खनालया अडान कायम
येँ (सन्ध्या टाइम्स)/आः वइगु साउन १७ गते प्रधानमन्त्री ल्ययेगु स्वंगूगु चरणया मतदान जुइत्यंगु दुसा उगु मतदानय् दकलय् थाकुगु घडी धाःसा एमालेयात जुयाच्वंगु दु। एमाले दुने १७ गतेया मतदानय् ब्वति कयाः राजनीतिक निकास चायेके माली धकाः दवाव वयाच्वंगु दुसां अध्यक्ष झलनाथ खनालं १७ गते नं थःपिं तटस्थ हे च्वनेगु जुइ धासें थुकी पुनर्विचार यायेगु खँ हे जुइ मखु धयाच्वंगु दु ।
म्हिगः बीबीसीया 'साझा सवाल' ज्याझ्वलय् न्ववासें वय्कलं १७ गते नं सुयातं बहुमत मवइगु निश्चित दु धासें थथे बहुमत वइ मखु धकाः सीक सीकं चुनाव यायेमाःगु निर्वाचन प्रणाली हे हीकेत नं सुझाव बियादिल ।
वय्कलं न्हापांगु चरणया मतदानय् यदि थःत निघौ जक मेगु ई बिउगु खःसां थम्हं ४०१ हे थ्यंकाः क्यनेगु खः धासें न्हापांगु चरणया मतदान न्हिनय् २ बजे यायेगु धकाः २ बजे हे यात तर निगूगु चरणया मतदान धाःसा २ बजे याये धयां नं बहनी ७ बजे तिनि यात, थःगु पालय् छाय् भचा हे पी मफुत धकाः नं न्ह्यसः तयादिल ।
प्रधानमन्त्रीया चुनावय् थः बूसां थःगु नैतिकता त्याःगु दु धासें थज्याःगु त्याग मेपिंसं नं क्यने माल धकाः इनाप यानादिल। वय्कलं आः उम्मेदवार जुयाच्वंपिं माओवादी व कांग्रेस जक जानाः सरकार दयेकल धकाः अज्याःगु अवस्थाय् एमाले विपक्षीइ च्वनेत तयार दु धकाः नं स्पष्ट यानादिल। थः वास्तवय् ४०१ मखु ६०१ या सरकार दयेकेगु पक्षय् दु धासें राष्ट्रिय सहमति मंत धाःसा सरकार वःसां शान्ति व संविधान धाःसा वइ मखु धकाः नं धयादिल ।
मेगु छगू प्रसंगय् वय्कलं तत्कालिन प्रधानसेनापति रुक्मांगत कटवालयात चीकेत थम्हं स्वीकृति बियागु खःसां लिपा कटवालयात न्यंगु स्वंगू स्पष्टीकरण धाःसा मिले मजूगु जुयाः थःपिंसं उगु ज्याया विरोध यानागु खः धकाः नं वय्कलं स्पष्ट यानादिल ।
