शान्ति धावक रत्न तुलाधर

मधु श्रेष्ठ

नेपाःमितय् यःगु थीथी कासात मध्ये छगू म्याराथुन नं खः। सन् १९७६ या ओलम्पिक गेमय् बैकुण्ठ मानन्धरं म्याराथुनय् ब्वति कयाः नेपाःया इज्जत तःगु खः।
वयां लिपा २०४१ सालंनिसें आःतक नं शान्तिया सन्देश ज्वनाः देय्या थीथी थासय् निरन्तर ब्वाँय् वनाच्वंम्ह छम्ह मेम्ह धावक खः, भाजु रत्न तुलाधर ।

वि.सं २०१७ सालय् बौ स्व.कुलबहादुर तुलाधर व मां पद्मदवीया कोखं वय्कःया जन्म जूगु खः। पुलां भंसारय् छेँ दुम्ह वय्कः आः तकं अविवाहित तिनि ।

विद्यालयकालंनिसें हे खेलकुदय् रुची दुम्ह वय्कः म्यारुथुनय् वये न्ह्यः ज्याथा क्लबय् बक्सिङ्ग व जीम याइम्ह जुयाच्वन ।

२०५१, ०५२, ०५३ सालय् ३०, ३१, ३२ क्वःगु राष्ट्रिय एथलेटिक्स च्याम्पियनय् वय्कलं ब्वति कयादीगु दु। वय्कःया प्रेरणाया स्रोत धइम्ह राष्ट्रिय धावक बैकुण्ठ मानन्धर हे खः ।

२०५७ सालय् बुद्ध जयन्तीया लसताय् वय्कः येँनिसें दोलखा भिमसेन तक १३७ कि.मि. ब्वाँय् वंगु जुयाच्वन। देशय् शान्ति जूगु स्वयेगु वय्कःया इच्छा खः। राष्ट्र व बुद्धया ध्वाँय् बाहेक राजनीतिक पार्टीया ध्वाँय् मज्वंगु कारणं खः ला मसिउ राष्ट्रिय खेलकुद परिषदय् वय्कलं नयाच्वंगु अस्थायी जागिर चबुत ।

मदुम्ह जुजु वीरेन्द्र निसें पूर्व जुजु ज्ञानेन्द्रया पालय् तकं जुजुपिनि बुन्हिया लसताय् जुइगु म्याराथुनय् वय्कलं ब्वति कयादी। थुकिया बारे वय्कलं धयादी, "जुजु, लानि, राजकुमार व अधिराजकुमारीया बुन्हिया लसताय् नारायणहिति राजदरबारंनिसें मनकामना तक, गोरखा दरबारंनिसें लुम्बिनी तक ब्वाँय् वनेगु याना।"
अज्याःबलय् धाःसा दरबारं हे म्याराथुनया प्रायोजन याइगु जुयाच्वन। थ्व बाहेक मनाङ्ग नेपाल पर्वतारोहण संघ लगायत थीथी संघ संस्था व व्यापारीतय्सं नं वय्कःया ब्वाज्याया आयोजना याना बिउ ।

आः तकया दुने वय्कलं अज्याःगु आपालं हे शान्ति दौडय् ब्वति कयादीधुंकल। येँनिसें दोलखा, स्वयम्भूनिसें लुम्बिनी, येँनिसें मुक्तिनाथ, महाकालींनिसें मेची, गोरखां निसें येँ, येँनिसें पलाञ्चोक तक वय्कः तःक्वः हे ब्वाँय् वनेधुंकल। थज्याःबलय् पासापिं नापं मिसा खेलाडी, विद्यार्थी, प्रहरी व आर्मीयात तकं वय्कलं थः नापनापं ब्वाकेगु यानादी ।

२०६४ या मोहनिया लसताय् नेपाल नागरिक मञ्चया ग्वसालय् येँया भद्रकालींनिसें झापा, इलाम जुयाः दार्जलिङय् इन्डियन आइडल प्रशान्त तामाङया छेँय् तक भिंतुना शान्ति दौड याःगु जुयाच्वन। उगु दौडया बारे वय्कलं धयादी, "दार्जलिङय् प्रशान्त तामाङ्गया छेँय् वनाबलय् अन च्वंपिसं थुलि भव्य स्वागत यात कि व खनाः जिगु मिखां ला ख्वबि हे पिहां वल। उलि स्वागत ला आः तक गनं नं मयाःनि ।''

आः वय्कःया छगू तःधंगु इच्छा दनि - स्वनिगलंनिसें चीनया तिब्बत तक ब्वाँय् वनेगु ।

म्याराथुन ब्वाँय् वनेत नसात्वँसा नं गतिलाक्क हे नयेमाःगु जुइ। तर वय्कःया नसात्वँसा धाःसा साधारण खः। अझ वय्कः ला साकाहारी तिनि। थुकिया बारे धयादी, "साधारण जा, केँ, तरकारी, बूबः नयेगु खः। अझ दकलय् अप्वः ला लः हे त्वनेगु खः । चिल्लो, पाउँ, पालुं गबलें नोक्सान याइ मखु बरु उकिं उसाँय्यात भिं हे याइ ।''

देसय् शान्ति जुयाच्वनेमा, थ्व वय्कःया इच्छा खः। "शरीरं साथ बित्तले शान्तिया सन्देश ज्वनाः ब्वाँय् वनाच्वने" ५० दँ दुम्ह भाजु तुलाधरं धयादी ।

अनाथ मस्त, मिसा पुचः, शैक्षिक संस्था आदिया सहयोगया लागिं नं वय्कः ब्वाँय् वनादीगु दु ।

२०६१ सालय् वय्कः प्रबल गोरखा दक्षिणबाहुं विभूषित जुयादीगु खः। ध्यबा जक कमे यायेगु वय्कःया उद्देश्य मखु। थःगु देय्, समाजया सेवा यायेत जीवनभर म्याराथुनयात निरन्तरता बियाच्वने धयादीम्ह धावक तुलाधरया व्यक्तित्व सकलें कासामि व शान्तिप्रेमि नेपाःमितय् लागिं नं प्रेरणाप्रद हे जुइ ।

More Stories Like this