निंतिं छगू परीक्षाया घडी नं खः। छु पार्टी गलत व छु पार्टी सद्दे धकाः क्यनीगु नं थज्याःगु हे संकटया घडीइ खः। थौं मनये धाःसा न्हिछिया शिकार व नये धाःसा कान्छा बाया ख्वाःपाः धाइगु उखान थें जुयाच्वंगु दु। निक्वः तक मतदान यानाः नं न्हूम्ह प्रधानमन्त्री ल्यये मफुगु धइगु राष्ट्रया हे दुर्भाग्य खः। छगू शक्तिशाली पार्टी एमालें थःगु सर्त स्वीकार मयाः धकाः तटस्थ च्वनाबिउगुलिं नं थ्व स्थिति वःगु खः ।

थथे राष्ट्रयात अनिर्णयया बन्दी याना तयेगु जरुर नं बांलाःगु ज्या मखु। अथे धायेवं निर्णय यायेगु नामय् राष्ट्र हे विभाजन यायेगु गलत नियत दुपिं राजनीतिक नेतात नाप सम्झौता याना जुल धाःसा अज्याःपिं नेतातय् विरोधय् नं नेपाली जनतां आन्दोलनया ग्वःफय् हयेमालेफु। क्षेत्रीय नारा थ्वयेकेगु, जातीय नारा थ्वयेकेगु व दलीत जनजातियात अज्याःगु हे अवस्थाय् तया तयेगु वास्तवय् थःगु स्वार्थ पूवंकेगु ल्वाभः जक खः। आः सम्भावना अज्याःगु हे जुयाच्वंगु दु। देशयात विभाजनपाखे न्ह्यचिकेत स्वयाच्वंपिं नेतात नापं प्रधानमन्त्री पद छगू चूलाकेगु निंतिं देशयात हे दूरगामी लिच्वः लाके फइगु थीथी कथंया शर्त माने याकेगु धइगु बांलाःगु भविष्यया संकेत मखु। 'छगू मधेश छगू प्रदेश' नेपाली कांग्रेसं माने यानाच्वंगु नारा मखु। बरु तःक्वःमछि उकिया विरोध याना वयाच्वंगु दु। तर नं कांग्रेस नेता रामचन्द्र पौडेलं प्रधानमन्त्री जुइगु लोभं मधेशवादी दलतय्गु थ्व नारायात नं स्वीकार याये धयाच्वंगु दु। कम्युनिष्टत ला थज्याःगु क्षेत्रीय नारायात स्वीकार याइपिं ख हे मखु। थःपिंत अन्तर्राष्ट्रवादी धाइपिं कम्युनिष्टत बरु विश्व सर्वहारा वर्गया मुक्तिया लागिं ल्वाइपिं खः ।

थज्याःगु घडीइ नं मधेशवादी दलतय्सं गलत रुपं हयाच्वंगु राष्ट्रघाती सर्तयात पालना यानाः देश स्यंकेगु ज्या छुं नं पार्टीं यात धाःसा कन्हय् उकिया विरोधय् नं सः थ्वयेकेत जनता तयार जुया च्वनेमाः। निक्वः तकया मतदानं नं देशय् न्हूम्ह प्रधानमन्त्री ल्ययेगु ज्या असफल जुल। अथे जुयाः आः सभासद्त हे न्याये�मी जुयाः हाकनं छक्वः विहारी राजनीतिं थाय् काइगु सम्भावना अप्वया वःगु दु। महाकाली सन्धिया इलय् सांसदत न्याये-मीगु ज्याय् दलाली यानाजूपिं मनूत हे सदनय् थौं नं सक्रिय जुयाच्वंगु खंपिसं वंगु शुक्रवाः जूगु निगूगु चरणया मतदानय् अज्याःगु हे अडकल याःगु खः। तर उगु इलय् उलि स्पष्ट ढंगं थ्व दृश्य खने मंत। आः स्वंगूगु चरणया मतदान छवाः लिपा जुइत्यंगु दु। उगु इलय् नं अज्याःगु हे विहारी राजनीति सदनय् खने दयेफुगु आपालं सम्भावना दनि। सहमतीय सरकार दयेकेगु धकाः सतक व सदनय् नं ताः ई तक ल्वानाच्वंपिं एकीकृत माओवादीं तकं थौं बहुमतीय सरकार गठनया लागिं थीथी कथंया कासा म्हिता जुइवं छगू ल्याखं वयात आः विश्वासया संकट वःगु दु। अप्वः मत वःगुया ल्याखं त्याःसां तबि नं बहुमत वा ३०० मत थ्यंकेमाःगु ल्याखं प्रचण्ड प्रधानमन्त्री कथं स्वीकार मजुल। थथे अन्तरिम संविधानय् दुगु थीथी सर्त व नियमत पालना यानाः नं यदि देशयात निकास बी मफइगु वा प्रधानमन्त्री छम्ह हे ल्यये मफइगु स्थिति वल धाःसा गलत तत्वतय्सं लबः कायेफु। म्हिगः जुजुं राजदरवारया पिजन होलय् निवेदन हे तयेकाः प्रधानमन्त्री ल्ययेत कसरत याः थें थौं नं अज्याःगु गलत संस्कार शुरु जुइफु ।

राष्ट्रयात दूरगामी लिच्वः लायेफुगु छगू मधेश छगू प्रदेशया सर्तयात स्वीकार यायेगु धइगु थःगु तुतिइ थम्हं हे पां पालेगु खः। कन्हय् देश न्ह्याथाय् वंसां थौं छक्वः थः प्रधानमन्त्री वा मन्त्री जुइ दःसा जिउ धइगु प्रबृत्ति गलत खः। चीधंगु वा तःधंगु न्ह्यागु नं पार्टीं याःगु गलत क्रियाकलापं देशयात स्यंके मजिउ, भिंका तयेमाः। थौं छता खँ कन्हय् मेता खँ ल्हाइपिं नेतात खनाः झी इलय् हे होस याना जुइमाःगु अवस्था दु ।

More Stories Like this