नियमावली हिलेगु अनावश्यक सुझाव

प्रधानमन्त्री ल्ययेगु निगू चरण तकया असफलता लिपा आः प्रधानमन्त्री ल्यज्या सम्बन्धी नियमावली हे हीके माल धइगु खँ पिहां वःगु दु। थ्व नियमावली कथं यदि छगू चरणया मतदानय् सुं नं उम्मेदवारं बहुमत हये मफुत धाःसा बहुमत हयाः प्रधानमन्त्री ल्यये मफुतले हे चुनाव यानाच्वनेमाः। तर थुगुसी देशय् प्रधानमन्त्री ल्ययेगु लागिं गुगु 'डेड लक' सिर्जना जूगु खः उकियात फुके यायेगु लागिं थ्व नियमावली हे हिलेमाः धइगु खँ न्यने दयाच्वंगु दु ।

तर थौं देशय् प्रधानमन्त्री ल्ययेगु लागिं गुगु समस्या पिहां वःगु खः, उकिया कारण नियमावली मखु। नियमावली मिले मजुयाः प्रधानमन्त्री ल्यये मफयाच्वंगु मखु। प्रधानमन्त्री ल्यये मफुगु ला सहमति व समझदारी मदयाच्वंगु कारणं खः। समझदारी मंत धाःसा न्ह्याक्व हे सुविधाजनक नियम कानून हःसां नं उकिं ज्या याये फइ मखु। थःगु पार्टीयाके स्पष्ट बहुमत दयेक दयेक ला थःगु सरकार क्वःथलाः मध्यावधि चुनावय् वनीपिं नेतातय्सं चले यानाच्वंगु देश खः थ्व। थन न्ह्यागु हे बांलाःगु कानून, ऐन नियम हःसां ज्या याये फइ मखु। उकिं आः प्रधानमन्त्री ल्ययेगु सम्बन्धी नियमावली धायेवं जक नं न्हूम्ह प्रम ल्यये अःपुइगु मखु। नियमावली हिलेगु औचित्य मदु। हिलेमाःगु ला नेतातय्गु क्वपुलांगु दिमाग खः, उमिगु लोभीपापी मनःस्थिति व जि हे जक ठीक धइगु अहंकारयात खः। थःपिनि दोषयात छखे तयाः स्वापू हे मदुगु विषयपाखे पलाः तः जुइगु हिसि दुगु खँ मखु ।

प्रधानमन्त्री ल्यये मफयाः संविधान सभाया बहुमूल्य ई सितिकं वनाच्वंगु खँयात मनन यासें राजनीतिक पार्टीतय्सं ठोस ज्या याये माःगु दु ।

More Stories Like this