मनपालिसे संघर्षं चूलाकूगु उपलब्धी

नेवाः स्वायत्त राज्य मंकाः संघर्ष समितिं बिउगु दवावया लिच्वः कथं येँ मनपां अन कर्मचारी भर्ना यायेत न्ह्याके धुंकूगु ज्याझ्वः स्थगित याःगु जक मखु, नेवाः हक हितया मेमेगु नं ज्याझ्वःत याना यंकेगु सहमति याःगु दु। येँ मनपायात उलि याकेत सहमति याके फुगु धइगु नेवाः स्वायत्त राज्य मंकाः संघर्ष समितिया सफलता नं खः।
संघर्ष समितिलिसे जूगु सहमति कथं येँ मनपां थःगु ज्याकुथी नेवाःतय्त अःपुक सेवा बीगु लागिं छगू 'नेवाः ग्वाहालि डेस्क' नं चायेकेगु ज्या जूगु दु। थ्व खास यानाः येँ मनपाय् ज्या याकः वनेमाःपिं नेवाःतय्त नेवाः भासं निवेदन च्वयेगु लिसें मेमेगु नं प्रशासनिक ज्याय् ग्वाहालि यायेगु ताः तयाः नीस्वंगु डेस्क खः। नेवाःतय्सं स्वायत्त शासनया अभ्यास याना वनेगु लागिं आन्दोलनपाखें प्राप्त याःगु छगू उपलब्धी खः थ्व। आः थ्व डेस्कयात फयांफछि यक्व छ्यलाः नेवाःतय्सं प्रशासनिक झंझट मवयेक थःपिनि ज्या याकेगु जक मखु थ्व डेस्क मार्फत थःगु अधिकार प्रयोग यायेगु अवसर नं उपयोग यायेमाः। डेस्क गठन यानाः उकियात माक्व ज्या बी मफुत धाःसा झीत प्राप्त जूगु अधिकार नं निरर्थक साबित जुइ ।

लिसें येँ मनपा लागाय् च्वंपिं पसल्यातय्सं थःपिनि पसः/संस्थाया साइनबोर्ड नेवाः भासं व नेवाः लिपिं तल धाःसा उमित करय् छुट बीगु धकाः याःगु सहमति मेगु उपलब्धी खः। थ्व छुट नेवाः जक मखु गैर नेवाः व्यापारीतय्सं नं चूलाकल धाःसा व बांलाः हे जुइ। मनपां बिउगु थुपिं सुविधात झीसं संघर्ष यानाः प्राप्त यानागु खः। आः थुकियात संरक्षण यायेगु जिम्मा सम्पूर्ण नेवाःतय्गु खः ।

More Stories Like this